Hatutan.com, (11 Agostu 2022), Díli– Atu sustenta makina Estadu no halo dezenvolvimentu iha Timor-Leste, VIII Governu ne’ebé lidera hosi Taur Matan Ruak, sei hahú halo investimentu sériu iha setór produtivu sira, liuliu iha área agrikultura, turizmu no investimentu seluk ne’ebé sei esplora tuir planu dezenvolvimentu sustentavel.

Primeiru Ministru (PM), Taur Matan Ruak akompaña husi Ministru Justisa, Tiago Amaral Sarmento, kolleta kafé iha Postu Administrativu Railaco, Munisípiu Eremera,Kuarta  (10/08/2022). Foto/Media GPM

Primeiru Ministru (PM), Taur Matan Ruak, hateten Governu iha esforsu rua ne’ebé halo daudaun atu diversifika ekonómia hodi la depende ba fundu mina-rai.

Nia afirma oras ne’e Governu hahú ho reabilitasaun bá kafé ne’ebé Governu hahú tau matan ho apoiu husi Prezidente Repúblika.

Timor Leste halo ona lansamentu inisiál ba reabilitasaun kafé ne’ebé ho prezensa Xefe Estadu nian iha Munisípiu Ermera, Postu Administrativu  Railaco no iha semana ne’e nia laran reuniaun ona ho ministériu relevante sira, liu-liu Ministériu Agrikultura no Peskas (MAP), hamutuk ho Vise-Ministru MAP, Diretór Jerál sira ho ekipa tékniku hotu no reprezentate husi Palasiu Prezidensiál para haree opiniaun hosi empreza no asosiasaun no kooperativa agrikultór sira hodi rona sira-nia opiniaun direita.

“Governu halo hela analiza bá dokumentasaun sira ne’ebé iha, no tuir mai iha parte téknika Governu sei haree saida mak tenke halo liu-liu iha Governu nia parte bá reabilitasaun kafé Governu tau osan boot kuaze millaun  $6,7 no estimasaun katak osan ida ne’e sei bele kobre atu halo reabilitasaun ba 10 mill hektares kafé iha territóriu nasionál,”  Taur Matan Ruak  hateten bá jornalista sira hafoin hasoru malu ho Prezidente Repúblika, José Ramos-Horta, Kinta (11/08/2022), iha Palásiu Prezidensiál.

Governu hanoin katak tenke halo exersisiu ida halo nusa para progressivamente atu bele responde ba preokupasaun sira ne’e. Problema sira seluk hanesan estrada no mudansa klimátika bele influénsia mós produsaun kafé.

“Atu antesipa inflasaun gloval Governu tenke aumenta mós protividade tanba Timor-Leste ninia protividade kiik no kuaze depende bá rai li’ur no impaktu sasán karun,”  Taur hateten.

Xefe Governu ne’e hatutan alternativu seluk ne’ebé seriu mak Greater Sunrise no oras ne’e daudaun iha Suai halo ona perfurasaun bá posu tolu maske iha ida deside taka hikas tanba la hatudu sinais di’ak, maibé posu rua seluk hanesan posu potensiais.

Empreza esploradór halo hela preparasaun másimu hodi halo perfurasaun bá mina matan iha Same no Governu mós hanoin ona hodi halo esplorasaun bá bloku seluk ne’ebé identifika iha area petroliferu nian.

Jornalista: Vito Salvadór