Connect with us
Pakote Ahi

Defeza & Seguransa

Komandu F-FDTL Husu bá “Maun-Boot” Sira GAM no GAR Kontrola Membru

Published

on

Hatutan.com, (06 Setembru 2022), Díli-Komandu FALINTIL-Forsa Defeza Timor-Leste (F-FDTL) husu bá “maun-boot” ka lider sira hosi Grupu Arte Marsiál (GAM) ho Arte Rituál (GAR) atu kontrola nia membru sira atu labele komete problema ka krime iha komunidade.

Lee Mós : Autópsia Mate Isin José Bernardo, “Mamiik Nakfera” no “Ook Metan”

Komandu F-FDTL halo konferénsia imprensa kona-bá kazu Bidau Akadiru-hun, Díli. Foto/Hatutan.com

Komandu F-FDTL hato’o rekomendasaun ne’e relasiona  ho kazu konfronta membru GAM hosi Persaudaraan Setia Hati Terrate (PSHT) ho membru GAR Sete-Sete (77) iha área Bidau Akadiru-hun, Díli, Segunda  ( 05/09/2022), to’o atake membru F-FDTL Komponente Naval, Primeiru Sarjentu, Joanico Baptista Carvalho (Apeku).

“Bá maun-boot lider sira, organizasaun rezisténsia sira, bá arte-marsiál sira, kontrola ita-boot sira-nia membru sira, para labele halo krime beibeik iha fatin sira hotu, nu’udár maun-boot, nu’udár lider, tenke  iha lideransa ne’ebé mak metin, iha autoridade, iha kbiit para kontrola imi-nia membru sira, ita-boot sira nia membru sira,” portavós Komandu F-FDTL, Capitão José António Nunes da Costa, haktuir bá jornalista sira liuhosi konferénsia imprensa iha Kuartél Jenerál F-FDTL, Fatuhada, Díli, tersa (06/09/2022).

Advertisement

Haree ba rezultadu hosi kazu konfrontu ne’e, Komandu F-FDTL husu ba líder arte-marsiál no rituál sira tenke kontrola ninia membru sira, atu halo tuir de’it doutrina sira ne’ebé organizasaun hanorin iha fatin sira treinamentu nian.

Lider GAM ho GAR sira tenke kontrola atributu GAM ho GAR ne’ebé mak membru sira utiliza iha fatin própriu, no bainhira uza iha fatin ruma, iha serimónia ruma, importante tenke ho dixiplina, atu nune’e labele halo distúrbiu públiku, liu-liu bá iha estabilidade nasionál.

Primeiru Sarjentu, Joanico Baptista Carvalho (Apeku) ne’ebé hetan tuda no baku iha fatin akontesimentu, oras ne’e, halo hela tratamentu iha Ospitál Nacional Guido Valadáres (HNGV).

“Hanesan ita-boot sira haree, nia hosi duni Komponente Naval, oras ne’e, nia iha Ospitál, sei halo tratamentu, no buat hothotu, sei liuhosi dalan legál ne’ebé mak iha, iha justisa, investigasaun,” portavós Komandu F-FDTL ne’e, hateten.

Capitão José António Nunes da Costa, klarifika katak kazu insidente iha Baidau Akadiruhun ne’e, nia membru Primeiru Sarjentu, Joanico Baptista Carvalho (Apeku) iha hotu no hela área ne’ebá, no bainhira konfrontu ne’e mosu, membru ne’e tenta atu akalma. Infelizmente, hetan baku ka tuda hosi massa no hamosu distúrbiu públiku.

Advertisement

“Tanba ne’e maka ita nia militár ne’e tenta atu akalma situasaun, maibé la konsege, tanba nia mesak hetan atake barak hosi ita-nia juventude ran manas sira. Tanba ne’e mak iha ne’e, hakarak apela ba públiku katak, labele pániku ba akontesimentu ne’ebé mak horiseik akontese tiha ona. Tanba ne’e, nasaun soberanu, iha nia lei no orden, iha polísia, iha militár, iha justisa, buat hothotu sei la’o tuir natureza lei regulamentu ne’ebé maka iha,” Capitão José António Nunes afirma.

Kona-bá, iha informasaun katak, Polisia Militár (PM), foti ona ema sira ne’ebé deskonfia envolve iha kazu ne’e, Capitão José António Nunes, dehan, instituisaun F-FDTL ho PNTL iha ninia maneira rasik, oinsá mak bele kontrola no garante situasaun iha rai-laran, bele la’o ho hakmatek.

Hatán kona-bá, informasaun ne’ebé espalla katak, molok insidente ne’e, membru F-FDTL ne’e uza hela roupa sivíl hodi envolve mós iha konfrontu ne’e, depois maka tama fali ba laran hatais fali farda militár, portavós F-FDTL,  José António, hatán, prosesu investigasaun sei la’o no bainhira iha ona rezultadu mak foin bele hatene.

“Ida ne’e hanesan ohin ha’u ko’alia tiha ona, katak, buat hothotu sempre liuhosi investigasaun ida. Ha’u labele fó sai katak, antes ne’e nia tau sivíl, nia tau tiha farda mak bá halo asaun sira ne’e. Ha’u labele fó sai, tanba agora ne’e prosesu sei tama iha faze investigasaun,” Komandante José Nunes hateten.

 Autoridade Lokál Tenke Kontrola Juventude

Advertisement

Iha biban ida ne’e, Komandu F-FDTL liuhosi Portavós, Capitão José António Nunes da Costa, husu mós ba autoridade lokál, lider komunitáriu no konsellu juventude sira, atu kontrola nia populasaun sira iha bairru laran, atu orienta sira hodi la’o tuir de’it dalan ne’ebé maka di’ak, nune’e labele kria konfuzaun iha públiku, no labele kria distúrbiu iha públiku.

Razaun husu ne’e, tanba iha kazu konfrontu ne’ebé mosu iha área Akadiru-hun, juventude sira mai hosi fatin oioin, balu hosi área Laulara, hosi Hera, balu mai hosi fatin seluk tán.

“Ne’e signifika saida, falta de kontrolu, tanba ne’e mak iha ne’e, hosi instituisaun F-FDTL apela ba ita autoridade sira, para kontrola juventude sira, kontrola ita nia populasaun sira, para sira bele la’o livre, la’o buka moris, para sustenta nia vida, nia moris ba iha sosiedade ida ne’e, no kontribui ba iha estabilidade nasionál,” Capitão José António Nunes da Costa, dehan.

Komandu F-FDTL mós oras ne’e forma ona ekipa ida hodi haree kona-bá kazu ne’e, tanba instituisaun armada ne’e iha rasik ninia kanál justisa nian, hodi prosesa aktu saida de’it mak membru militár sira karik komete.

Komandu F-FDTL mós husu ba populasaun tomak, atu lalika pániku, nafatin hala’o servisu ho normál, hodi sustenta vida loro-loron nian, RDTL iha ninia forsa militár no polisia, kontrola situasaun saida de’it mak akontese.

Advertisement

“Instituisaun rua ne’e 100% la tolera aktu krime sira ne’ebé mak akontese iha kapitál Dili. Ne’e garantidu, tanba ne’e mak ohin ha’u avizu tiha ona, ita nia populasaun lalika pániku,” José António Nunes afirma.

PNTL Detein Suspeitu Na’in-haat

Hosi sorin seluk, ekipa konjunta kompostu hosi Ekipa Investigasaun Movel,  Servisu Informasaun Polísia (SIP), Servisu Nasionál Intelijénsia (SNI) ho Servisu Militár (SM), kaptura no detein ona suspeitu na’in-haat (4) ne’ebé   mak envolve iha kazu asaltu membru F-FDTL iha área Bidau Akadiru-hun

Suspeitu na’in-haat ne’e ho inisiál CC, DS, PPC ho RXS ne’ebé agora dadaun submete hela bá prosesu investigasaun iha Servisu Investigasaun Kriminal Nasional (SIKN).

Jornalista: Rogério Pereira Cárceres

Advertisement

 

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Defeza & Seguransa

Vizita Papa Francisco, Seguransa Preparadu no Garantidu

Published

on

Hatutan.com, (16 Abríl 2024), DíliIX Governu Konstitusionál garante sei fó seguransa másimu durante loron tolu vizita Papa Francisco iha Timor-Leste (TL).

(more…)

Kontinua Le'e

Defeza & Seguransa

Governu Tenke Konsidera Kompeténsia Xefe Estadu iha Kooperasaun Internasionál Kuadru Defeza

Published

on

Hatutan.com, (16 Abríl 2024), DíliPrezidente Repúblika (PR), José Ramos-Horta husu Governu tenke tau konsiderasaun bá buat balun kona-bá kompeténsia Xefe Estadu nian iha kooperasaun internasionál kuadru defeza.

(more…)

Kontinua Le'e

Defeza & Seguransa

Membru UPM Na’in-50 Deklara Husik GAM-GAR

Published

on

Hatutan.com, (15 Abríl 2024), Díli—Polísia Nasionál Timor-Leste (PNTL) liu hosi Unidade Polisia Marítima (UPM) nia membru hamutuk na’in-50, deklara sai hosi orgazanizsaun Grupu Arte Marsiál (GAM) ho Grupu Arte Rituál (GAR), no jura bá bandeira lulik RDTL atu serví de’it povu no rai doben Timor-Leste.

(more…)

Kontinua Le'e
Advertisement

Trending