Hatutan.com, (30 Setembru 2022), Díli-Membru Parlamentu Nasionál hosi Bankada FRETILIN, David Dias “Mandati” fó nia opiniaun kona-bá subsídiu “Fim do Ano” $200 ne’e merese liu atribui bá ema ho rendimentu ki’ik no hirak ne’ebé vulneravel iha sosiedade.

Lee Mós : Subsídiu “Fim do Ano” $200 ho Forma Universál Hanesan Korrupsaun no Fó Todan bá Despeza Estadu

Membru PN, David Dias “Mandati”. Foto/Elio dos Santos da Costa

Membru Parlamentu Nasionál seluk hosi Bankada KHUNTO, Olinda Guterres, rejeita simu subsídiu “fim do Ano” hosi Governu ne’ebé nia partidu rasik forma hamutuk oh PLP no FRETILIN tanba nia nu’udár Deputada iha rendimentu no regalia ne’ebé sufisiente no oioin hosi Estadu.

Iha reuniaun Konsellu Ministru, Kuarta (28/09/2022), halo ona alterasaun dahuluk bá projetu Dekretu-Lei 37/2022, kona-bá subsídiu “fim do ano” ho forma uma-kain hotu iha territóriu nasionál la’ós ona atribui de’it bá família kbiit-laek ka família vulneravel.

Deputadu David Dias “Mandati” ne’ebé fó votu afavór bá orsamentu retifikativu 2022 hodi fó dalan bá subsídiu ne’e hateten, tuir loloos subsídiu $200 ne’e tenke fó bá ema sira ne’ebé nia saláriu ki’ik ho ema sira ne’ebé laiha reseita permanente.

“Ha’u manán ona osan, ha’u iha regalia, tán saida maka ha’u mós tenke simu tán. Ema sira ne’ebé saláriu ki’ik hanesan $500, ha’u hanoin bele. Mais sira seluk, ema mak hatene bá, ha’u pelumenus, hanoin bá katak, todan uitoan mai ha’u, karik ha’u simu,” Deputadu David Dias “Mandati”, hateten, Sesta (30/09/2022).

“La’ós ha’u lakohi, maibé todan. Ema sira ne’ebé saláriu ki’ik sira ne’e, hanesan ita-nia agrikultór sira, dala-ruma ita sei hetan, ita-nia maluk sira uma ladi’ak, buat sira ne’e hotu,” David Dias ‘Mandati’ hateten.

Deputadu FRETILIN ne’e dehan, sé subsídiu $200 ne’e membru órgaun soberanu, membru governu, no deputadu sira mós hakarak benefisia hotu ida ne’e, tanba sá mak la tau hamutuk osan hirak ne’e hodi apoiu bá povu liuhosi programa Uma Kbiit Laek (UKL), tanba Primeiru-Ministru rasik mós hateten ona katak, sei haree fila-fali bá prioridade sira seluk tán.

“Ha’u nia hanoin mak ida ne’e, do que ita iha ona, mais hakarak iha tán, sira ne’ebé laiha ne’e, laiha nafatin de’it. Ohin ha’u seidauk dehan katak, ha’u la simu, mais ha’u todan,” deputadu Mandati, hateten.

Lee Mós : Prezidente Repúblika Sei La Simu Subsídiu “Fim do Ano” no Husu Governu Atribui Bá Povu Vulnerável

Hatán kona-bá karik governu kontinua mantein ho nia desizaun katak subsídiu ne’e universál, Mandati dehan, ida ne’e Governu nia servisu, nia hanesan deputadu, halo de’it fiskalizasaun.

Membru PN, Olinda Guterres. Foto/Elio dos Santos da Costa

Xefe Bandaka KHUNTO, Olinda Guterres, rejeita atu simu subsídiu $200 ne’e, tanba loloos, osan ida ne’e, fó bá ema ne’ebé presiza tebetebes.

“La’ós bá fali prezidente, la’ós bá fali deputadu, la’ós bá fali ema ne’ebé mak moris di’ak ona, no loroloron nia hetan la barak, mais sufisiente bá nia para han dadeer, meiudia, kalan iha ona, la’ós atu simu tán ida ne’e, Tuir ha’u nia haree fó apoiu bá sira ne’ebé kbiit-laek liu, ida ne’ebé presiza tebes. Tanba osan foin daudauk aprova ne’e, la’ós dehan bá ema hothotu, bá ema ne’ebé mak presiza tebes mak tenke fó duni,” Deputada Olinda fó sasin.

Tuir deputada Olinda, bainhira governu kontinua mantein ho desizaun ida katak, subsídiu ne’e ho forma universál, nia parte lakohi simu. No bainhira parte governu hakarak lori fali projetu Dekretu-Lei 37/2022, kona-bá subsídiu fim do ano ne’e bá iha PN, sira lakohi, tanba deputadu sira iha saláriu ona, inklui funsionáriu sira mós iha ona saláriu.

“Fó mak ema ne’ebé presiza tebetebes ninia ajuda, ema ne’ebé loron ida han paun fuan ida, to’o kalan han sasoro. Ha’u rasik mós lakohi atu simu, sé buat ne’e mai mós ha’u rejeita, ha’u lakohi. Osan ida ne’e bá ema sira ne’ebé maka kbiit-laek,” Deputada Olinda hateten.

Xefe bankada KHUNTO ne’e, fó hanoin bá Governu katak, bainhira atu fó osan ruma bá ema hothotu, tenke tetu didi’ak, tanba bainhira fó osan bá ema hotu-hotu maka, halo ema sai baruk-teen, nia hakarak hein de’it osan hosi Governu no hakarak aproveita ida ne’e, mais  lakohi servisu, toos nia lakohi tama, natar lakohi tama, fila-liman nia lakohi halo, ne’e tanba osan subisdiu ne’e kada tinan permanente.

Deputada Olinda Gurerrs, sujere governu tenke tama-sai uma, hodi haree no identifika didi’ak sé mak merese atu simu osan ka subsídiu ida ne’e. La’ós dehan ema hotu-hotu simu, ida ne’e nia la aseita.

Lee Mós : Subsídiu Universál “Fim do Ano” Insultu Bá Povu Ki’ik, KM Re-afirma Desizaun Atribui Bá Uma-Kain Hotu

Jornalista: Rogério Pereira Cárceres