Hatutan.com, (04 Agostu 2022), Díli—Unidade Patrullamentu Fronteira (UPF) hosi kompañia Bravo-Suai, halo vijilánsia no kaptura timor-oan na’in-ida ho karreta kamioneta ida, hatama mina ilegál liuhosi fronteira Indonézia mai Timor-Leste, iha área Damuk, Aiteka-Laran, Aldeia Wetaba, Suku Beiseuk, Postu-Administrativu Tilomar, Munisípiu Covalima.

Mina ilegál tonelada rua ne’ebé Membru UPF hosi kompañia Bravo-Suai, Preende iha área Damuk, Aiteka-Laran, Aldeia Wetaba, Suku Beiseuk, Postu-Administrativu Tilomar, Munisípiu Covalima, Kinta (04/08/2022). Foto/PNTL.

“Horikalan iha tuku 1:00 madrugada ami-nia membru halo operasaun la’o ain no prende karreta tipu vaskolante ida ho xapa matrikula A.53.588 no detein joven mane na’in-ida ho inisiál OdC, tinan 37 hosi Salele-Wetaba, Suku Beiseuk, Postu Tilomar ne’ebé hatama kombustível illegál hanesan Gazolina 35ltr masa 40, Gazoel 35ltr masa 31, totál = 2480 ltrs ka 2ton+,” Hatutan.com sita deklarasaun Komandante UPF, Euclides Belo iha komunikadu.

Lee Mós:Transaksaun Ilegál Kontinua Buras Iha Fronteira Tanba Menus Rekursu Umanu

Oras-ne’e daudaun suspeitu ho evidénsia UPF entrega ona ba Servisu Investigasaun Kriminál Komandu PNTL Covalima hodi halo prosesu investigasaun.

Antes ne’e iha Tersa tuku 21:00 kalan, ekipa servisu sekreta UPF Mota-Ain halo apreensaun ba ró bero ida ne’ebé transporta gazolina masa 35ltr hamutuk masa 11 iha tasi ibun Batugade.

Agora daudaun evidénsia aguarda iha komandu UPF no sei halo prosesu hodi entrega ba Komandu Munisípiu Bobonaro.

Jornalista: Rogério Pereira Cárceres