Hatutan.com, (31 Agostu 2022), Díli— Delegasaun Comissão Anti-Corrupção (CAC), Ministériu Públiku (MP) no Unidade Informasaun Finaseira (UIF), Lideradu Komisáriu Sérgio Hornai no Prokuradór Alfonso Lopes, akompaña hosi ekipa tékniku sira CAC, MP no UIF nian durante loron tolu (29-31/08/2022) iha semana ne’e hala’o viajen ba Bangkok Tailándia hodi partisipa iha konferénsia rejionál anti-korrupsaun ne’ebé realiza iha otél Royal Orchid Sheraton, Bankok Thailándia.

Delegasaun Comissão Anti-Corrupção (CAC), Ministériu Públiku (MP) no Unidade Informasaun Finaseira (UIF), Lideradu Komisáriu Sérgio Hornai no Prokuradór Alfonso Lopes, akompaña hosi ekipa tékniku sira CAC, MP no UIF nian partisipa iha konferénsia rejionál anti-korrupsaun ne’ebé realiza iha otél Royal Orchid Sheraton, Bankok Thailándia, durante loron tolu (29-31/08/2022). Foto/CAC.

Konferénsia rejionál ne’e organiza hosi United Nation On Drugs and Crime, Regional Office for Southeast Asia and the Pacific (UNODC-ROSEAP) ho Objetivu prinsipál hodi fortalese kooperasaun no koordenasaun rejionál no internasionál entre autoridade nasionál investigasaun, liu-liu dezenvolve kapasidade autoridade polisiál sira nian iha investigasaun kazu krime korrupsaun sira ne’ebé kompleksu, konforme ba Konvensaun Nasaun Unida Kontra Korrupsaun (UNCAC) nian.

Lee Mós:CAC-UIF Hametin Koordenasaun Atu Luta Prevene-Kombate Korrupsaun

Konferénsia ne’e involve Autoridade Espesializada ba Kombate Korrupsaun nian, Autoridade Sentrál ba Asisténsia Juridika Mutua, Promotor sira no Unidade Intelijénsia Finanseira hodi diskute variedade ida iha tópiku relasionadu ho korrupsaun.

Iha konferénsia ne’e identifika dezafiu prinsipál sira ne’ebé nasaun ida-idak enfrenta iha sira nia aplikasaun lei professional sira, inklui avalia inisiativa sira anti-korrupsaun nian ne’ebé la’o hela, no diskute mós dalan sira ne’ebé sei mai hodi mellora esforsu sira kombate korrupsaun nian iha rejiaun sudeste aziátiku.

Durante atividade konferénsia, panelista no oradór sira hala’o aprezentasaun kona-ba dezafiu korrupsaun no prátika anti korrupsaun iha sudeste aziátiku; Hatan sira ba justisa kriminál korrupsaun; no kombate korrupsaun, lisaun ba rejiaun sira seluk.

“Komisáriu Sérgio Hornai sai mós panelista iha eventu konferénsia ne’e hodi hato’o ninia diskursu kona-bá oinsá Timor-Leste nia esforsu sira ba luta kontra korrupsaun entre nia ferramenta no dezafiu nesesáriu sira, liu-liu Timor-Leste nia esforsu sira ba hamosu lei foun nú. 7/2020- Medida Prevensaun no Kombate Korrupsaun (MPCC) ne’ebé hatuur medida sira ba prevensaun krime korrupsaun ninian, deklarasaun rikusoin, krime sira korrupsaun, pena aplikavel sira, meius sira espesifiku ba obtensaun no prezervasaun prova, no sesta alterasaun kódigu penál,” Hatutan.com   sita komunikadu.

Konferénsia durante loron tolu ne’e mós, hala’o diskusaun iha sesaun plenária no grupu traballu ba asuntu prinsipál sira hanesan; 1) fortalesimentu kooperasaun rejionál no internasionál hodi investiga no prosesa kazu korrupsaun multijuridisionál; 2) Aborda ligasaun entre korrupsaun no krime sira seluk; 3) reforsa kuadru jurídiku no instituisaun sira ba rekuperasaun átivu nian.

Rezultadu hosi konferénsia ne’e mak informa prósima atividade anti-korrupsaun UNODC iha rejiaun ne’e, fornese mapa ba autoridade polisiál sira no guvernu ba nia sira nia ajenda rásik ne’ebé reforma, no reforsa kooperasaun ba kombate korrupsaun iha rejiaun sudeste aziátiku.

Delegasaun Timor-Leste ne’ebé reprezenta hosi Comissão Anti-Corrupção (CAC) partisipa iha eventu konferénsia ne’e kompostu hosi Komisariu Sergio Hornai, Komisariu Adjuntu ba Asuntu Servisu Apóiu no Kooperasaun (DSAK) Alexandre Freitas, Xefe Unidade Kooperasaun João Correia, Espesialista Anti Korrupsaun Maria Asvia Correia no Lizia Soares.

Alende partisipa iha eventu konferénsia rejionál semana ne’e, iha parte seluk, Comissão Anti-Corrupção (CAC) aproveita oportunidade hanesan hodi hala’o sorumutu kortezia ho ekipa delegasaun Komisi Pemberatasan Korrupsi (KPK) Indonesia hodi ko’alia kona-ba hametin kooperasaun bilaterál ajénsia anti-korrupsaun rai rua nian iha tempu mai iha asuntu prevensaun no investigasaun krime korrupsaun nian.

Delegasaun CAC hala’o mós sorumutu kortezia ho Regional Anti-Corruption Adviser, UNODC Francesco Checchi ho nia komitiva hodi ko’alia mós kona-ba kooperasaun servisu instituisaun rua nian iha futuru.

Jornalista: Carmelita Isaac