Hatutan.com, (27 Setembru 2022), Díli—Sekretáriu Jerál Organizasaun Nasaun Unidas (ONU), António Guterres promete atu ko’alia ho líder mundiál sira, liu-liu líder nasaun membru G20 hodi apoia adezaun Timor-Leste (TL) bá Association of Southeast Asian Nations (ASEAN).

Prezidente Repúblika (PR), José Ramos-Horta hasai foto hamutuk hafoin enkontru ho Sekretáriu Jerál ONU, António Guterres iha Nova Iorka, Tersa (27/09/2022). Foto/Média PR.

Prezidente Repúblika (PR), José Ramos-Horta agradese ba apoiu hotu hosi ONU no nasaun membru ASEAN nian ne’ebé eforsu hodi simu Timor-Leste sai membru ASEAN ba dala XI.

Lee Mós: Enkontru Komisaun Konstrusaun Pás ONU, Dedika Espesiál bá TL

Xefe Estadu afirma, Sekretáriu Jerál ONU, António Guterres iha relasaun metin ho atuál Prezidente Indonézia, Jokowi, nune’e nia bele negosia hodi Timor-Leste adere lalais ba ASEAN.  

Advertisement

“Sekretáriu Jerál ONU, António Guterres sempre prontu atu haree saida mak Timor-Leste presiza nia apoiu, bele dala ruma apoiu diretamentu hosi ONU maibé mós bele liu hosi ko’alia ho líder sira iha mundu, favór tau matan ba Timor-Leste. António Guterres iha relasaun metin ho Prezidente Repúblika Indonézia, Joko Widodo, nu’udár mós Prezidente ba ASEAN no G20 iha tinan 2023. Ne’e duni, ita presiza buat ruma hosi Sekretáriu Jerál ko’alia ho líder Europeiu sira no G20, nia prontu atu halo loby ba Timor-Leste, Timor-Leste sempre iha nia hanoin no fuan,” Hatutan.com sita deklarasaun Ramos-Horta hafoin enkontru ho Sekjer ONU, António Guterres, iha komunikadu, Tersa (27/09/2022).

Ramos-Horta konsidera atuál Sekretáriu Jerál ONU, hanesan ema ida di’ak tebes, líder ne’ebé iha kualidade no koñesidu hanesan ema reliziozu, nu’udár Katóliku dezde hanesan Primeiru Ministru Portugál, iha fuan di’ak tanba ne’e mak eleitu hanesan lideransa másimu ONU ho unanimidade tutuir-malu.

Uluk iha tempu difísil 1999, hanesan Primeiru Ministru Portugál, António Guterres halo presaun makas bá Prezidente Amerikanu, Bill Clinton no líder Europeiu sira atu buka konsensu iha Konsellu Seguransa ONU, nune’e Misaun Forsa Manutensaun ba Dame INTERFET tama iha Timor-Leste.

Iha enkontru ne’e, Sekeretariu Jerál ONU apresia mós Xefe Estadu foun Timor-Leste ba períudu 2022-2027, José Ramos-Horta.

Durante estadia iha Amérika, Prezidente Repúblika hasoru-malu ona ho Primeiru-Ministru Kambodia, Hun Sen, no líder mundiál sira seluk hodi ko’alia mós kona-bá prossesu Timor-Leste adere ba ASEAN.

Advertisement

Jornalista: Vito Salvadór