Hatutan.com, (01 Setembru 2022), Díli- Pasiente fase-raan  na’in-96, Kinta dadeer (01/09/2022), tuku-tuur tanis no dada-iis boot iha areador Hospital Nasionál Guido Valadares (HNGV) tanba loron rua ona sira la bele fase-raan hanesan baibain.

Lee Mós : Servidór HNGV Halo Reflesaun

Pasiente fase-raan sira halerik iha HNGV. Foto/Hatutan.com

Hospital Nasionál Guido Valadares (HNGV) durante semana ida ona la halo atendimentu bá pasiente ne’ebé ho moras rins (gagal ginjal), tanba mákina RO (Filtru bee) ne’ebé utiliza hodi dulas raan avaria.

Situasaun ida ne’e difikulta pasiente  96 ne’ebe loron-loron hein hodi fase-raan iha HNGV. Maske nune’e, HNGV rekolla ona sertidaun RDTL no eleitoral, maibé seidauk iha desizaun klaru.

Advertisement

To’o agora parta HNGV ho Ministériu Saúde buka hela solusaun atu oinsá mak salva pasiente sira ne’e liuhosi meius evakua sira bá halo tratamentu iha ospitál balun  iha Kupaun, Timor Osidentál.

Autoridade sira HNGV nian rekolla ona dokumentu relevante sira, hanesan pasaporte, Billete Identidade ka Kartaun Eleitoral, atu bele halo evakuasaun. Maibé sei presiza desizaun hosi Governu ka Ministériu Saúde    tanba sei afeta bá gastu orsamentu Estadu no presiza iha komunikasaun ho ospitál sira iha Kupaun.  

Pasiente fase-raan, Olinda Soares ho Octavio dos Santos ba jornalista sira iha HNGV, Kinta (1/9/2022), bá iha HNGV atu fase-raan, maibé seidauk bele fase-raan tanba mákina RO (Filtru bee) avaria.  

“Ami hein loron rua ona no ha’u husi Ermera maka mai agora daudaun ha’u ho kondisaun iis-boot. Dezde  Kuarta horikalan ha’u la bele deskansa, tanba  ha’u tenke  fase-raan iha semana ida dala-rua,” Olinda Soares ho Octavio dos Santos  hateten.

Durante ne’e, Olinda Soares, Octavio dos Santos ho pasiente sira seluk fase-raan normal hela, maibé loron-rua ikus ne’e maka pasiente sira mai la bele fase-raan hodi prejudika pasiente sira moras no balun dada-iis boot.

Advertisement

“Daudaun ne’e haruka de’it ami hatama sertidaun eleitoral ka dokumentu komprovativu sira seluk, maibé HNGV seidauk fó sai rezultadu, sira haruka ami hein de’it, maibé iha maluk balu mós senti kondisaun arraska ona,”  Olinda ho Octavio hateteten.

Pasiente balun mai husi Oé-Cusse, daudaun ne’e sofre iis-boot tanba loron rua ona la fase-raan no informasaun ne’ebé pasiente sira simu hosi autoridade HNGV maka haruka sira aguenta hein lai tanba aotoridade sira HNGV nian sei enkontru hela hodi buka dalan ka solusaun.

PM Taur Sei Konfirma ho MS

Primeiru-Ministru (PM), Taur Matan Ruak. Foto/Hatutan.com

Hosi sorin seluk, Primeiru-Ministru (PM), Taur Matan Ruak, hato’o nia preokupasaun kona-bá mákina fase raan avaria ne’e. Ho nune’e, Xefe Governu ne’e sei buka atu konfirma ho Ministériu Saúde (MS).

Bá jornalista sira iha Palásiu Prezidensiál, Taur Matan hateten, nia parte akompaña no haree ona iha mídia kona-bá mákina fase raan iha HNGV ne’ebé avaria no promete sei husu informasaun bá MS atu haree saida mak Ggovernu sei halo atu bele pasiente sira.  

Xefe Governu ne’e hatutan naturalmente ne’e, se verdade katak mákina sira at hotu ne’e prejudika  pasiente sira. Tanba ne’e, Taur Matan Ruak, sei buka hatene atu  saida mak nia bele ajuda atu tulun ministériu relevante halo nia servisu di’ak liután hodi halo atendimentu bá pasiente sira ne’ebé halo tratamentu iha HNGV liliu ba sira ne’ebé rutinamente fase-raan.

Advertisement

“Se verdade katak ita mákina sira at hotu ne’e prejudika ita-nia pasiente sira. Entaun ha’u sei buka hatene, saida mak ha’u bele ajuda,” Taur Matan Ruak hateten.

Jornalista halo ona esforsu atu  halo konfirmasaun ho Diretora Jerál Prestasaun Servisu Ministériu Saúde (MS), Odete Viegas, maibé nia parte labele fó komentáriu.

Jornalista: Carmelita Isaac/Vito Salvadór

Advertisement