Hatutan.com, (11 Agostu 2022), Díli-Komisaun Anti-Korrupsaun (CAC, sigla portugés) submete ona relatóriu investigasaun final bá Ministériu Públiku (MP) kona-bá kazu instalasaun  projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P), ne’ebé CAC mós deskobre katak iha indísiu fó prejuizu bá Estadu.

Lee Mós : CAC Identifika Arguidu Na’in-haat Bá Projetu Instalasaun Set-top Box RTTL,E.P

Set-top Box RTTL,E.P fahe no rai de’it iha komunidade nia uma iha Becora, Dili, 27 Janeiru 2022. Foto/dok.Hatutan.com

Prokuradoria Jerál Repúblika (PGR, sigla portugés), Alfonso Lopes hateten, relatóriu investigasaun hosi CAC nian bá PGR simu ona, maibé sei  iha hela ferias judisiáriu.

“Bainhira simu ona iha adjunta, relasiona ho informasaun ka  relatóriu investigasaun, maibé ha’u seidauk bele ko’alia, tanba sei iha ferias judisiáriu,” PGR Alfonso Lopes, responde  ba Hatutan.com bainhira partisipa serimónia inaugurasaun Sentru Integradu Jestaun Informasaun bá Investigasaun Kriminál no Informátika Teknolojia iha Kuartél Jerál PNTL, Díli, Kinta (11/08/2022).

Iha sorin seluk, Diretór Investigasaun CAC José Verdial hateten, Ministériu Públiku (MP) de’it maka hatene prosesu ne’e, to’o ona iha ne’ebé tanba CAC nia knar maka halo de’it investigasaun no hato’o relatóriu rezultadu investigasaun bá MP.

“MP maka hatene, tanba knar hosi CAC maka halo investigasaun no relatóriu rezultadu bá MP, maibé kuandu to’o ona iha ne’ebá ami atu hatene prosesu ne’e bainhira iha ona akuzasaun ka seidauk maka ami foin hatene iha Tribunál, tanba tuir lei prosesu penal MP laiha obrigasaun atu hato’o fali bá CAC katak prosesu ne’e to’o ona iha ne’ebé atu arkiva ka  lae ne’e ita lahatene to’o iha ne’ebé,” José Verdial tenik.

Lee Mós : MAPKOMS La Fó Komentáriu Kona-bá Kazu Projetu Instalasaun Set-top Box RTTL,E.P

Hosi konteúdu relatóriu, CAC konsege identifika prejuizu direta bá Estadu ho montante $7,680.00 ne’ebé identifikadu liuhosi Set Top Box hamutuk 256 ne’ebé kompañia indikadu DILI ETERNAL INNOVATION INFORMATION, Lda, seidauk halo instalasaun, maibé prejuizu ne’e sei aumenta makas bainhira kontinua halo inspesaun no kontinuasaun bá benefisiáriu hirak ne’ebé simu ona STB iha suku besik atus ida resin iha Munisípiu lima hanesan Díli, Aileu, Ermera, Liquiça no Bobonaro, tanba STB barak maka seidauk halo instalasaun no benefisiáriu rasik maka halo instalasaun la’ós kompañia no prejuizu indireta seluk ne’ebé Estadu sofre hamutuk $674,581.7 no prejuizu ida ne’e hetan bainhira halo komparasaun entre estimasaun kustu ba instalasaun STB ne’ebé halo hosi RTTL.EP ho valor $225.400 ho valor kontratu ba projetu ne’ebé maka asina husi MAPCOMS no kompañia DILI ETERNAL INNOVATION INFORMATION (DEII) Lda ho valor $899.981.70.

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nu’udár sósiu hosi Melánia da Silva Fernandes Capela, ne’ebé tempu ne’ebá asume knaar Sekretaria iha Gabinete Prezidente FFTL.

Lee Mós :  CAC Identifika Projetu Instalasaun Set-top Box RTTL,E.P Fó Prejuízu Bá Estadu $682,261.00

 Jornalista : Carmelita Isaac