Hatutan.com, (06 Outubru 2022), Díli- Primeiru-Ministru (PM), Taur Matan Ruak, afirma saláriu boot ($3000-$6.500) ne’ebé Governu oferese  bá kargu xefia sira iha Institutu Públiku (I.P) ho Empreza Públiku la’ós buat foun tamba iha Governasaun sira dahuluk mós aplika nune’e.

Lee Mós : Remunerasaun $6.500 Kada Fulan, Prezidente EDTL, E.P: “Husu Bá Ida-Ne’ebé Fó Servisu Ha’u”

Tabela salariál ka remunerasaun Kargu Xefia sira iha Institutu Públiku ho Empreza Públiku ne’ebé viral iha Facebook.

“Agora se imi husu ita iha hanoin polítika atu aban bainrua hadi’a, ha’u hanoin tenke hadi’a. Porezemplu Xefe Estadu iha Palásiu Prezidensiál la husik nia funsionáriu ida manán (saláriu) liu-nia, ne’e mós mensajen ida,” Taur Matan Ruak hateten hodi responde jornalista sira hafoin hasoru-malu ho Prezidente Repúblika (PR), José Ramos-Horta iha Palásiu Prezidensiál, Díli, Kinta (06/10/2022).

Daudaun ne’e, prezidente ka kargu xefia sira hosi empreza públiku ho institutu publika simu saláriu boot liu Primeiru-Ministru no Prezidente Repúblika. Ezemplu Prezidente Eletrisidade Timor Leste Empreza Públiku (EDTL,E.P) nia saláriu ka remunerasaun kada fulan $6.500. nune’e mós ho Prezidente Bee Timor-Leste (BTL,E.P) nia remunerasaun kada fulan $6000.

Advertisement

  Liuhosi sorumutuk PM Taur ho PR Ramos-Horta ne’e ko’alia uitoan kona-bá preparativus sira  liga ho Orsamentu Jerál Estadu  tinan 2023 nian, hanesan públiku hatene katak iha loron  03 fulan-Outubru,Ggovernu liu husi Ministériu Finansas entrega tiha ona Proposta Lei OJE 2023 nian bá Parlamentu Nasionál ho montante osan billaun $3,16 .

Estadu Preokupa mós situasaun timoroan iha Portugál

PM Taur Hasoru-Malu ho PR Ramos-Horta, Kinta (06/10/2022). Foto/Elio dos Santos da Costa

PM Taur Matan Ruak subliña Asuntu ida seluk ne’ebé sai mos preokupasaun Estadu no Governu nian mak situasaun joven timoroan iha Portugál, triste loos tanba ema sira ne’ebé organiza tiha timoroan sira ba Portugál hela de’it situasaun ida difisil.

“Ita daudaun ne’e akompaña hela situasaun iha Portugál hodi halo identifikasaun se mak husik joven sira ne’e bá, no bainhira bá sira iha kontratu ruma ka, la’o naran de’it ka oinsá?.” Taur Matan Ruak preokupa.

Taur hateten, Governu bele haree saida mak Governu bele ajuda, no husu ba joven sira atu pasiénsia uitoan, tanba hanesan joven sira hatene ho nasaun sira ne’ebé Estadu no Governu laiha akordu ne’e komplikadu liu, mesmu iha nasaun sira ne’ebé Timor-Leste iha akordu ne’e mós  tenke tuir prosesu ida, satan ida ne’ebé laiha akordu.

“Timor Leste agora iha akordu servisu hamutuk atu haruka traballadór mak Austrália, no Korea du Súl, restu ita tenta hetan akordu atu asegura direitu, regalia no priviléjiu ne’ebé sidadaun sira iha direitu, tanba bainhira laiha akordu protesaun sei laiha, tanba governu ho governu laiha akordu no bainhira inisiativa sidadaun nian rasik ne’ebé deside an bá tuir lei nia rasik responsabiliza ninia an totalmente, tanba ne’e desizaun pesoál no ida-ne’e mak problema ne’ebé oras ne’e daudaun joven sira enfrenta Portugál,” Taur hateten.

Advertisement

Jornalista: Vito Salvadór

Advertisement