Hatutan.com, (15 Agostu 2022), Díli— Governu liu hosi Ministériu Justisa (MJ) hatun despaixu despezu administrativa ba rai Estadu ne’ebé lokaliza iha Bebobonuk no antes ne’e okupa hosi Acacio da Costa Guterres, tanba rai ne’e Governu selebra ona kontratu arrendamentu ho Jape hodi halo investimentu.

Sekretáriu Estadu Terras no Propriedade (SETP) hamutuk ho Polísia Nasionál Timor Leste (PNTL) no apoiu hosi guarda Munisipiu Díli, ezekuta depaixu despezu administrativa hodi hamamuk rai Estadu ne’ebé lokaliza iha Bebonuk, hodi hasai okupante Acacio da Costa Guterres ho nia família, (10/08/2022). Foto/Hatutan.com.

“Estatutu juridiku rai ne’e hanesan domíniu públiku Estadu nian. Nune’e, iha situasaun rua nia laran primeiru iha tinan hirak liu ba Governu halo ona akordu arrendamentu ho Jape tanba tuir akordu ne’e Governu tenki entrega ona rai ne’e ba Jape, maibé se la entrega Jape bele reklama,” Ministru Justisa, Tiago Amaral Sarmento hateten ba Hatutan.com iha knaar fatin, Segunda (15/08/2022).

Lee Mós:SETP Hasai Okupante Rai Estadu Iha Bebonuk

Tanba ne’e, bainhira Jape halo reklamasaun sei prezudika buat balun ba Governu, no segundu antes ne’e okupante Acasio da Costa Guterres konsege lori kazu ne’e ba Tribunál ho desizaun afavór ba Estadu katak, rai ne’e partense ba Estadu, no despaixu despezu administrativa ne’e tanba Governu halo ona kontratu ho Jape.

Antes ne’e, iha loron 10 Agostu tinan ne’e, Sekretáriu Estadu Terras no Propriedade (SETP) hamutuk ho Polísia Nasionál Timor Leste (PNTL) no apoiu hosi guarda Munisipiu Díli, ezekuta depaixu despezu administrativa hodi hamamuk rai Estadu ne’ebé lokaliza iha Bebonuk, hodi hasai okupante Acacio da Costa Guterres ho nia família.

Maski okupante Acacio da Costa Guterres laiha fatin, maibé ekipa hasai direitamente sasan uma laran okupante sira nian hanesan armari, kama, kadeira, meza, inklui sasan sira seluk no husu familia okupante ne’ebé hela iha fatin ne’e atu sai, tanba konsidera rai ne’e pertense ba Estadu nian.

Jornalista: Carmelita Isaac