Hatutan.com, (08 Agostu 2022), Díli—Ministru Prezidénsia no Konsellu Ministru (MPKM), Fidelis Manuel Leite Magalhães, husu ba instituisaun Polísia Nasionál Timor-Leste (PNTL), atu servisu makas, hodi evita krime tráfiku umanu iha Timor-Leste (TL).

Fidelis husu ne’e durante partisipa iha workshop kona-bá asuntu krime sira ba tráfiku umanu nian ne’ebé hal’o iha Centro de Formação da Policia (CFP), Comoro, Díli, Segunda (08/08/2022).

Lee Mós:Lere Husu Governu Kontrola Ajénsia Traballadór Prátika Trafiku Umanu

Governu nia prezensa atu hato’o de’it preokupasaun sentrál sira, liu-liu ba asuntu ida kona-bá tráfiku ema nian.

Tráfiku umanu ne’e hanesan krime ida rejionál no globalmente akontese. Tanba ne’e mak timoroan hotu liu-liu autoridade relevante sira, tenke halo esforsu ida-ne’e, tenke antesipa, labele tuur nonook de’it, tanba trafikante sira iha kazu ida-ne’e, halo kríme ne’ebé organizadu tebes.

“Sira mós la tuur nonook de’it, sira mós halo nia métodu oioin, kreatividade oioin, atu bele manán ho atividade tráfiku umanu. Tanba ne’e ita ninia polísia sira, ita nia servisu migrasaun nian tenke halo esforsu hotu, atu bele matenek liu sira,” Fidelis hateten.

PNTL liuhosi unidade Servisu Investigasaun Kriminál Nasionál, tenke halo esforsu hotu atu iha koolaborasaun hamutuk Timor-Leste Police Developmente Program (TLPDP), ne’ebé mak sai hanesan komponente komplementár ida ne’ebé mak ajuda tebes ba esforsu ida-ne’e.

Iha fatin hanesan, Xefe unidade Servisu Investigasaun Kriminál Nasionál (SIKN), Superintendente Polisia, Jorge Monteiro esplika, objetivu prinsipál hosi formasaun no kapasitasaun ida-ne’e, atu fó koñesimentu no informasaun ba iha membru PNTL sira, esepesifikamente iha área tráfiku umanu ninian.

Vizaun hosi formasaun no kapasitasaun ida-ne’e katak, ho formasaun no kapasitasaun ne’ebé mak iha, polisia sira, espesiálmente PNTL, maluk sira hosi servisu migrasaun no instituisaun relevante ne’ebé mak hola parte mós iha semináriu ida-ne’e, sira bele iha koñesimentu ne’ebé mak di’ak no kle’an, relasiona ho prosesu ba kazu sira ne’ebé mak iha relasaun ho kazu espesífiku hanesan tráfiku umanu ninian.

Tráfiku umanu sai hanesan aspetu ida hosi krize transnasionál no krime organizadu ninian, tanba krime rua ne’e la’ós iha tráfiku umanu de’it, maibé iha mós tráfiku ba droga, tráfiku armas no ho kazu sira seluk tán.

SIKN seidauk bele fó-sai dadus trafiku umanu ne’ebé rejistadu iha tinan 2021 ho 2022 tanba sei halo hela verifkasaun ba dadus sira ne’e, no sei submete relatóriu ba Komandante Jerál PNTL, Komisáriu Polisia, Faustino da Costa, hafoin bele informa ba públiku.

Totál partisipante sira iha formasaun ne’e hamutuk 26, mai hosi Komandu PNTL Munisipiu 12 ho REAOA, ne’ebé kada munisipiu reprezenta membru na’in-rua. Formasaun ida ne’e sei hala’o durante semana ida nia laran, maibé iha ninia kontinuasaun ba oin.

Eventu workshop ne’e realiza tanba, hetan apoia másima hosi Governu Australia, liuhosi TLPDP iha Timor-Leste, no rekursu umanu sira ba iha formasaun ne’e, hosi Australian Federal Police (AFP).

Jornalista: Rogério Pereira Cárceres