Hatutan.com, (23 Setembru 2022), Díli- Vise-Primeiru-Ministru Vatikanu, Arsebispu Edgar Peña Parra ho Prezidente Parlamentu Nasionál (PPN), Aniceto Longuinhos Guterres Lopes, Sesta (23/09/2022), iha Parlamentu Nasionál  ko’alia kona-bá asuntu edukasaun no obra sosial sira , inklui ko’alia mós  momentu importante sira Igreja Katólika akompaña povu Timor-Leste nia prosesu libertasaun nasionál.

Lee Mós : Santa-Sé Husu MJ Finaliza Prosesu Rekoñesimentu Personalidade Jurídiku Igreja Katólika

Vise Primeiru-Ministru Vatikanu, Arsebispu Edgar Peña Parra ho PPN, Aniceto Guterres hasai foto ho membru PN sira. Foto/Elio dos Santos da Costa

Vise Primeiru-Ministru Vatikanu, Arsebispu Edgar Peña Parra hasoru malu  ho PPN, Aniceto Guterres,  nu’udár enkontru da-ikus molok fila hikas bá Roma-Vatikanu. 

Arsebispu Edgar Peña Parra hateten, tinan 20 independénsia Timor-Leste atu nasaun ne’e kontinua la’o bá oin, mezmu iha difikuldade, maibé koko ho posibilidade hotu atu nafatin iha sidadaun sira ne’ebé kiak no nesesita sira nia sorin.

“Entaun iha tempu tuir mai, buka nafatin atu iha konsensu nasionál ida hodi kontinua tau matan ba sidadaun kiak sira ne’ebé nesesita apoiu.” Arsebispu Edgar Peña Parra hateten.

“Ha’u hanoin katak Kardeál iha ne’e, hamutuk ho bispu no na’i-lulik sira no igreja Katólika sei hamutuk ho órgaun soberanu sira tau matan bá povu nia moris,” Arsebispu Edgar Peña Parra hateten.

Arsebispu ne’e nafatin elojiu ho inisiativa ne’ebé Parlamentu Nasionál Timor-Leste halo hodi adopta dokumentu Fraternidade Umana nu’udár dokumentu nasionál no ida ne’e hatudu Parlamentu Timor-Leste nu’udár Parlamentu  dahuluk iha mundu ne’ebé aprova no adopta dokumentu kona-bá Fraternidade Umana.

“Parabéns ba hotu-hotu, ita hamutuk nafatin iha orasaun, Papa Francisco nia bensaun nakonu bá povu ida ne’e,” Arsebispu Edgar Peña Parra dehan.

Prezidente PN, Aniceto Longuinhos Guterres Lopes hateten, vizita ne’e la’ós bainaka bá Igreja, maibé Ida-ne’e bainaka Estadu tomak nian, tanba mai inaugura embaixada Núnsiu Apostóliku

“Lei sira-ne’ebé uluk Parlamentu Nasionál halo tiha ona no aprova ona kona-áa lei ne’ebé mak fasilita misionáriu igreja atu fasilita sira-nia servisu iha Timor-Leste, Tanba ne’e kompeténsia Parlamentu Nasionál nian vise-Primeiru-Ministru Santa Sé lori Igreja Katólika nia naran mai hato’o agradesimentu,” Aniceto Longuinhos Guterres Lopes hateten.

Deskute Posibilidade Papa Francisco Vizita TL

Vise-Primeiru-Ministru Vatikanu, Edgar Peña Parra hateten, Timoroan hotu tenke hahú halo buat di’ak hodi hatudu povu Timor-Leste nia prontidaun atu simu vizita Papa Francisco nian.

Vise Primeiru-Ministru Vatikanu, Edgar Peña Parra hateten hamutuk ho prezidente Parlamentu Nasionál ho lider bankada parlamentár sira ko’alia mós kona-bá vizita santu Padre Papa Francisco nian ne’ebé planeia bá tinan oin.

“Papa Francisco seidauk trata nia viajen mai Timor-Leste iha tinan oin, maibé hamutuk halo buat kmanek sira, atu hatudu katak povu Timor-Leste iha konvite  tantu hosi parte igreja no governu iha seriedade atu simu Papa Francisco nia konvite,” Arsebispu Edgar Peña Parra  haktuir.

Prezidente  Parlamentu Nasionál (PPN), Aniceto Longuinhos Guterres Lopes hateten,  Arsebispu Edgar Peña Parra dezeju no solisita Papa Francisco nia vizita bá tinan oin.

“Ita hein Amu Papa nia disponibilidade no desizaun atu vizita, maibé hanesan ita rona tiha ona, Amu Papa atu mai vizita Timor-Leste,” Aniceto Longuinhos Guterres Lopes hateten.

PPN hatutan tempu mak seidauk hatene, ohin hamutuk ho Xefe Bankada Parlamentár sira pronunsia no husu bá Vise-Primeiru-Ministru atu Amu Papa bele mai vizita Timor-Leste iha tinan oin.

Jornalista: Vito Salvadór