Hatutan.com, (07 Setembru 2022), Díli—Xefe Estadu Maiór Jenerál FALINTIL Forsa Defeza Timor Leste (F-FDTL), Tenente Jenerál Domingos Raúl ‘Falur Rate Laek’ alerta makás ba ema sivíl atu para ona baku militár inklui membru Polísia Nasionál Timor Lorosa’e (PNTL).

Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek” halo entrevista ho jornalista sira, 25 fulan-Marsu 2022. Foto/Hatutan.com

Falur alerta ne’e relasiona ho membru F-FDTL hosi Komponente Navál, Primeiru Sarjentu Joanico Baptista Carvalho ne’ebé hetan pankada iha parte ulun, tanba tuda ho fatuk hosi grupu joven balun, durante konfrontu iha área Akadiruhun, Díli, Segunda (05/09/2022).

Lee Mós: Governu Sei Notifika Líder GAM-GAR Responsabiliza Aktu Krime

Tenente Jenerál Domingos Raúl ‘Falur Rate Laek’ ho oin hirus ko’alia makas katak, tuda tán mak haree.

Advertisement

“Tuda tán mak ita haree. Ita fó solusaun. Agora ita ko’alia uluk tiha, depois ita la halo, ne’e ema dehan asu hatenu rai mamuk. Rona ka la’e, kuandu iha tiha, tata tiha mak ita haree. Labele provoka,” Tenente Jenerál Domimgos Raúl “Falur Rate Laek” hateten tán.

Falur Rate Laek, husu ba ema sivíl sira, tenke hatudu respeitu ba ninia oan sira ne’ebé oras ne’e serví iha instutisaun Polísia no militár.

“Sira uza farda ne’e, tanba sira reprezenta soberania nasaun. Afirmasaun soberania nasaun nian, Estadu nian, instituisaun nian,” Falur Rate Laek subliña.

Nia husu atu ema hotu-hotu tenke respeita, liu-liu juventude tenke hahú respeita agora tanba iha loron ida sira mós sei tama fali polísia ho militár.

Uluk iha tempu funu, timoroan hotu lakohi atu ema tuda sira ka tula-liman ba sira. Entaun, tanba saida mak ohin loron juventude hatudu fali hahalok ‘brutalidade’ ida-ne’e.

Advertisement

“Sira tuda ne’e la’ós ema boot, ema ki’ik ho idade 20, 16 no 17 anus. Sira hakarak tama militár sai servidór. Entaun tenke respeita agora. La’ós ba kaer fali, tuda fali  ema hatais farda nasaun ninian, ne’e labele, rona ka la’e. Jornalista sira tenke aproveita halo edukasaun ba ema, fó informasaun ba liur, dehan hothotu tenke respeita ema nia uniforme ne’e, uniforme ne’e la’ós kualkér farda atu ó naran tuda,” Tenente Jenerál Falur Rate Laek, fó-hanoin.

Funu-na’in ne’e husu ba inan-aman sira, administradór no Xefe Suku sira tenke eduka. La’ós iha ne’ebá, toba de’it, la eduka, la hanorin, laiha enkontru.

“La halo sosializasaun ba lei sira ne’e maka ema sira ne’ebé ukun an, eskola mós hanorin la-hún la-dikin iha mak halo sasan sira ne’e,” nia dehan.

Falur konsidera mós katak, durante ne’e líder grupu arte marsiál no rituál sira laiha kontrolu ba ninia membru sira.

“Ha’u komanda ema 2000 de’it, ha’u kontrola de’it susar, nusá mak sira ida ne’e, depois regulamentu de’it barbarak, lider GAM ho GAR hatama ema barbarak hanesan ne’e sira kontrola halo nusá,” Jenerál Falur, hateten.

Advertisement

Kona-bá deklarasaun Sekretáriu Jerál Persaudaraan Setia Hati Terate (PSHT), Pedro Aparício ne’ebé dehan membru F-FDTL ne’e involve mós iha kazu konfrontu ne’e, Falur Rate Laek dehan Sekjen PSHT husu ona deskulpa.

“Ohin ami koalia tiha ona, husu tiha ona, ami koalia barak tiha ona, ne’ebé sira hatene ona. Laiha, ohin ha’u responde tiha ona, doutór advogadu Julio Aparício mak ko’alia, mais ohin nia husu deskulpa tiha ona, nia sala. Ha’u dehan, ó advogadu ida, o seidauk halo justisa, fó sala uluk ema. Ha’u dehan hanesan ne’e ba nia, ne’ebé nia ohin responde ona, loos ona,” Falur informa.

Komandu F-FDTL, oras ne’e mós halo hela investigasaun ba nia membru hosi Komponente Navál ne’ebé hetan kanek iha ulun durante konfrontu iha Akadiruhun, nune’e bele hatene motivu sira, tanba sá mak nia kanek, karik tanba nia mós sai autór hodi involve iha kazu insidente ne’e.

Sidadaun sira ne’ebé kapturadu, oras-ne’e entrega hotu ona ba Komandu PNTL ninia liman liuhosi Servisu Investigasaun Kriminál Nasionál (SIKN).

Jornalista: Rogério Pereira Cárceres

Advertisement