Hatutan.com, (14 Agostu 2022), Díli– Tribunal Distritál Dili (TDD), Domingu (14/08/2022),  hala’o  interrogatóriu dahuluk bá arguidu na’in-sia (9) ne’ebé envolve iha kazu ilísitu bá dorga.  

Lee Mós : Ekipa Konjunta Detein Suspeitu Sira Sindikatu Droga, Mesak Sivilizadu Nia Oan

Ilustrasaun Kazu Droga. Foto/Foti hosi Google

Arguidu na’in-sia (9) ne’ebé ekipa konjunta kompostu hosi Polísia Sientífika Investigasaun Kriminál (PCIC), Servisu Nasionál Intelijénsia (SNI)   ho  Servisu Sekretu FALINTIL-Forsa Defeza Timor Leste (F-FDTL) hosi J2  identifika no kaptura iha loron rua tuituir malu iha idak-idak nia horik fatin iha Díli laran, Kinta-Sesta (11-12/08/2022), ho inisiál DGS, MM, B, MAA, AY, SSO, M, CRM ho J.

Audiénsia interrogatóriu bá dahuluk ne’ebé prezide hosi Juiz singular José Gonçalves, Ministériu Públiku (MP) ne’ebé reprezenta hosi Prokuradór Rogério Viegas, akuza arguidu sira ho krime ilísitu bá droga ne’ebé previstu iha artigu 7  Kódigu Penal (KP) Timor Leste.   

Liuhosi prosesu interrogatóriu dahuluk ne’e  Tribunál konsege halo identifikasaun ba arguidu na’in-lima no falta arguidu na’in-haat ne’ebé sei kontinua rona iha Segunda (15/08/2022).

Rona tiha deklarasaun hosi arguidu sira, Juiz José Gonçalves, deside adia hikas julgamentu bá Segunda dadeer (15/08/2022), hale’u tuku 10:00 Otl, hodi kontinua rona deklarasaun arguidu na’in-haat seluk molok submete bá alegasaun no desizaun.

“Seidauk iha desizaun bá arguidu sira tanba Tribunál adia fali julgamentu  bá Segunda (15/08/2022),” Defensor Públiku, Estaqui Guterres ne’ebé fó asisténsia legal bá arguidu sira hateten bá jornalista sira hafoin prosesu interrogatóriu dahuluk iha TDD.

 Ekipa konjunta kompostu hosi Servisu Nasionál Intelijénsia (SNI), Ekipa intelijénsia J2 FALINTIL-Forsa Defeza Timor Leste (F-FDTL), ho Polísia Sientífika Investigasaun Kriminál (PCIC)    konsege deskobre suspeitu na’in-sia (9) ne’ebé deskonfia envolve iha aktu ilísitu tranzasaun droga.

Informasaun ne’ebé  Hatutan.com asesu hosi fonte sekreta haktuir katak tempu ne’ebá ekipa konjunta forma estratéjia operasaun intelijénsia hodi rekolla informasaun hosi fonte oioin no ikus konsege kaptura no detein suspeitu ida ho inisiál J iha fatin rua tanba suspeitu ne’e asegura hela evidénsia droga ho tipu hasis ka ganja.

Ekipa konjunta lori kedas suspeitu ne’e hodi halo identifikasaun nune’e bele dezenvolve di’ak liután rede ka sindikatu envolvimentu hosi suspeitu sira seluk tan.

Hosi identifikasaun ne’e, fonte sekreta ne’e haktuir, konsege rekolla informasaun komplementariu no buka tuir kedas suspeitu ida tan hela iha  área Delta-II no konsege kaptura suspeitu hodi halo mós buska iha suspeitu nia fatin hodi rekolla mós prova dorga  ho tipu hasis ka ganja  ne’ebé suspeitu sempre fa’an.

Hosi suspeitu ida ne’e, ekipa konjunta dezenvolve tan investigasaun no identifikasaun. Nune’e, iha loron tuir mai, Sesta (12/08/2022), ekipa konjunta buka tuir informasaun kona-bá tranzasaun droga ne’e no tempu ne’ebá ekipa konjunta halo operasaun iha área Bairru Grillos hodi detein tan suspeitu ho inisiál SSOCL no hetan mós prova krime hanesan droga ho modelu xokolate ka hasis ne’ebé suspeitu ne’e rai iha nia kuartu laran.

Ekipa konjunta kontinua dezenvolve investigasaun no deskobre na’in bá droga  ne’ebé hela iha área Pantai Kelapa.  Nune’e, ekipa halo buska no konsege rekolla  evidénsia hanesan pipeta ne’ebé suspeitu sira sempre utiliza hodi administra droga ho tipu sabu-sabu no droga xokolate ka hasis 1/5.

Ekipa konjunta lori kedas evidénsia sira ne’e hamutuk ho suspeitu buka tuir suspeitu ho inisiál MAA  iha área Palapasu, Díli.

Fonte sekreta ne’e konta tuir katak bainhira ekipa konjunta to’o iha suspeitu MAA nia hela fatin nia sei toba hela no konsege rekolla prova droga ho tipu sabu-sabu grama 0,50 no hetan mós osan ho montante $4,139.25. Osan  sira-ne’e, parte ekipa konjunta deskonfia nu’udár rezultadu hosi tranzasaun droga durante ne’e.

Hosi investigasaun bá suspeitu MAA deskobre hikas suspeitu seluk ho inisiál MSGS ne’ebé fortifika ekipa konjunta nia deskonfiansa hodi halo mós detensaun no kapturasaun bá suspeitu MSGS iha área Farol.

Hosi suspeitu MAA nian hetan mós evidénsia hanesan plástiku guarda sabu-sabu, metavitamina plástiku mutin ida ho grama 1,0 no osan ho montante Rp.4,139.000.

Ekipa konjunta deskobre mós suspeitu seluk ho inisiál AY no bainhira halo detensaun konsege foti mós evidénsia hanesan pipeta  ida, hasis ida ne’ebé uza tiha ona. Hosi fali suspeitu seluk ho inisiál SSOCL konsege foti mós evidénsia hasis plástiku rua.

Jornalista : Carmelita Isaac