Hatutan.com, (22 Setembru 2022), Díli—Eis Prezidente Repúblika, Francisco Guterres Lú Olo dezloka ona ba Malázia hodi hala’o kontrolu ba nia saúde, Kinta (22/09/2022).

Eis Prezidente Repúblika, Francisco Guterres Lú Olo akompaña hosi espoza Cidália Nobre Mouzinho Lopez Guterres, dezloka ba Malázia hodi hala’o kontrolu ba nia saúde, Kinta (22/09/2022).

Lú Olo ne’ebé akompaña hosi espoza Cidália Nobre Mouzinho Lopez Guterres, dezloka ho aviaun komersiál Batik Malázia iha oras meiu-dia.

Lee Mós: Lú Olo Alta Ona Hosi HNGV

Prezidente Repúblika períodu 2017-2022, antes ne’e hala’o hela tratamentu iha Hospitál Nasionál Guido Valadares (HNGV) tanba kondisaun saúde fraku uitoan ne’ebé presiza deskansa. 

“Durante iha HNGV Lú Olo hetan tratamentu médiku di’ak tebes hosi komponente hotu ne’ebé hola papél importante iha área oioin hodi kontribui ba rekoperasaun eis Prezidente Repúblika ho lais tebes, alta iha loron 17 Setembru,” Hatutan.com sita komunikadu.

Iha loron 12 fulan Setembru kalan eis Prezidente Repúblika ne’e ba hala’o tratamentu ka deskansa iha sala VIP númeru 01 HNGV, tanba kondisaun saúde fraku oitoan  hafoin loron tolu la deskansa hodi partisipa ativu iha Kongresu Nasionál FRETILIN ba da-limak, iha Centro Conveções Díli (CCD).

Iha Sábadu (17/09/2022), eis Prezidente Repúblika Francisco Guterres Lú Olo alta hosi HNGV hafoin hala’o tratamentu médiku durante loron lima.

Lee Mós: Lú Olo Baixa iha HNGV Tanba Kondisaun Saúde Fraku Uitoan

Jornalista: Vito Salvadór