Hatutan.com, (26 Agostu 2022), Díli—Vise Xefe Estadu Maior Jenerál FALINTIL-Forsa Defeza Timor Leste (F-FDTL), Maijór Jenerál Calistro dos Santos “Coliate” konsidera kondekorasaun Estadu Timor Leste ho órden Méritu de Timor ba Jenerál reformadu Indonézia Hendropriyono, nu’udár forma estratéjiku ne’ebé líder sira foti atu garante estabilidade polítika, ekonómika ba futuru Timor Leste nian.

Vise Xefe Estadu Maior Jenerál FALINTIL-Forsa Defeza Timor Leste (F-FDTL), Maijór Jenerál Calistro dos Santos “Coliate”. Foto/Média PR.

Maijór Jenerál Calistro dos Santos “Coliate”  rekoñese katak, kondekorasaun ba Jenerál reformadu Indonézia Hendropriyono sai preokupasaun hotu-hotu nian, inklui nia rasik, hanesan Timoroan hotu-hotu preokupa, tanba presiza esklaresimentu hodi klarifika dúvida sira-ne’e.

Lee Mós: ANTI Kontra Kondekorasaun ba Jenerál Reformadu Hendropriyono

Tanba ne’e, nia dehan Xefe Estadu Maiór F-FDTL Tenente Jenerál Falur Rate Laek esklarese detalladu  iha GMN TV kona-bá pensamentu saida mak lori forsa armada konvida Jenerál Reformadu Indonézia Hendropriyono mai partisipa iha serimónia loron FALINTIL ba dala 47 no simu mos medalla órden de méritu hosi Estadu Timor Leste.

Programa kondekorasaun ne’e mós iha konsentimentu hosi Xefe Estadu, hanesan Komandante Supremu Ezérsitu, nia fó nia konsentimentu nune’e nia rasik prontu hodi atribui kondekorasaun ba Hendropriyono.

“Bainhira ko’alia kona-bá futuru la depende de’it ba Timor Leste. Timor Leste depende ba fatór esternu, depende ba ita nia viziñu sira, liu-liu Austrália ho Indonézia ne’ebé forma estratéjiku líder sira foti atu garante estabilidade polítika, ekonomia ba futuru oan sira iha rai ida ne’e ninian,” Maijór Jenerál Calistro dos Santos “Coliate” hateten hafoin hasoru Prezidente Repúblika, José Ramos-Horta iha Palasiu Prezidensiál Nicolau Lobato Bairru Pité, Sesta (26/08/2022).

Kondekorasaun ba Jenerál reformadu Indonézia Hendropriyono ne’e kestaun estratéjiku ne’ebé Komandante ida nia tenke haree, tanba ida ne’e mós parte ida hosi kestaun estratéjiku militár ninian no apoia ba desizaun polítika, katak ida-ne’e fatór esternu ida ne’ebé kontribui ba dezenvolvementu Timor Leste.

Timor Leste presiza atu integra ba iha ASEAN, Timor Leste presiza Delimitasaun fronteira terrestre no fronteira marítima, sem dúvida TL presiza Indonézia nia apoiu, sem Indonézia nia apoiu sira ne’e, sei la alkansa.

“Entaun ne’e forma, dalan ne’ebé ita nia líder sira foti atu ita bele alkansa objetivu ida ne’e,” nia subliña.

Razaun sira kona-bá kondekorasaun ba Jenerál reformadu Indonézia Hendropriyono ne’e nia konvida sidadaun hotu atu bele haree iha programa grande entrevista GMN TV iha ne’eba nia razaun klaru tiha ona.

Tanba hanesan militár, Tenente Jenerál Falur Rate Laek ko’alia, nia labele ba repete fila fali ida ne’e.

“Karik ita boot sira husu antes Tenente Jenerál Falur Rate Laek ba halo nia esplikasaun, depois ha’u prontu atu fó ha’u nia esplika estratéjiku kona-bá espasu estratéjiku ne’ebé Timor Leste insere entre Timor Leste Indonézia, pasadu no futuru,” nia haktuir.

Antes ne’e, Aliansa Nasionál ba Tribunál Internasionál (ANTI) lamenta ho polítika Prezidente Repúblika (PR), José Ramos-Horta ne’ebé lori dokumentu Fraternidade Umana hodi halo promosaun iha Timor Leste (TL) tanba hamosu polémika iha sosiedade timorense ho kondekorasaun ba Jenerál Indonézia Reformadu Hendropriyono, iha okaziaun Komemorasaun Loron FALINTIL ba dala-47.

Lee Mós: Ramos-Horta Beri Penghargaan “Medalha Mérito” kepada Panglima TNI Andika Perkasa

Jornalista: Vito Salvadór