Hatutan.com, (01 Agostu 2022), Díli—Ekipa Servisu Informasaun Polísia (SIP) Nasionál  konsege asegura joven na’in-ida ne’ebé deskonfia envolve iha kazu na’ok motór iha 31 fulan Jullu tinan ne’e, no suspeitu naran EFS alias J ho idade 26 hela iha Kampung Baru, Comoro, Díli.

Ekipa Servisu Informasaun Polísia (SIP) Nasionál asegura joven na’in-ida ne’ebé deskonfia envolve iha kazu na’ok motór, (31/07/2022) no suspeitu naran EFS alias J ho idade 26 hela iha Kampung Baru, Comoro, Díli. Foto/PNTL.

Kapturasaun ne’e ekipa ezekuta hafoin simu orientasaun hosi Xefe SIP Nasionál, hodi buka-tuir no identifika autór sira ba krime públiku mak hanesan kazu na’ok motór, hadau telephone no na’ok sasan hosi karreta laran ne’ebé mak sempre akontese iha Dili laran.

Lee Mós: SIP Kaptura Suspeitu Na’in-tolu Hadau Telemóvel iha Comoro

Tuir kronolojia, iha loron 29 jullu 2022, ekipa simu informasaun hosi vítima ho naran Oscar Lúcio Afonso Soares, hela iha Díli, Suku Vila-Verde katak nia motór marka Honda Beat ho númeru polisia N. 1403 TLS, ema na’ok iha área Villa Verde tinan rua ona.

“Nune’e, ekipa dezenvolve tán kazu balun hosi suspeitu sira ne’ebé kapturadu iha semana kotuk konsege identifika suspeitu EFS ne’ebé ligadu ho kazu na’ok motór ne’e,” Hatutan.com sita komunikadu.

Suspeitu EFS deklara katak, nia la’ós motór-na’in no nia ajuda de’it nia maluk ida iha Baucau hodi mai trata dokumentu motór nian iha Dili.

Enkuantu motór refere sei iha hela suspeitu ho naran NM alias A, tinan 31 hosi Aldeia Dataua, Suku Kaibada, Postu Baucau-Vila, Munisípiu Baucau.

Hafoin rona deklarasaun, ekipa SIP Nasionál ba kedan Munisipiu Baucau hodi halo koordenasaun servisu ho SIP Baucau, la’o hamutuk buka-tuir no konsege hetan NM sa’e hela motór iha área Seisal.

Iha momentu ne’e nia koopera di’ak. nune’e ekipa konjunta SIP lori kedan NM ba iha Komandu PNTL Munisípiu Baucau hodi halo identifikasaun.

Iha prosesu identifikasaun, NM deklara katak nia hola motór Honda Beat ne’e hosi nia kolega ida naran AL iha fulan Dezembru tinan 2020 ho montante $500. Selu dala rua, primeiru selu uluk osan ho montante $350, ikus liu selu osan ho montante $150.

NM mós deklara katak, suspeitu AL iha Díli hela iha área Pantai Kelapa no iha Baucau AL hela iha área Postu Administrativu Laga.

Hafoin halo identifikasaun nia mós halo auto entrega motór refere ba PNTL no prontu atu mai hatan bainhira hosi parte investigasaun presiza nia prezensa hodi apoiu prosesu investigasaun.

Iha sorin seluk, vítima Oscar Lucio deklara katak nia motór rua mak ema na’ok, ida mak Honda Beat lakon iha loron 23 Novembru 2020 tuku 03h30 otl no iha loron tuir-mai loron 24 Novembru 2020 horas 04:00 otl vítima nia motór Yamaha Vixion lakon tán iha nia uma Vila-Verde.

Atu buka-tuir autór prinsipál ba kazu na’ok motór ne’e ekipa SIP sei relata identidade suspeitu sira nian ba Seksaun Investigasaun Komandu PNTL Munisipiu Dili, hodi hato’o ba iha Ministériu Públiku (MP) atu bele hato’o pedidu ba Tribunál hodi hasai mandadu detensaun no mandadu buka-tuir suspeitu AL hodi bele identifika tán motór Yamaha Vixion ne’ebé mak lakon.

Jornalista: Carmelita Isaac