Hatutan.com, (09 Agostu 2022), Díli- Asosiasaun Ema Afeta Lepra (AEAL) rejistu ema ho moras lepra ás iha Munisípiu Dili, Baucau, Manatuto ho Rejiaun Espesiál Oé-Cusse Ambeno (RAEOA).

Asosiasaun Ema Afeta Lepra (AEAL) enkontru ho PR José Ramos-Horta iha Palásiu Prezidensiál, Tersa (09/08/2022). Foto/Media GPR

Liuhusi sorumutuk ho Prezidente Repúblika (PR), José Ramos-Horta, iha Palásiu Prezidensiál, Tersa (09/08/2022),  Asosiasaun Ema Afeta Lepra informa bá Xefe Estadu situasaun ema ne’ebé afetadu moras lepra iha Timor-Leste, liu-liu liga bá sira nia moris no liga bá kondisaun ne’ebé sira enfrenta durante sira nia etapa tratamentu no mós area ne’ebé sai alvu  ho númeru moras lepra ás iha Timor-Leste.

 “Kona-bá númeru sira ne’e AEAL seidauk iha dadus ne’ebé kompletu, entaun maioria kazu ka ema ne’ebé mak afeta moras lepra sira rasik mak hatudu an no bá iha sentru saúde sira,” diretór AEAL, Joel Costa dos Santos haktuir bá jornalista sira.

Tratamentu bá pasiente ka ema sira moras lepra sira tenke hemu pakote ai-moruk ida naran DT tinan ida, maibé tanba ladún hetan esplikasaun ne’ebé adekuadu, nune’e maioria pasiente sira ne’ebé afeta moras lepra ne’e barak mak drop out.

Polítika organizasaun ne’e nian mak hanesan organizasaun ne’ebé tau matan bá ema ne’ebé afeta lepra no AEAL garantia katak sei laiha diskriminasaun tan ema afeta lepra.

AEAL servisu hamutuk ho Ministériu Saúde hanesan ema afeta lepra no AEAL informa bá ekipa husi Ministériu Saúde nian hodi tulun oinsá Ministériu Saúde ba programa konseling lori fila ema afeta moras lepra mai halo tratamentu.

Prezidente Repúblika (PR) José Ramos-Horta sei halo aproximasaun ho Ministériu Saúde no Organizasaun Mundiál Saúde (OMS) atu halo kampaña bá prevensaun  moras lepra iha Timor Leste.

Asosiasaun Ema Afeta Lepra (AEAL)  estabelese iha tinan 2019 no foin hetan legalidade iha fulan-Abríl tinan 2022.

Jornalista: Vito Salvadór