Hatutan.com, (31 Agostu 2022), Díli—Ministériu Justisa (MJ), liuhosi Policia Ciêntífica e de Investigação Criminal (PCIC), submete ona kazu 32 ba Ministériu Públiku (PM), tanba durante ne’e falsifika dadus ka dokumentu sira hodi hetan pensaun veteranu.

Kazu 32 ne’e, involve hosi sidadaun sira ne’ebé baibain ema hanaran “veteranu falsu” no PCIC simu dadus hirak ne’e, hosi Ministériu Asuntu Kombatente no Libertasaun Nasional (MAKLN), liuhosi Gabinete Inspesaun no Auditória (GIA) nian.

Lee Mós: PCIC Rejista Keixa 38, Maiória Krime Furtu Agravadu

“Foin lalais iha reuniaun liubá, ministru entrega kazu 32 mai PCIC relasiona ho falsifikasaun dokumentus ba veteranus nian, ne’ebé mak sira identifika katak iha indisius forte ba krime. Entaun, sira pasa mai ami, ita prodús auto-notísia krime. Bazeia ba sira nia informasaun ne’e, ita prodús auto-notisia krime, ita relata ba Ministériu Públiku,” Portavóz PCIC, Octávio da Costa Araújo, hateten iha kna’ar fatin, Caicoli, Kuarta (31/08/2022).

Hosi kazu 32 ho auto-notisia krime nian ne’ebé PCIC submete, parte Ministériu Públiku ka Prokuradória Jerál Repúblika sei haree no estuda, depois mak haruka fila-fali despaixu ba iha PCIC, hodi kontinua halo prosesu investigasaun liu-liu buka autór ba “veteranu falsu sira”.

PCIC ninia kooperasaun servisu ho Ministériu Asuntu Kombatente no Libertasaun Nasional (MAKLN), hala’o bebeik ona, tanba iha kazu lubuk ida ona, ne’ebé mak hosi parte Gabinete Inspesaun Auditoria, MAKLN nian identifika no iha indisiu forte ba krime.

Jornalista: Rogério Pereira Cárceres