Hatutan.com, (30 Jullu 2022), Baucau-Partidu Congresso Nacional de Reconstrução de Timor (CNRT), daudaun ne’e, hala’o konsolidasaun maratona husi munisípiu to’o área remota sira hodi hametin estrutura no prepara an bá enfrenta eleisaun jerál 2023.

Lee Mós : CNRT Hato’o Parabens Bá Ramos-Horta ho Lú Olo

Ramos-Horta, Xanana Gusmão, Francisco Kalbuadi Lay ho kuadru partidu CNRT nian halo konferensia imprensa hafoin eleitu bá Prezidente Repúblika 2022-2027. Foto/Dok. Hatutan.com

Liuhusi konsolidasaun ne’ebé lidera husi Sekretáriu Jerál partidu CNRT nian, Francisco Kalbuadi Lay no hetan akompaña husi kuadru nasionál balun no kuadru partidu CNRT Munisípiu Baucau nian, Sábadu (30/07/2022), iha Aldeia Hatu-Lete, Suku Triloca, Postu Administrativu Baucau Vila, Munisípiu Baucau, estrutura sira iha baze hato’o sira-nia kompromisu atu servisu bá partidu CNRT dala ida tan hodi lori prezidente partidu CNRT, Kay Rala Xanana Gusmão bá Primeiru-Ministru iha 2023.  

Koordenadór partidu CNRT Munisípiu Baucau, Virgílio Pereira, bá dala-uluk lori estrutura munisípiu to’o baze, hato’o nia agradesimentu bá partidu aliadu sira hanesan Partidu Demokrátiku (PD), FRENTI-MUDANÇA, União Demokratico Timorense (UDT), Partidu Sosialista Timor (PST) inklui movimentu h organizasaun masa sira hotu ne’ebé fó ona apoiu bá susesu kandidatura José Ramos-Horta nian, hodi sai duni  Prezidente Repúblika liuhusi eleisaun demokrátiku, foin lalais ne’e.

“Tenke hatudu nafatin iha eleisaun parlamentár iha 2023  hodi lori Kay Rala Xanana Gusmão bá PM dala-ida tán,” Virgílio Pereira.

Nia hateten, laloran boot no todan ida tan iha oin daudaun ne’e mak eleisaun parlamentár 2023 tanba ne’e presiza timoroan hotu nia sakrifisiu  atu bele lori duni Kay Rala Xanana Gusmão bá tuur iha Palásiu  Governu nu’udár Xefe Governu nian iha 2023.

Koordenadór CNRT Munisipiu Baucau ne’e, husu ba estrutura tomak hahú hosi munisípiu bá to’o Postu Administrativa Vemasse, Venilale, Baucau Vila, Laga, Baguia ho Quelicai, atu fó liman bá malu servisu bá povu nia esperansa mak Xanana fila bá ukun iha Governu.

Durante serimónia agradesimentu bá vitória eleisaun prezidensiál no abertura konsolidasaun partidu CNRT nian ne’e, Virgílio Pereira, agradese bá veteranu sira iha Munisípiu Baucau hanesan, Alin-Laek, Aderito Domin, Berdú, Derok-Masin ho seluk tán ne’ebé kontinua kontribui bá timor nia di’ak no timor nia progresu.

Tuir koordenadór CNRT Baucau ne’e katak, susesu lori Ramos-Horta sai PR hodi ba tuur iha Palásiu Prezidensiál, la’ós estrutura nasionál no munisípiu mesak, maibé mós esforsu no servisu maka’as hosi estrutura tomak hahú kedan hosi baze.

Iha fatin hanesan, Sekretáriu Jerál partidu CNRT, Francisco Kalbuadi Lay, mós hato’o agradese bá fiskál sira hotu partidu nian ne’ebé mak destaka iha kada sentru votasaun sira, hodi akompaña prosesu votasaun no kontajen votu to’o rezultadu remata.

“Foin daudauk eleisaun liubá, fiskál sira servisu loron kalan, hein de’it iha estasaun votasaun, para depois alista votu sira hothotu, komesa loron 19 fulan-Marsu ho fulan-Abríl nian, to’o rezultadu ne’e tama mai. Bá sira ne’ebé CELKOM, NUREP, hanesan sekretáriu jerál, ho estrutura nasionál sira ne’ebé mak ohin loron hamutuk iha ne’e, ami hotu labele nega katak, sé mak servisu maka’as ne’e iha baze mak ita-boot sira,” Francisco Kalbuadi Lay hateten.

Rezultadu apuramentu nasionál husi Comissão Nacional Eleições (CNE) ne’ebé Tribunál Rekursu valida  hatudu katak, Ramos-Horta nu’udár kandidatu Prezidente Repúblika (PR) ho númeru sorteiu 1, manan ho totál votu 398.028 (62,1%), no kandidatu PR númeru 2, Francisco Guterres Lú-Olo  hela de’it ho votu 242.939 (37,9%).

Totál votu nulu iha apuramentu ne’e, hamutuk rihun-lima (5.000) no konsege halo kontajen, verifikasaun iha votu 1.200 mak sai válidu, hodi aumenta bá kandidatu na’in-rua nia votu mak hanesan Ramos-Horta hetan atus-ualu-resin (800-resin), Lú-Olo hetan atus-haat-resin (400-resin).

Enkuantu totál eleitór hamutuk 859.925, ema ne’ebé tuir vota hamutuk 646.389, votu válidu 640.967 (99,16), votu branku 1.643 ( 0,25%), votu nulu 3.734 ( 0,58%) votu rezeitadu 28 (0,00%) no votu abandonadu iha 15.

Jornalista: Rogério Pereira Cárceres