Hatutan.com, (09 Agostu 2022), Díli- Sekretáriu Jerál partidu Frente Revolucionário Timor Leste Independente (FRETILIN), Mari Bin Amude Alkatiri, konsidera situasaun polítika iha Timor-Leste la permite lider sira halo diálogu nasionál hodi haree nasaun no povu nia interese.

Lee Mós : Mari Alkatiri: Tinan 10 Ikus Ne’e Timor La’o Bá Kotuk

Sekretáriu Jerál partidu Frente Revolucionário Timor Leste Independente (FRETILIN), Mari Bin Amude Alkatiri. Foto/Hatutan.com

Mari Alkatiri haktuir lia hirak ne’e bá jornalista sira hafoin hasoru malu ho Prezidente Repúblika (PR), José Ramos-Horta iha Palásiu Prezidensiál, Tersa (09/08/2022).  Nia hatutan, iha hasoru malu ho Xefe Estadu ne’e sira iha asuntu barak mak ko’alia tanba Timor Leste presiza lider sira hotu ko’alia bá malu buka solusaun ida ne’ebé bele sustentavel no kuaze fundadór nasaun sira hotu idade 70-resin ona.

“Karik, ami sira iha tinan-lima de’it, se lae menus tan karik, atu hadi’a saida mak tenke hadi’a, no hametin saida mak tenke hametin, maibé tenke hamutuk atu bele husik hela bá jerasaun aban bainrua situasaun ida ne’ebé labele todan demais,” Alkatiri hateten.

Hanesan fundadór nasaun, Alkatiri hakarak husik situasaun ida di’ak bá oan no bei-oan no jerasaun aban bainrua, atu bele hanoin bá kotuk no bele dehan avó sira balun fó an bá mate no servisu maka’as, balun ho entendimentu ne’ebé nesesáriu hodi husik legadu mai jerasaun foun rai ida ne’e ne’ebé tenke banati tuir sira.

“Ha’u foti inisiativa ona atu halo diálogu, maibé situasaun polítika mak la permite no ha’u fiar katak ita hotu iha tempu ona atu tuur halo reflesaun, atu hanoin para bele ita hotu tuur hamutuk atu hateke bá oin. Ha’u lakohi mensiona naran, se de’it, maibé hotu-hotu hatene katak rai ida ne’e se presiza ami no presiza mós ami atu hamutuk,” Alkatiri hateten.

Sekretáriu Jerál FRETILIN ne’e hatutan iha tinan 20 nia laran labele dehan buat hotu-hotu ne’ebé halo ne’e loos hotu ona, hanesan ema moris iha tinan 20 nia laran, buat hotu seidauk perfeitu tamba Timor-Leste seidauk iha esperiénsia atu harii Estadu.

Buat barak mak halo, halo duni, halo sasán barak maibé tenke hatene katak tempu ona atu hanoin bá kotuk, maibé atu hateke bá oin.

Jornalista: Vito Salvadór