Hatutan.com, (22 Agostu 2022), Díli-Ministériu Justisa (MJ) hahú halo preparasaun hodi forma komisaun konjunta ida atu bele kontrola rai no uma Estadu sira ne’ebé mak durante okupa hosi sidadaun sira.

Lee Mós : Empreza Estranjeiru Aproveita no Arrenda Tutan Rai ho Uma Estadu

Komisaun Konjunta ne’e sei envolve mós autoridade kompetente sira, inklui mós Komisaun Anti-Korrupsaun (CAC, sigla protugés).

Ministru Justisa (MJ), Tiago Amaral Sarmento. Foto/Hatutan.com

Iha Segunda (22/08/2022), Ministru Justisa (MJ), Tiago Amaral Sarmento, foti inisiativa hodi konvoka ona reuniaun primeiru  ho CAC,  Servisu Migrasaun (SM), Sekretária Estadu Formasaun Profisionál no Empregu (SEFOPE), ho SERVER, iha Salaun ministériu justisa, Caicoli, Dili, hodi diskute no konsulta ideia formasaun komisaun ida-ne’e atu bele kontrola rai ho uma Estadu nian iha territóriu nasionál.

“Konvida sira atu hamutuk harii komisaun konjunta ida. Komisaun konjunta ida-ne’e sei tau matan, tun direta atu halo abregasaun, atu relata kona-bá situasaun jurídika, situasaun loloos arrendamentu bá arreditáriu sira durante ne’e tuir relatóriu hosi Gabinete Inspesaun Auditoria katak, iha atividade balu ne’ebé hamosu tiha ona irregularidade,” Ministru Justisa (MJ), Tiago Amaral Sarmento, hateten ba jornalista sira hafoin sorumutuk ne’e.

Ekipa konjunta ne’e sei estabelese ninia termu referénsia ka SOP ida depois sei hatuur uluk ho diploma legál ida, no sei hamutuk haree ba asuntu arrendamentu nian iha territóriu TL.

Inisiativa ba harii komisaun konjunta ida ne’e, tanba hosi Gabinete Inspesaun no Auditoria (GIA) iha MJ, ho CAC nian, iha konklui ne’ebé mak hanesan katak, mosu indikasaun forte bá pesoál ka empreza balun utiliza rai ho uma Estadu fó aluga fali bá terseira parte ka parte seluk ne’ebé laiha koñesimentu huso Governu.

Komisaun Konjunta ida ne’e parte Servisu Migrasaun, sei tau matan bá sidadaun estranjeiru sira, SEFOPE haree kona-bá traballadór sira, SERVER haree kona-bá lisensa nian, no parte Sekretária Estadu Terras no Propriedade (SETP), atu haree kona-bá folin hosi arrendamentu rai nian bá iha arrendatáriu sira.

Deteta Irregularidade 85 hosi Arrendatáriu Sira

Tuir relatóriu hosi Gabinete Inspesaun no Auditoria (GIA), deteta irregularidade hamutuk 85 hosi  arrendatáriu sira ne’ebé mak okupa rai ho uma Estadu nian.

“Hothotu, iha fulan-tolu ka haat nia laran ne’e, bainhira hosi ekipa gabinete inspesaun no auditoria halo, kuaze 85 hanesan ne’e maka la kumpre ninia devér kontratu ne’ebé selebra ona ho Governu, iha tipu oioin. Ne’e oras ida ita-boot sira sei hatene,” Ministru Justisa hateten.

Iha relatóriu ne’ebé relata hosi GIA mai  iha balu kuaze 5 ka 6 hanesan ne’e, kompañia boot, empreza boot mak halo ida ne’e. No bainhira halo tiha notifikasaun bá sira, mais sira nunka rona notifikasaun hosi Ministériu Justisa.   Nune’e,  Gabinete Inspesaun no Auditória iha kompeténsia halo abregasaun baáasuntu ida ne’e, relata bá Ministru Justisa kona-bá medida saida mak bele foti.

“Tanba ne’e, ami konvida mós sira. No iha indikasaun ruma, konvida mós CAC para hodi halo prevensaun no CAC di’ak liu hamutuk, direta para depois haree, karik iha indikasaun buat ruma, husu bá CAC  hlao investigasaun kle’an liután para atu bá  oin ne’e halo nusá. Tanba ne’e mak hosi reuniaun ida ne’e, hamosu ideia ida hamutuk atu harii komisaun konjunta ne’e,” Ministru Tiago Amaral Sarmento hateten.

Jornalista: Rogério Pereira Cárceres