Hatutan.com, (08 Setembru 2022), Díli—Komisáriu Adjuntu Comissão Anti-Corrupção (CAC) ba Asuntu Servisu Prevensaun no Sensibilizasaun, Luis Sampaio lidera ekipa Espesialista Anti-Korrupsaun (EAK) hala’o akonsellamentu ba ekipa Responsável programa Pagamentu Subsídiu Fim do Ano (anuál) ba Uma Ka’in hosi Ministériu Solidariedade Sosiál no Inkluzaun (MSSI) nian iha salaun enkontru MSSI, Caicoli Díli, Kuarta (07/09/2022).

Komisáriu Adjuntu Comissão Anti-Corrupção (CAC) ba Asuntu Servisu Prevensaun no Sensibilizasaun, Luis Sampaio lidera ekipa Espesialista Anti-Korrupsaun (EAK) hala’o akonsellamentu ba ekipa Responsável programa Pagamentu Subsídiu Fim do Ano (anuál) ba Uma Ka’in hosi Ministériu Solidariedade Sosiál no Inkluzaun (MSSI) nian iha salaun enkontru MSSI, Caicoli Díli, Kuarta (07/09/2022). Foto/CAC.

Ekipa MSSI konvida Komisaun iha sorumutu ida ne’e ho objetivu prinsipál husu Komisaun nia pontu de vista no akonsellamentu iha ámbitu prevensaun krime korrupsaun nian hahú iha inisiu preparasaun tékniku nian ba programa ida ne’e, no akonsella mós entidade responsável oinsá kumpre no implementa programa refere tuir dekretu lei númeru 37/2022, 25 Maiu.

Lee Mós:MS-MSSI Sei Asegura Implementasaun Programa “Bolsa da Mãe” Jerasaun Foun

Iha reuniaun ne’e, ekipa forsa traballu MSSI nian atualiza progresu preparasaun tékniku pagamentu subsidiu fim do anu uma-ka’in nian ne’ebé VIII Governu planeia sei halo pagamentu ba uma-ka’in elejível sira iha fulan Novembru ne’e.

sPontu importante ne’ebé ekipa ne’e atualiza mai CAC maka; a) Preparasaun dadus elijível benefisiáriu ne’ebé MSSI koordena hamutuk MAE; b) Mekanizmu pagamentu subsidiu familiar nian; c) Mobilizasaun transporte sira ne’ebé sei apóiu ekipa tékniku sira halo pagamentu subsidiu iha Suku; d) Montante orsamentu ne’ebé aloka ba programa refere ne’ebé sei kobre pur volta 70 Milloes, no e) atualiza mós kordenasaun servisu ho entidade sira seluk.

Iha reuniaun ne’e, MSSI atualiza mós preokupasaun no kestaun balun liga ho desizaun Konsellu Ministru nian ho dekretu lei nú. 37/2022, liu-liu benefisiáriu sira ne’ebé sei asesu ba subsídiu ida ne’e.

Komisáriu Adjuntu Sampaio akonsella entidade implementadór atu kumpre de’it dekretu lei ne’ebé aprova, promulga ona no tama iha vigór. Konforme ba interpretasaun no intendimentu Komisaun nian kona-ba Espiritu dekretu lei nú. 37/2022 ne’e fó énfaze no aplika de’it ba pesoa no familia vulnerável sira mak iha direitu simu subsídiu ne’e.

“Ami kaer mak dokumentu ka dekretu lei ne’ebé iha. Anaunser Konsellu Ministru halo alterasaun ba dekretu lei ne’e,” Hatutan.com sita deklarasaun Adjuntu Sampaio nian iha komunikadu.

Komisáriu Adjuntu Sampaio mós rekomenda ba ekipa responsável programa ne’e atu buka solusaun ba preokupasaun hirak ne’ebé akontese no halo preparasaun sira ho di’ak tuir espiritu dekretu lei ne’ebé iha antes implementa programa refere iha terenu, nune’e labele ariska-an ba iha krime korrupsaun.

Ba pontus rekomendasaun Komisaun nian, Ekipa MSSI nian simu, anota ona no konsidera sei buka meius no esforsu hotu-hotu atu solusiona problema sira ne’ebé akontese.

Ekipa MSSI kompromitidu sei husu nafatin Komisaun nia pareser legál ba preokupasaun no kestaun ne’ebé Guvernu enfrenta, nune’e bele fó solusaun di’ak liu ba implementasaun programa ida ne’e.

Jornalista: Elio dos Santos da Costa