Hatutan.com, (08 Outubru 2022), Díli—Atleta Internasionál hosi Kenya, Anderson Saitoti Seroi okupa primeiru lugar ba Full Maratona (42 KM).

Atleta Internasionál hosi Kenya, Anderson Saitoti Seroi ne’ebé okupa primeiru lugar ba Full Maratona (42 KM).

Kompetisaun ne’e iha modalidade tolu hanesan kompetisaun maratona ho distánsia kilómetru 10, 21 no 42.

Lee Mós: Dili Internasionál Maratona Promove Pás

Iha modalidade maratona ho distánsia kilómetru 42 iha nível internasionál vensedór dahuluk no daruak okupa hosi atleta na’in rua hosi Kenya no vensedór datoluk maka atleta Timoroan, Felisberto de Deus.

Atleta Anderson Saitoti Seroi konsidera eventu Díli Internasionál Maratona nakonu ho dame tanba Xefe Estadu rasik hato’o ona mensajen iha inísiu molok atleta sira hahú kompetisaun hodi dehan katak, maratona ida-ne’e nia objetivu prinsipál atu hametin dame no atleta sira bele sai erói foun oinsa lori pás ba mundu no sisiedade ne’ebé nia hela ba.

“Há’u kontente hetan primeiru lugar, ha’u mós haksolok tanba povu TL familiár loos ho desportu atletizmu. Ema barak mai haree ami halai no iha dalan sira sempre fó aplaus ba ami,” Anderson Saitoti Seroi hateten.

Situasaun klimátika iha TL mós manas makaas tanba ne’e halo nia tenke esforsu an adapta ho di’ak atu nune’e bele atinze nia objetivu hodi konkista vitória.

Atleta hosi nasaun Kenya ne’e mós promete atu iha tinan oin sei mai hikas TL hodi partisipa iha eventu Díli Internasionál Maratona.

James Karanja hosi nasaun Kenya ne’ebé hetan segundu lugar iha Díli Internasionál Maratona.

Iha fatin hanesan, James Karanja hosi nasaun Kenya ne’ebé mós hetan segundu lugar hateten ninia preparasaun ladun máximu tanba iha loron hirak liubá foin halai iha Makasar Maratona iha Indonézia maibé halo esforsu maximu hodi konkista vitória.

Foin ba dala uluk nia partisipa iha Díli Internasionál Maratona, nune’e sai hanesan esperiénsia ida atu nia bele halo esforsu liután iha kompetisaun Internasionál sira ne’ebé nia sei partisipa.

“Ha’u kontente hetan segundu lugar ba kategoria full Maratona, no ha’u sei hadi’a atu manan iha futuru,” James Karanja hateten.

Hafoin eventu Díli Internasionál Maratona nia ho kolega sira hosi Kenya sei fila hikas ba Indonézia atu partisipa iha Jakarta Maratona no remata hosi ne’ebá mak fila hikas ba Kenya.

Atleta Timoroan Felisberto de Deus kumprimenta hela Prezidente Repúblika José Ramos Horta iha eventu Internasionál Dili Maratona, Sábadu (08/10/2022). Foto/Média PM.

Iha fatin hanesan Prezidente Repúblika (PR), José Ramos-Horta konsidera eventu Díli Internasionál Maratona nu’udár meius ida atu hametin Fraternidade Umana hodi garante pás no hametin Rekonsiliasaun mundiál.

Díli Internasionál Maratona nu’udár kompetisaun ba hametin dame no kompetisaun ba enterteinamentu hodi hatudu atrasaun ba mundu katak, Timor-Leste (TL) la’o dadaun iha moris di’ak no iha dame.

“Inisiativa Díli Internasionál Maratona ne’e parseria ho Governu, Primeiru Ministru no Gabinete Sekretáriu Estadu Juventude no Desportu, seitór privadu no média sira atu fó entertenamentu ba povu. Liu hosi desportu kontribui ba marketing diplomátiku, polítiku no turístiku TL nian,” Ramos-Horta hateten bainhira partisipa eventu Díli Internasionál Maratona iha Palásiu Prezidensiál Nicolau Lobato Bairru-Pité, Sábadu (08/10/2022).

Liu hosi atividade ka eventu Díli Internasionál Maratona timoroan sira iha liur inklui ema seluk bele haree TL hanesan rai ida iha domin, pás, laiha violénsia tanba mundu ho problema barak loos, TL tenke buka hakle’an liután dame no rekonsiliasaun. Tamba ne’e, Díli Internasionál Maratona sei kontinua hala’o no sei halo boot liu tán.

Prezidente Repúblika mós iha hanoin atu hahú hikas eventu Tour de Timor, maibé tanba atividade Tour de Timor komplikadu no presiza iha marketing ida boot hodi bele lori ema barak liu tán mai TL.

Tamba ne’e, sei iha planu atu hamoris hikas, maibé ho hanoin ida oinsa bele koordena ho Governu Indonézia liu-liu ho parte Nusa Tenggara Timur atu haree posibilidade sira.

“Ita hanoin atu halo Tour de Timor ida ne’ebé bele hahú hosi kupang ka Rote ba to’o kedan iha Tutuala, no ida ne’e sei halo parseria ho governu NTT kompletu,” Ramos-Horta subliña.

Xefe Estadu mós iha hanoin atu apoia federasaun desportiva sira halo mobilizasaun ba sira atu bele halo servisu ida di’ak ba komunidade.

Xefe Estadu sei kontinua ho atividade seluk hodi promove pás mak hanesan sei realiza festivál kafé, festivál múzika kultura Ataúro no iha fulan Dezembru sei iha festivál prezépiu ba Natal nian.

Kompetisaun ne’e hetan partisipasaun másimu hosi komunidade, estudante, labarik, Ema ho Difisiénsia, embaixadores no komunidade internasionál sira.

Kompetisaun ne’e organiza hosi Gabinete Prezidente Repúblika no Governu ne’ebé hetan apoiu hosi Timor Telekom, Telemor, Telkomsel, Air Timor, Dili Medical Center (DMC), BNCTL no seluk tán.

Iha eventu Díli Internasionál Maratona ne’e Primeiru Ministru Taur Matan Ruak no Sekretáriu Estadu Juventude no Desportu hamutuk ho estudante sira partisipa iha Fun Run ho kilometru tolu no observasaun Hatutan.com haree katak Primeiru Ministru Taur Matan Ruak maske idade ona maibé halo esforsu hotu hodi finaliza Fun Run ne’e ho susesu no to’o hikas iha liña finál ho susesu.

Atribuisaun Prémiu

Prezidente Repúblika, José Ramos-Horta ho Sekretáriu Estadu Juventude no Desportu, Abrão Saldanha hamutuk ho kórpu diplomátiku sira mak ofisialmente entrega prémiu ba manán-na’in sira-ne’ebé kompete iha Dili International Marathon bá kategoria nasionál no internasionál.

Prémiu bá atleta paralímpiku ba kategória km 10, ba atleta mane okupa husi atleta Teófilo Freitas no feto Dircia Fátima Amaral ba ketegória km 10.

Prémiu no osan ne’ebé mak atribui ba kuartu klassifikadu to’o primeiru klassifikadu mak $250 to’o $1000.

Rute ne’ebé atleta sira kobre hahú ba km 10, hahú hosi Palásiu Prezidensiál nia oin bá rotunda Prezidente Nicolau Lobato, tasi ibun Praia dos Coqueiros to’o Palásiu Prezidensiál.

Prémiu ba atleta hosi kategória nasionál bá km 21 ba modalidade feto no mane, simu osan ho taxa, kuartu lugar to’o primeiru lugar simu prémiu ho osan ho valor hosi $250 to’o $1.000.

Prémiu ba atleta ba kategória internasionál hosi modalidade 21 km ba mane no feto hosi sestu klassifikadu to’o primeiru klassifikadu simu taxa no osan hosi $800 to’o $2.000.

Nune’e mós prémiu ba atleta kategória nasionál ba kategória 21 km ba mane no feto primeiru lugar to’o sestu lugar mós hetan taxa ho osan ho valór hanesan mós ho atleta huis kategória internasionál nian.

Rute bá kategoria km 21 hahú hosi Palásiu Prezidensiál ba rotunda Prezidente Nicolau Lobato ba Praia dos Coqeiros, Palásiu governu no Palásiu Prezidensiál.

Atleta kategoria full maratona internasional ba kategoria 42 km primeiru lugar feto ho mane okupa hosi atleta husi nasaun Kenya, Seroi Anderson Saitoti no Chesan Shelia Jepkosgel. Kategoria nasionál okupa hosi Felisberto de Deus no Angela Freitas de F. Araújo.

Prémiu atleta kategoria full maratona nasionál no internasionál hosi modalidade 42 km feto no mane hosi primeiru lugar to’o terseiru lugar hetan osan ho valor $3.000 to’o $4.000, enkuantu ba kuartu lugar no kintu lugar hetan ho montante $1.500 to’o $2.000.

Rute bá kategoria km 42 mak fó volta dala rua hosi Palásiu Prezidensiál ba rotunda Prezidente Nicolao Lobato ba Praia dos Coqeiros, Palásiu governu no Palásiu Prezidensiál.

Vensedór ba taxa rotativa internasional feto no mane okupa hosi nasaun Kenya mak hanesan, Seroi Anderson Saitoti no Chesan Shelia Jepkosgel no osan ho montante $2.000.

Dili International Marathon partisipa hosi atleta Indonézia, Portugál, Kenya, Indonésia no mós Timor-Leste.

Jornalista: Vito Salvadór