Hatutan.com, (10 Agostu 2022), Díli—Vítima ne’ebé lakon vida ka mate iha inundasaun ne’ebé akontese iha Korea du Súl to’o Kuarta (10/08/2022), aumenta ona bá na’in-sia (9).

Lee Mós : Inundasaun iha Seoul, Na’in-Hitu Mate no Na’in-Hitu Lakon

Vítima na’in-sia (9) ne’ebé lakon vida ne’e kompostu husi na’in-lima (5) iha sidade Seoul, na’in-tolu (3) iha Provínsia Gyeonggi no na’in-ida (1) iha Provínsia Gongwon, Korea du Súl.

Embaixadór Timor-Leste bá Korea du Súl, Gregorio de Sousa. Foto/Espesiál

Embaixadór Timor-Leste nian iha Korea du Súl, Gregorio de Sousa, bá Hatutan.com, liuhosi messenger konfirma katak  to’o oras ne’e  embaixada seidauk simu informasaun ruma husi responsavel traballadór sira ho estudante timoroan sira  iha Korea du Súl iha problema ruma kona-bá sira relasiona ho inundasaun ne’ebé akontese iha Segunda (08/08/2022).

“Ami sei buka tan informasaun hodi informa ba ita-boot sira,” Embaixadór  Gregorio de Sousa hateten.

Daudaun ne’e timoroan liu rihun tolu (3000-liu) mak sai hanesan traballadór no balun estuda iha universidade sira iha Korea du Súl  nian.

Udan ho intensidade forte ne’ebé rezulta inundasaun  iha kapitál Korea du Súl, inklui Provínsia Gyeonggi ho Provínsia  Gongwon,  halo servisu públiku barak mak taka, maibé ohin komesa hahú fali servisu no liña metro Seul komesa lao normal fali ona. Hanesan mós estrada sira iha mota ibun komesa loke fali ona bá transporte sira maibé autoridade sira husu bá motorista sira lao ho kuidadu.

Autoridade sira husi Ministériu Interior no Seguransa  Korea du Súl nian haktuir bá CNN katak vítima hirak ne’ebé lakon vida ka mate tanba la konsege sai husi basement iha rai okos ne’ebé nakonu ho bee.

Vítima seluk mak hanesan inan-feto ida mout iha ninia uma iha área Dongjak no seluk fali mate tanba eletrisidade mak soke, inklui balun mate tanba moru sira monu hanehan vítima sira.

Hosi sorin seluk, vítima kanek hamutuk na’in-sia (9) no na’in-neen (6) lakon to’o agora buka seidauk hetan. Inundasaun ne’e mós rezulta kortés liña eletrisidade no obriga ema ua’in tenke evakua bá fatin seguru.

Faktu Sira Kona-bá Inundasaun

Inundasaun iha Korea du Súl, Segunda (08/08/2022). Foto/Espesiál

Tuir mai faktu sira ne’ebé detikcom rekolla husi publikasaun media internasionál sira kona-bá inundasaun iha Korea du Súl:

1. Udan ho Intensidade Maka’as
Sita husi ajénsia notísia Yonhap, udan ho intensidade maka’as akontese iha Korea du Súl inklui sidade Seoul dezde Segunda (08/08/2022). Udan been to’o 100 milímetru kada oras. Ne’e hanesan udan boot liu ona dezde tinan 80 nia laran ikus ne’e.

Udan been kada oras iha Distritu  Dongjak, Seoul, boot liu 141,5 milímetru iha pontu dahuluk. Númeru ne’e hanesan udan ho intensidade maka’as no boot akontese iha Korea du Súl desde kedas tinan 1942 liubá.

Autoridade Meteorolojia Korea (KMA) informa katak  iha área Norte Seoul  nian simu udan been purvolta 100 mm kada oras iha Segunda kalan (08/08/2022). Udan ho intensidade maka’as iha tinan ida ne’e nia laran.

Informasaun balun hatudu mós katka iha loron tuir mai Tersa (09/08/2022), akumulasaun udan been to’o 420 milímetru.

KMA mós halo alerta akontese udan boot iha sidade kapitál Korea du Súl  ho sidade portu norte Incheon, inklui Provínsia Gyeonggi ne’ebé nia área hale’u Seoul ho Provínsia Gangwon Norte.

2. Transporte Paradu no Eletrisidade Mate Total

Inundasaun ne’e halo Kereta iha rai okos inklui trnasporte sira iha rai leten paradu total no liña eletrisidade sira la funsiona no mate total. Estasaun kareta iha rai okos inklui estrada sira iha sidade Seoul bee nalihun maka’as.

3. Ema Mate

Informasaun to’o oras ne’e kobre ona vítima inundasaun na’in-sia (9) lakon vida, kanek na’in-sia (9) no na’in-neen (6) seluk to’o agora seidauk hetan sira nia paradeiru.

4. Korea du Norte Loke Barrajen   

Inundasaun ida-ne’e kontribui direta mós husi Korea du Norte tanba loke barrajen hodi halo bee suli livre husi Norte bá Súl.

“Iha tempu udan boot iha Korea du Norte dala ua’in loke no taka oda-matan bee nian iha barrajen Hwanggang,” haktuir fonte ofisial ida husi Ministériu Unifikasaun  Korea du Súl bá Ajensia Notisioza Korea du Súl, Yonhap.

5. Trending iha Twitter
Inundasaun iha Korea du Súl ne’ebé kuaze hoban tomak sidade ‘Seoul’ ho ‘Gangnam’ sia mós trending topic iha Twitter. Video ho fotografia lubun ho ángulu viral iha sosiál media (SosMed).

Jornalista : Vito Salvador