Hatutan.com, (12 Setembru 2022), Díli—Polísia Nasionál Timor-Leste (PNTL), Komandu Munisípiu Díli, halo detensaun ba sidadaun na’in-rua, tanba halo komentáriu iha média sosiál facebook, to’o sadik-malu atu baku malu, Domingu (11/09/2022).

Komandante PNTL Munisípiu Díli, Superintendente Xefe Henrique da Costa. Foto/Hatutan.com

Komandante PNTL Munisípiu Díli, Superintendente Xefe Polísia, Henrique da Costa informa, autór na’in-rua ne’e ho inisiál BDSC hela iha área Vilaverde no IDSN hela iha Maskereñas, Díli.

Lee Mós:Operasaun Konjunta F-FDTL ho PNTL “La Halimar” ho Kriminozu

Hafoin simu informasaun ida-ne’e, Komandu PNTL Munisípiu Díli fó kedan orientasaun ba ekipa Servisu Informasaun Polísia (SIP) ho mós Investigasaun Díli nian, buka no identifika autór ka provokadór sira ne’e.

“Hakarak informa katak, iha semana kotuk ne’e, iha vídeo ida, virál tebes ne’ebé mak joven sira halo gravasaun no provoka malu liuhosi média sosiál ninian. Horseik hetan ona, ita bolu ona mai, hodi koordena fila-fali ho parte investigasaun kriminál nasionál, entrega ba sira hodi halo prosesu,” Superintendente Xefe Polísia, Henrique da Costa hateten ba jornalista sira, iha kna’ar fatin Caicoli, Segunda (12/09/2022).

Oras-ne’e daudaun, ekipa investigadór sira iha Servisu Investigasaun Kriminál Nasionál (SIKN), halo hela prosesu ba autór sira, liuhosi indentifikadsaun no investigasaun.

Komandu PNTL Munisípiu Díli, nafatin iha komitmentu hodi servisu hamutuk ho parte SIKN, SIP, nomós ho Policia Ciêntífica e de Investigação Criminal (PCIC), nune’e bele buka-tuir nafatin pessoál sira ho ID facebook falsu, ne’ebé mak hakarak provaka malu iha média sosiál, hodi kria fali instabilidade.

“Tanba ne’e, ita husu ba iha utilizadór média sosiál sira, nune’e uza bá pontu sira pozitivu ninian. Ita tenke kuidadu informasaun ka, buat hirak ne’ebé mak ita boot sira fahe iha ne’ebá, maibé iha ninia finalidade ne’e, sai fila-fali provokadór ka kria fila-fali instabilidade,” komandante Henrique da Costa, hateten.

Jornalista: Rogério Pereira Cárceres