Hatutan.com, (07 Outubru 2022), Díli- Konsellu Superior Defeza no Seguransa (KSDS), Sesta (07/10/2022), iha Palásiu Prezidensiál, hala’o sorumutuk hodi diskute no buka solusaun bá situasaun timoroan lubun ne’ebé “abandona” hela iha jardín sira iha sidade Lisboa no iha fatin seluk tan iha Portugal.

PR Ramos-Horta prezide reuniaun Konsellu Superior Defeza no Seguransa (KSDS) iha Palásiu Prezidensiál, Sesta (07/10/2022). Foto/Elio dos Santos da Costa

Prezidente Repúblika nu’udár mós Komandante Supremu Forsa Armada, José Ramos-Horta, fó orden  liuhosi reuniaun KSDS bá Polísia Sientífika Investigasaun Kriminál (PCIC, sigla portugés)   ho Polísia Nasionál Timor Leste (PNTL) hodi buka tuir ajénsia sira ne’ebé durante ne’e fasilita timoroan bá Portugál.  

Xefe Kaza Militár interinu Prezidénsia Repúblika, Majór Francisco da Silva informa reuniaun Konsellu Superior Defeza no Seguransa (KSDS) ne’ebé Prezidente Repúblika (PR), José Ramos-Horta halo ho membru sira atu bele buka solusaun no buka hatene ajensia sira ne’ebé fasilita Timoroan bá Portugál.

Nia dehan rezumu hosi reuniaun KSDS) ne’e maka Xefe Estadu preokupa tebes ho situasaun Timoroan sira iha rai li’ur liu-liu iha Portugál tanba de’it ho ajénsia sira ne’ebé opera iha Díli laran bosok sidadaun sira dehan atu servisu iha rai li’ur no manán osan di’ak, maibé ikus mai Timoroan sai vitima bá lia bosok sira ne’e.

Ho ida ne’e mak Prezidente Repúblika konvida Polísia Sientífiku Investigasaun Kriminál (PCIC sigla portugés), Polísia Nasionál Timor-Leste (PNTL) inklui membru sira KSDS atu rona sira nia hanoin kona-bá situasaun ida ne’e.

“Iha enkontru ida ne’e ko’alia loloos kona-bá ita nia sidadaun sira ne’ebé kuaze rihun lima resin oras ne’e iha hela li’ur tanba de’it atu bá servisu, ho de’it liafuan bosok hosi ajénsia sira halo Timoroan hirak ne’e terus hela iha ema nia rain. Entaun Timoroan sira mak sai vitima,” Majór Francisco da Silva hateten.

Ajénsia sira ne’ebé servisu iha rai laran ne’e, Xefe Estadu  konsidera katak sira ne’e bosok servisu hamutuk ho ajénsia ne’ebé trata billeti ne’e halo hosi Timor ba to’o iha li’ur, no kontinuasaun laiha nune’e difikulta Timoroan sira atu fila hikas mai Timor-Leste la di’ak.

“Ita nia sidadaun sira tauk atu fila tanba de’it sira husu osan iha familia ka kolega sira no impresta osan ho montante $2000 to’o $3000, no ho garantia ida katak osan ne’ebé sira foti bá iha Portugál servisu manán osan di’ak fila mai atu selu fali, maibé iha realidade situasaun iha Portugál oin-seluk no halo Timoroan sira ne’e ta’uk atu fila,” nia  hateten.

“Agora iha sidadaun na’in 20 mak fila ona, na’in-7 mai hosi Abudabi no na’in-13 mai husi Malázia, no oras ne’e sira iha ona Timor no ita la hatene se-se tanba ita la identifika, maibé PCIC no autoridade kompetente mak sei hatene,” Nia subliña.

Ho situasaun sira ne’ebé Timoroan infrenta iha Portugál, Governu sei buka meius oinsá atu lori fila fali sidadaun sira ne’e mai Timor Leste.

Jornalista: Vito Salvadór