Hatutan.com, (01 Agostu 2022), Díli—Prezidente Repúblika (PR), José Ramos-Horta esplika kona-bá objetivu sorumutu ho timoroan sira iha Timor Osidentál foin lalais ne’e atu hatudu Timor Leste (TL) nia onestidade kona-bá rekonsiliasaun.

PR Ramos-Horta enkontru ho lider timoroan pro-autonomia sira iha Governador NTT, Viktor Bungtilu Laiskodat nia uma estadu iha Kupaun, Domingu kalan (24/07/2022). Foto/TRIBUN FLORES.COM

Xefe Estadu informa katak, durante vizita ba Indonézia, liu hosi Nusa Tenggara Timur (NTT) hasoru malu duni ho Timoroan sira iha ne’ebá no sempre hasoru mós Timoroan sira ne’ebé hela iha Austrália, Inglatera no iha ne’ebé de’it inklui povu Timor Leste tomak.

Lee Mós: Dokumentu Fraternidade Umana Lori Horta Hasuru Lopes da Cruz ho Eurico Guterres

“Timoroan iha Atambua no Kupang Indonézia ne’ebá tinan 20-resin ona. Iha tinan 20 resin ne’e, sira la halo problema oan ida ba rai ida-ne’e no la’ós sira mak kria problema iha bairru-bairru sira iha sidade Díli, la’ós sira mak tuda fatuk iha Timor Leste laran, la’ós mós sira mak ba halo Timor nia naran foer iha Inglatera ne’ebá,” Ramos-Horta iha edifísiu sentrál SAMES I.P, Kampung Alor, Segunda (01/08/2022).

Ramos-Horta konsidera katak, tinan 20 resin maluk Timor oan sira nia kontribuisaun di’ak loos ba rai ida ne’e, hakmatek no tempu to’o ona atu sé mak hakarak fila bele fila, uluk iha 2000-2003 programa organizadu hosi Nasoens Unidas, semana-semana ró-ahi boot lori sira fila no programa repartiramente ne’e remata iha 2003.

“Timoroan sira ne’e iha Direitu ba nasionalidade Timorense no faktu hatudu katak sira balun ne’ebé hakarak fila, hetan nasionalidade Timorense. Ha’u nia preokupasaun mak ne’e, hadi’a prosesu ne’e no loke nafatin dalan hodi haku’ak Timoroan sira. Bainhira hakuak Timoroan ida iha Indonézia hotu-hotu ko’alia, maibé bainhira hakuak Jenerál Wiranto hotu-hotu basa liman, ne’e oinsa,” José Ramos-Horta kestiona.

Nia subliña katak, filozofia no hanoin loloos maka ne’e, tempu to’o ona atu Timor Leste hatudu nia onestidade kona-bá rekonsiliasaun.

“Sira ne’ebé naran iha krime sériu mak tenke taka maibé ba sidadaun bai-bain bainhira hakarak fila fali mai laiha problema,” nia hateten.

Jornalista: Vito Salvadór