Hatutan.com, (30 Setembru 2022), Díli- Mezmu Asembleia Jerál Liga Futeból Timor Leste (LFTL)  hamutuk ho órgaun liga  deside primeiru vise-prezidente LFTL, Germano A.J da Silva  “Dasi-Mau” substitui Nilton Gusmão  hanesan prezidente interinu LFTL nian hodi hein  kongresu estraordináriu, maibé Germano rasik seidauk prontu atu asume knaar interinamente ne’e.

Lee Mós : Asembleia Jerál LFTL Diskute Sirkunstánsia Rezignasaun Nilton Gusmão

Enkontru Asembleia Jerál Liga Futeból Timor Leste (LFTL) hamutuk ho órgaun liga, Segunda (30/09/2022). Foto/Elio dos Santos da Costa

Bá Hatutan.com, Sesta (30/09/2022), Germano A.J. da Silva “Dasi-Mau” hateten, mezmu Asembleia Jerál nomeia nia bá prezidente interinu iha primeiru trimestre ne’e to’o kongresu estraordináriu tuir estatutu, maibé nia la bele no seidauk prontu asume knaar ne’e tanba iha sirkunstánsia lubun ida, liuliu kona-bá nia saúde ne’ebé daudaun ne’e la permite.

“Ha’u sujere no delega fali kompeténsia prezidente interinu  ne’e bá segundu vise-prezidente LFTL, Octavianos da Conceição tanba ha’u la bele simu ida-ne’e,” Gernano da Silva hateten.

Tuir nia haree, uitoan ka barak Nilton Gusmão  kontribui ona bá dezenvolvimentu futeból iha Timor Leste, hahú Liga Amadora mai to’o LFTL no ho rezignasaun Nilton nian ne’e, Germano nota situasaun ne’e akontese tanba iha ona infiltrasaun ka intervensaun polítika no interese polítika bá kestaun bola nian.

“Ha’u la bele. Di’ak liu maka disolve tiha estrutura ezekutivu LFTL ne’ebé lidera hosi Nilton, inklui hasai ha’u atu organiza fali kongresu foun no hili asembleia jerál foun ho nia ezekutivu sira,” Germano hateten.

Prezidente Asembleia Jerál LFTL, Miguel Manetelo rasik hateten bainhira simu karta rezignasaun husi prezidente LFTL Nilton Gusmão, asembleia jerál LFTL organiza kedas reuniaun no ikus liu mak reuniaun ho komponente tomak órgaun LFTL nian hodi rona opiniaun molok meza asembleia jerál foti desizaun bazeia bá estatutu LFTL nian.

Iha estatutu rasik LFTL nian hateten,  bainhira prezidente LFTL husu rezignasaun, nia primeiru vise-prezidente mak sei substitui hodi lidera LFTL bá periodu trimestre ida ka fulan tolu hodi hein asembleia anual ka kongresu estraordinária hodi hili prezidente ezekutivu foun.

Iha reuniaun asembleia jerál ne’ebé  hala’o iha edifísiu LFTL iha Estádiu Munisipál Díli , Sesta ne’e, partisipa maioria mezmu primeiru vise-prezidente LFTL ne’e rasik la marka prezensa maibé opiniaun sira ne’ebé iha liuliu komisaun jurisdisaun hanoin katak resposta bá rezignasaun hosi prezidente LFTL maka tenke la’o tuir estatutu LFTL nian, nune’e bá oin komisaun jurisdisaun sei halo paresér ka hato’o opiniaun jurídika nu’udár  baze legal ida bá meza asembleia Jerál LFTL nian hodi fó ka delega kompeténsia bá primeiru vise-prezidente LFTL, Germano A.J. da Silva.

Hafoin  karta kompeténsia bá primeiru vise-prezidente hanesan prezidente interinu maka foin bele loke diskusaun ho Federasaun Futeból Timor Leste (FFTL) no bele mos ho governu kona-bá liga Timorense époka 2022-2023 la’o ka la la’o.

Lee Mós : Nilton Gusmão Submete Pedidu Rezignasaun Bá Asembleia Jerál LFTL

Jornalista: Vito Salvadór