Hatutan.com, (09 Agostu 2022), Díli– Inundasaun maka’as akontese iha sidade Seoul, Korea du Súl, Segunda (08/08/2022), hodi rezulta ema na’in-hitu mate, na’in-hitu lakon no uma barak hetan estragu.
Udan ho intensidade forte rezulta inundasaun iha sidade Seoul, Korea du Súl, Segunda (08/08/2022). Foto/The Korea Herald
Udan-been ho intensidade forte rezulta bee sa’e no nalihun iha sidade kapitál Korea du Súl nian ne’e hodi lori estragu maka’as bá fasilidade públiku, inklui karreta lubun bee hoban no sai at hotu.
Inundasaun ne’e perturba total atividade públiku. Repartisaun lubun inklui karreta ho motór bee hoban no la konsege salva. Informasaun ne’ebé Reuters konfirma ho autoridade Meteorolojia Korea (KMA) katak iha Norte Seoul akontese nafatin udan ho intensidade forte. Nune’e, iha Segunda kalan tomak (08/08/2022), rezulta bee-sa’e no ida-ne’e sai hanesan primeira vés akontese iha istória Korea du Súl nian.
Sita husi AFP mós katak inundasaun ne’e rezulta ema na’in-hitu mate, na’in-hitu seluk lakon to’o agora seidauk hetan no uma lubun ho karreta lubun mak hetan estragu.
“Pelumenus ema na’in-hitu mate iha área metropolitana Seoul, na’in-hitu seluk lakon tanba udan ho intensidade maka’as hamosu inundasaun iha tuku 07:30 dadeer Oras Korea nian,” fonte importante ida husi Ministériu Interiór Korea du Súl nian ne’ebé lakohi atu publika nia identidade haktuir bá AFP.
Inundasaun iha Seoul no Norte Gangnam rezulta estragu bá fasilidade públiku no interrompe atividade públiku. Aleinde ne’e, metro (kereta bawah tanah) la bele halo operasaun normal no populasaun lubun tenke evakua hodi salva an hosi inundasaun estrimu iha istória Korea du Súl ne’e.
Kondisaun estrada barak hetan estragu, loja lubuk ida mak udan-been nalihun tama-sai livre loja laran, to’os agrikultór nian barak mak estragu, inklui ai-hun boot sira tohar.
Autoridade sira iha Korea du Súl halo alerta no kontinua fó hanoin bá populasaun sira atu kontinua “matan moris” atu prevene an no família husi dezastre inundasaun ne’e.
Primeiru-Ministru, Han Duck-soo husu bá instituisaun sira relevante atu kontinua halo prevensaun no buka solusaun emerjénsia hodi responde nesesidade populasaun vítima inundasaun sira-nian, inklui halo prevensaun bá estragu sira iha fatin sira ne’ebé risku inundasaun.
Autoridade Meteorolojia Korea (KMA) nian fó sai alerta udan ho intensidade boot no maka’as iha sidade kapitál Korea du Súl, inklui iha sidade Portu Incheon no Provínsia Gyeonggi Norte.
Fonte : Reuters/AFP