Hatutan.com, (05 Agostu 2022), Díli—Ministériu Saúde (MS) hahú halo revitalizasaun ba Programa Promosaun  Saúde na Família (PSF) hodi Suporta Atividade Saúde Primária iha Área rurál.

Pesoál promotór saúde familiar no profisionál saúde sira partisipa iha Semináriu nasionál ba Revitalizasaun ba Programa Promosaun Saúde na Família (PSF), ne’ebé hala’o durante loron rua (03-04 Agostu) iha Salaun Delta Nova, Comoro, Díli. Foto/MS.

Revitalizasaun ne’e MS halo liu hosi workshop nasionál ne’ebé hala’o durante loron rua (03-04 Agostu) iha Salaun Delta Nova, Comoro, Díli ne’ebé loke direta hosi Vise-Ministru Saúde, Bonifácio Mau Coli dos Reis.

Lee Mós: 2002-2022 CFP-MS Rekruta Profisionál Saúde 5.525

Iha workshop ba loron rua ne’e ho kompromisu atu reforsa, revitaliza no re-ajusta fila fali Promotór Saúde Familia nia kna’ar no responsabilidade hodi Suporta Atividade Kuidadus Saúde Primáriu Areas Remotas iha Timor-Leste.

Advertisement

Objetivu hosi programa PSF “Lori atividade no programa Saúde ba individu, uma-ka’in no komunidade hotu ba moris di’ak, saudável no hotu-hotu hetan asisténsia saúde ne’ebé dignu, ekilibradu, adekuadu, universál, integrál no kontínu”.

“Ida-ne’e hatudu katak Saúde ne’e ita hotu nian no ita hotu iha kompromisu atu lori saúde ba oin. Karik la’ós ita hotu se loos. Tanba ne’e, Promotór Saúde Familiar presiza re-forsa, re-estabelese no revitaliza nia ezisténsia hodi bele fó apoiu ba programa Outreach sira,” Bonifácio Mau Coli dos Reis hateten iha komunikadu.

Bonifácio Mau Coli dos Reis  lori Ministériu Saúde nia naran hakarak kongratula ba Diresaun Jerál Prestasaun Saúde, Diresaun hosi Ministériu Relevante sira, partikularmente Ministériu Administrasaun Estatal, Ajénsia Nasoens Unidas (WHO), Maluk Timor, Diresaun Nasionál Saúde Públika, Ministériu Saúde, Organizasaun Naun Governamentál, Parseiru, Doadores, Organizasaun oioin hanesan Grupu Suporta Inan ho inisiativa ba realizasaun Workshop ida-ne’e atu hala’o orientasaun fila-fali ba re-estabelesimentu.

PSF hahú harii iha tinan 2008, nu’udár membru suku, hili hosi líder komunidade hodi suporta Serviço Integrado da Saúde Comumnitária (SISCa) iha sira nia suku.

Iha 4.450 PSF rejistadu iha MS no treinadu iha área saúde, suporta SISCa iha Teritóriu Timor Leste laran tomak. Tinan 2022 númeru PSF treinadu ne’e redús ba 2000 PSF, tanba iha fatór oioin.

Advertisement

Programa ne’e hahú hosi konviksaun ida katak “ita labele pasivu no labele hein de’it komunidade ba buka asisténsia saúde iha estabelesimentu saúde sira hanesan Sentru Saúde, Postu Saúde, Klinika Maternidade maibé tenke pró-ativu hodi sai no lori kuidadu saúde hakbesik ba ema sira”.

Programa ne’e prienxe prinsípiu importante rua, “laiha ema ida maka hela iha kotuk” no “buka uluk sira ne’ebé mak hela liu ba kotuk” ka Kobertura Saúde Universal ho partisipasaun ativa komunidade (PSF).

Atu bele lori asisténsia ba área remota sira presiza define no estabelese polítika ida-ne’ebé viável no sustentável ba komunidade nia saúde, aleinde programa outreach, klínika móvel maka Minstériu Saúde iha tinan 2007 lansa programa outreach hanaran SISCa  no mós iha loron 22 de Jullu 2015 Governu ofisialmente lanxa Programa Saúde na Família liu hosi vizita domisiliária ho objetivu atu lori saúde ba uma-ka’in idak-idak iha Timor Leste hosi profisional saúde sira.

Kompromisu hodi lori saúde ativamente ba komunidade nia leet liu hosi garante asesu no kualidade prestasaun saúde di’ak liu hotu ba populasaun.

“Maski ita hotu hatene katak, Ministériu Saúde no Governu sei enfrenta difikuldade, limitasõens, dezafiu, konstranjimentu ba orsamentu, la signifika katak ita paradu ba implementasaun programa sira hotu. Orsamentu ne’ebé alokadu liu hosi Dotasaun Orsamentál  Temporáriu (DOT) natoon atu Ministériu Saúde bele prioritiza programa esensial sira-ne’ebé liga diretamente ba komunidade nia moris no saúde,” nia hateten.

Advertisement

Vise Ministru hakarak bolu atensaun ba profisional Saúde sira hotu atu kontinua hala’o servisu ne’ebé di’ak liután ho matenek no espíritu étika no profisionalizmu, nasionalizmu, prontidaun atu serbí, responsivu ba asuntu sensiveis relasiona ho antendimentu saúde ba komunidade no dedikasaun umana ne’ebé iha hodi bele asegura asisténsia Saúde ne’ebé adequadu no ekuilibriu ba populasaun Timor-Leste hahú hosi programa outdoor hanesan Saúde na Família, SISCa, Klinika Movel, outreach no programa indoor  hanesan iha Postu Saúde, Sentru Saúde no Hospitál sira.

Jornalista: Rogério Pereira Cárceres