Hatutan.com, (16 Agostu 2022), Díli—Vise-Ministru Interiór, António Armindo fó-sai ona katak, konstrusaun ba projetu edifísiu Polísia Nasionál Timor Leste (PNTL) Eskuadra Ai-mutin sei hahú iha fulan Agostu nia rohan.

Edifísiu Eskuadra PNTL Ai-mutin. Foto/Hatutan.

Projetu ne’e Primeiru Ministru (PM), Taur Matan Ruak rasik mak ‘hakarak’ aselera tanba oras-ne’e kondisaun edifísiu hahú aat ona.

Lee Mós: Ministériu Interiór Propoin Millaun $68 Iha OJE 2023

“Orientasaun Primeiru Ministru nian katak, projetu ida ne’e, ita tenke halo, tenke hahú ona, labele dada hanesan ne’e, ne’e oras ida, ema hanoin dehan katak, projetu ne’e iha tiha ona, temi hela de’it, mais la halo konstrusaun. Ami hanoin katak, molok fim de Agostu ne’e, ita bele hahú halo ona konstrusaun,” António Armindo hateten iha rezidénsia PM, Faról, Tersa (16/08/2022).

To’o oras-ne’e, projetu konstrusaun Eskuadra Ai-mutin, seidauk hahú konstrusaun tanba kontratu ne’e sei iha PM ninia gabinete, tanba sei hein CPV ne’ebé mak prodús hosi Conselho Administração Fundo Infra-estrutura (CAFI).

Foin lalais ne’e, parte CAFI mak lori ba entrega iha gabinete primeiru ministru nian hodi hein atu asina kontratu, nune’e kompañia ne’ebé mak manán bele hahú ona halo servisu konstrusaun ba edifísiu eskuadra Ai-mutin, Postu Administrativu Dom Aleixo.

Konstrusaun ba edifísiu Eskuadra PNTL Ai-mutin ne’e, kompañia rua mak manán hodi halo joint venture, ida nasionál ida internasionál.

Maibé, naturalmente, Ministru Interiór mak tenke ofisializa ho ninia asinatura, molok kompañia sira hahú implementasaun.

“Kompañia ne’e ha’u la lembra, mais dokumentus ne’e iha exelénsia ninia gabinete, karik iha tempu maka bele asesu atu bele hatene,” António Armindo hateten.

Orsamentu ba konstrusaun edifísiu eskuadra PNTL Ai-mutin ne’e ho totál millaun $1,7.

Jornalista: Rogério Pereira Cárceres