Hatutan.com, (08 Agostu 2022), Díli—Atleta timoroan sira ne’ebé ho kondisaun defisiénsia, hamutuk na’in-15, konsege rekolla medalla 12 durante partisipa iha kompetisaun desportiva SEA PARA GAMES iha Solo, Repúblika Indonézia, kompostu hosi osan-mean lima, osan-mutin rua no osan-metan lima.

Atleta timoroan sira ne’ebé ho kondisaun defisiénsia, hamutuk na’in-15, hasoru-malu ho Primeiru Ministru Taur Matan Ruak iha Palásiu Governu Segunda (08/08/2022), hafoin partisipa iha kompetisaun desportiva Sea Para Games iha Solo, Repúblika Indonézia. Foto/Hatutan.com.

Primeiru Ministru (PM), Taúr Matan Ruak espressa sentimentu kontente, tanba simu altela sira, maski ho kondisaun fízika defisiénsia, maibé konsege hatudu rezultadu di’ak tebes ba TL.

Lee Mós:ASEAN Para Games 2022, Atleta Timor-Leste Oferese Medalla Osan Mean Tolu

“Ha’u kontente loos, ema dala-barak dehan no ema hateten. Laiha buat ida mak iha mundu difísil, sé ita hakarak ba oin. Ita nia istória, ita hatudu katak, mezmu mate, ita la ta’uk ba oin,” Primeiru Ministru (PM), Taur Matan Ruak hateten iha Palásiu Governu, Segunda (08/08/2022).

Tinan 20 ukun an ne’e, naton ona atu TL avansa ba faze seluk hodi kompete, la’ós atu partisipa de’it. Bainhira bá mak atu partisipa hela de’it, ema bele dehan TL buka mak aprende de’it no nunka atu sai mestre.

Rezultadu di’ak ida ne’e, tanba mai hosi esforsu fíziku, dedikasaun, preparasaun psikolójiku atleta sira nian, ida ne’e maka’as liu.

La’ós ne’e de’it, apoiu governu nian mós tenke maka’as liu, nune’e bele reuni kondisaun sira hotu hodi kontribui ho situasaun sira hotu, nune’e atleta sira nia prestasaun ne’e bele ba oin liután.

“Ha’u kontente loos, simu imi iha fatin ida-ne’e. Ha’u lori Governu nia naran, Estadu Timor nia naran, povu timor nia naran, saúda ita boot sira. Imi hisik ita nia Bandeira iha mundu, sa tán imi tama iha Indonézia, tenke halo ida ne’e,” Xefe Governu dehan ho orgullu.

Iha fatin hanesan, Xefe Misaun SEJD, ba Kompetisaun Desportiva iha Solo, Joãozinho Ferreira da Conceição Fernandes hateten, tinan 2022 Komite Paralímpiku Nasionál Timor-Leste, halo istória ne’ebé foun, tanba lori atleta sira ho volume ne’ebé natón, maibé hatudu prestasaun ne’ebé di’ak tebes iha nível Sea Para Games.

Durante iha kompetisaun ne’e, atleta sira ne’ebé mak hutudu prestasaun di’ak mai hosi modalidade Para Atletatizmu, Para Tenis Meza, no ikus liu mak Power Lifting (hiit besi).

“Agradese tebes ba atleta Paralímpiku sira, ita sai embaixadór di’ak iha ita nia nasaun ba nasaun sira seluk,” Joãozinho Ferreira da Conceição Fernandes, hateten.

Medalla 12 ne’e, hetan hosi Para Altétiku, atleta Teófilo Freitas, lori medalla osan-mean tolu, tanba kompete iha klase korrida metru 400, metru 800 to’o metru 1500. Osan-mean rua oferese hosi atleta na’in-tolu, Pascoela, Abelita, ho Bernardo, iha modalidade tennis table (Tennis Meza). Osan-mutin rua, oferese hosi atleta feto ida.

Medalla osan-mutin ida mós hetan hosi atlétiku, atleta Domingas ne’ebé halai iha metru 400. Medalla osan-metan lima oferese nafatin hosi atleta na’in-tolu, Pascoela, Abelita no Bernardo, iha modalidade tennis table, single no mix 2.

Enkuantu, iha hiit-besi (power sifting) nian, atleta Doni mak manán medalla osan-metan rua, ne’ebé tuir loloos, nia hiit iha kilogram 65 de’it, maibé nia konsege hiit to’o pezu 112.

Jornalista: Rogério Pereira Cárceres