Hatutan.com, (08 Agostu 2022), Díli—Atleta Universitáriu Timor Leste ne’ebé partisipa iha ASEAN University Games (AUG) oferese medalla haat ba Timor Leste iha modslidade Atletizmu, Taekwondo no Voleiból.

Partisipante TL nian iha ASEAN University Games (AUG) 2022 iha Ubon Rachathani-Tailándia. Foto/AUG TL.

Atleta Unviersitáriu Timor Leste ne’ebé partisipa no kompete iha eventu rezionál ASEAN University Games (AUG) 2022 iha Ubon Rachathani-Tailándia, konsege manan Medalla Osan Mutin ida no Osan Metan tolu.

Lee Mós: Ronde VI Olimpiade Xadres Mundiál, Ekipa Feto TL Ultrapasa Nasaun 54

Medalla Osan Mutin ida konkista hosi atleta Felisberto de Deus ne’ebé kompete ba Modalidade Atletizmu ho kategoria metru 5.000.

Allende ne’e, atleta atletizmu Timor Leste ne’e mós konkista Medalla Osan Metan ida iha kategoria metru 10.000 nian.

Atleta seluk ne’ebé kontribui ba Medalla Osan Metan ida maka Ana da Costa da Silva Pinto Belo ne’ebé kompete ba Modalidade Taekwondo ho klase kilograma 46 hafoin halakon atleta sira hosi Nasaun Laos no Malázia.

Ikus liu mak ekipa Voleiból Timor-Leste B ne’ebé reprezenta atleta Joel Sávio Valente no Tito Miguel Morais Gusmão kontribui mós Medalla Osan Metan ida hafoin halakon nia adversáriu sira hosi ekipa Timor-Leste B iha jogu ikus.

“Ho prestasaun hirak ne’e halo Timor-Leste okupa iha númeru 10 hosi total númeru 11 ne’ebé mak partisipa iha AUG tinan ne’e,” Hatutan.com sita komunikadu.

Federasaun Desportu Akadémiku Timor-Leste (FDA-TL) agradese ba solidariedade no lia-murak sira ne’ebé enkoraza ona atleta sira hodi kompete ho dignu.

Hein katak kompetisaun sira tuir-mai ne’e, atleta universitáriu sira sei bele konkista tán prestasaun nune’e bele lori orgullu ba rain no povu TL.

Jornalista: Vito Salvadór