Hatutan.com, (09 Agostu 2022), Díli—Tama ba ronde X Olimpiade Xadrez Mundiál, Atleta Hélder de Araújo, Sonizia Tilman no Elfiana dos Santos Kontribui hikas pontu ba Ekipa Mane no Feto Timor-Leste hodi muda pozisaun Timor Leste nian iha tabela klasifikasaun Xadrez Mundiál.

Ekipa Atleta TL ne’ebé partisipa iha Olimpiade Xadrez Mundiál, iha Índia. Foto/Federasaun.

Helder de Araújo ne’ebé molok Ronda X gaña ona pontu individual 7, iha jogu penúltima tenke ramata jogu ho rezultadu empata.

Lee Mós: Olimpiade Xadrés Mundiál, Ekipa Mane TL Manan Fiji

Iha jogu ne’ebé mak difísil tebes tanba hasoru atleta Martin Djoroge hosi Kenya ho Rating bot liu, Helder atu manán ona jogu, maibé ikus mai tenke empata maske Helder ninia Bishop sei ativu hela.

“Ho rezultadu empata ne’e, Atleta Helder de Araújo gaña ona totál pontu individuál 7,5,” Hatutan.com sita komunikadu.

Iha Jogu seluk hosi Ekipa Mane nian, atleta na’in-tolu seluk la konsege kontribui pontu tanba falla atu hamate liurai hosi oponente durante jogu ne’ebé kuaze lori oras tolu liu. To’o Ronda Penúltima remata, Ekipa Mane kontribui ona totál pontu kumulativu 15.

Iha Jogu Parte Ekipa Feto nian, Atleta ho idade Nurak Sonizia Tilman da Silva forte demais ba ninia oponente ho naran Sasha Christina Shariff hosi nasaun Guyana. Atleta Sonizia obriga ninia oponente rende iha pasu 46.  Ho manán ida ne’e, Sonizia kontribui ona totál pontu individual 5 durante jogu tomak.

Atleta Elfiana dos Santos ne’ebé joga hasoru adversáriu ho naran Anaya Lall kontribui mós pontu 0.5 hafoin empata iha pasu 60.

Ho rezultadu ida-ne’e, atleta Elfiana dos Santos gaña ona totál pontu individuál 3 durante jogu tomak. Atleta feto na’in-rua seluk, ladauk konsege gaña vitória iha jogu mensionadu. Hafoin Ronda Penúltima, atleta feto sira kontribui ona totál pontu kumulativu 12.

Iha observasaun hosi parte Federasaun Xadrez Timor-Leste (FXTL) nian katak, atleta sira kolen demais tanba joga nunka deskansa.

Atleta Tito dos Reis no Elfiana dos Santos ho kondisaun moras maibé obriga-an Joga tanba laiha atleta rezervadu atu substitui. Maski nune’e, espiritu atu manán ho kondisaun saúde la estável nunka menus.

Jogu últimu hosi Olimpiade Xadrez Mundiál nian sei realiza iha Loron 09 Agostu 2022. Jogu naktemin sei hahú iha tuku 10am oras Chennai-Índia, hodi fó espasu ba Serimónia Enseramentu iha parte lorokraik.

Jornalista: Vito Salvadór