Hatutan.com, (15 Agostu 2022), Díli—Prezidente Repúblika (PR), José Ramos-Horta konsidera The Association of Southeast Asian Nations (ASEAN) sai hanesan organizasaun rejionál ne’ebé sei sai parseiru boot ba nasaun hotu-hotu hodi promove pás no estabilidade ba mundu.

Serimónia aniversáriu ASEAN ba dala 55 iha Embaixada Tailândia, Motael, Segunda (15/08/2022). Foto/Hatutan.com.

Kriasaaun ba ASEAN hahú iha Bangkok, Thailándia ne’ebé hanaran Bangkok Declaration ho membru atuál 10 iha Audeste Aziátiku no espera katak iha tempu badak, bele iha tinan ida ne’e ka iha tinan foun mai, Timor Leste bele sai membru ASEAN ba dala-XI.

Lee Mós:Kambodia Garante Adezaun TL Bá ASEAN iha 2023

Kondisaun hotu-hotu atu adere ba ASEAN, Timor Leste kumpri ona iha tinan lubuk ida nia laran la’ós 100% maibé kondisaun ne’ebé Timor kumpri haree hosi TL nia dezenvolvementu iha setór ekonómiku, infraestrutura, no Rekursu Umanus inklui esperiénsia internasionál sira ne’ebé Timor Leste iha, liu-liu iha organizasaun internasionál Nasoens Unidas, G7+ no mós TL lidera parte internasionál balun liga ho mudansa klimátika.

Hosi sira ne’e hotu Timor Leste hatudu ona nia esperiénsia hamutuk ho rai sira ASEAN nian ne’ebé durante tinan 20 apoia Timor Leste no kada nasaun apoiu tuir sira nia kondisaun ne’ebé iha.

“ASEAN sai paraseiru boot ba nasaun hotu-hotu iha mundu, hanesan Estadus Unidus, Índia, Xina, Rúsia no sira seluk, ne’ebé sai parseiru diálogu ASEAN nian. Ne’e hatudu nasaun X ASEAN nian manán influénsia prestizu boot,” Ramos-Horta hateten hafoin partisipa iha serimónia aniversáriu ASEAN ba dala 55 iha Embaixada Tailândia, Motael, Segunda (15/08/2022).

Xefe Estadu fó Parabens ba ASEAN ne’ebé iha momentu difísil tebtebes no iha situasaun “guerra fria” no problema oi-oin iha pais membru sira, ASEAN nu’udár organizasaun rejionál konsege sai ho JDP $4 trrilliun mesmu sei nafatin hasoru difikuldade iha movimentu sira.

Iha fatin hanesan Embaixadór Thailándia iha Timor Leste Ekapol Poolpipat hamutuk ho nasaun membru sira seluk ne’ebé hala’o misaun ASEAN iha Timor Leste kongratula governu no povu Timor Leste ba selebrasaun tinan 20 restaurasaun indepedénsia no sira apresia Timor Leste nia atinjimentu ba dezenvolvimentu no rezilénsia hodi promove pás no estabilidade ba dezenvolvimentu nasionál.

Aproveita oportunidade ida-ne’e, iha komemorasaun tinan 55 ASEAN nian, Embaixadór ne’e kongratula atinjimentu nasaun membru ASEAN sira hodi enfrenta pandemia Covid-19 ho di’ak hodi asegura populasaun sira hosi pandemia global ida-ne’e.

Kongratula mós susesu ba realizasaun misaun ASEAN nian ba Timor Leste hodi avalia Timor Leste nia preparasaun ba adezaun, iha seitór importante sira hanesan ASEAN Socio-Cultural Community (ASCC) no ASEAN economic community (AEC) ne’ebé realiza iha fulan Jullu liu ba, no mós ASEAN Political-Security  Community ne’ebé halo iha Setembru 2019.

“Ami hotu nasaun membru ASEAN nian iha komitmentu atu nafatin buka dalan hodi fó asisténsia no kapasitasaun ba Timor Leste iha preparasaun adezaun ba ASEAN,” Ekapol Poolpipat hateten.

Embaixadór Tailândia ne’e hatutan Xefe Estadu Timor Leste louva atinjimentu ne’ebé ASEAN iha durante tinan 55 iha nia istória tomak hodi promove pás no estabilidade iha rejiaun Sudeste Aziátiku no Xefe Estadu apresia ho saida mak nasaun membru ASEAN sira halo hodi apoia Timor Leste nia adezaun ba ASEAN liu-liu iha kapasitasaun no hein katak sei iha rezultadu pozitivu liga ho avaliasaun sira ne’ebé ASEAN halo ba Timor Leste, nune’e Timor Leste nia adezaun ba ASEAN lalais liu tán.

Ministra Negósiu Estranjeiru no Kooperasaun, Adaljiza Magno hateten foin dadaun ne’e ba iha Cambodia iha Asia Rejionál forum no mós iha reuniaun Ministru Negósiu Estranjeiru países ASEAN nian no Primeiru Ministru Cambodia nia halo ona anunsia katak sira iha intensaun atu formaliza Timor Leste nia adezaun ba iha ASEAN Tinan oin.

Aproveita mós oportunidade ne’e hodi hato’o Parabéns ba loron aniversáriu ASEAN nian ba dala 55, espera katak ida-ne’e tinan ikus Timor Leste partisipa hanesan la’ós membru no espera katak tinan oin Timor Leste partsispa hanesan ona membru plenu direitu ba ASEAN nian.

Jornalista: Vito Salvadór