Hatutan.com, (07 Outubru 2022), Díli- Prezidensia Repúblika organiza eventu Díli Internasionál Maratona ho objetivu atu promove pás no unidade nasionál Timor-Leste nian bá mundu.

Komisaun Organizadora Dili Maratona. Foto/Elio dos Santos da Costa

Adjunta Kaza Sivil Prezidénsia Repúblika, Henriqueta Maria da Silva ba jornalista sira liuhosi konferensia imprensa ne’ebé halao iha Palásiu Prezidensiál, Sesta (07/10/2022), hateten Prezidente Repúblika (PR), José Ramos-Horta iha inisiativa atu halo Dili Internasionál Maratona ho objetivu atu hametin pás, unidade iha rai ida-ne’e mós atu promove Timor-Leste bá mundu liu hosi área Desportu no mós Turizmu.

“Eventu Dili Internasionál Maratona sai hanesan eventu internasionál bá dahuluk hafoin Timor-Leste hakur liu pandémia Covid-19 no atleta hamutuk 1.300 husi rai-laran no rai-li’ur mak sei partisipa iha eventu Dili Internasionál Maratona.” Henriqueta Maria da Silva hateten.

Dili Internasionál Maratona ne’e servisu hamutuk entre Palásiu Prezidensiál no Governu inklui mós patrosinadór sira hanesan Telkomcel, Timor Telecom, RMS no mos setór privadu sira seluk.

Advertisement

Iha fatin hanesan Sekretáriu Estadu Juventude no Desportu (SEJD) Abrão Saldanha hateten, depois Timor-Leste tama iha krize sanitária Covid-19 impkatu boot liu mak bá atividade Desportu no oras ne’e Dili Internasionál Maratona sai hanesan primeira atividade desportiva ho dimensaun internasionál ne’ebé halo iha Timor Leste espesiál Dili.

“Durante pandémia Covid-19 Timor Leste halo esforsu hodi ba partisipa atividade desportiva lubuk ida iha li’ur no iha prestasaun di’ak balun ne’ebé SEJD rejista no intermus iha rai laran Timor Leste foin primeiravez realiza fila fali eventu internasionál sira nune’e,” Abrão Saldanha hateten.

Governu sei haree posibilidade sira ne’ebé ita iha hodi organiza eventu desportiva sira no oinsá halo barak liu tan eventu internasionál iha Timor Leste.

Iha eventu Díli Internasionál Maratona Parte governu liu husi SEJD prevee orsamentu ba Dili Internasionál Maratona hamutuk $21,600.00.

Entertantu Komandante Operasionál PNTL, Pedro Belo hateteb Kona-ba seguransa nian loron hirak liu ba husi parte relasaun PNTL nian fó sai ona intermus seguransa ba Hotel fatin atleta sira hela, inklui seguransa enjerál liga ho terrenu fatin sira ne’ebé atleta sira volta.

Advertisement

Kona-ba aban ninian ami nia diretiva operasaun fó sai tiha ona ba Komandante sira no membru sira ne’ebé envolve direita no inditeita ba iha eventu Dili Internasionál Maratona nian ne’ebé sei hahú iha tuku 06:00 otl dader no hanesan seguransa hatene ona iha oras saida mak sei mantein iha fatin ne’ebé Komandu koloka ona tuir diretiva operasaun.

“Rote sira ne’ebé atleta sira sei liu Komandu PNTL koloka ona membru seguransa sira iha ne’eba atu komunidade hotu-hotu bele kolabora liu-liu ba motorista sira ne’ebé lori karreta no motor atu koopera ho ita nia polísia ne’ebé koloka iha dalan sira ne’e hodi nune’e labele atrapalla ba alteta sira ne’ebé atu halai liu.” Pedro Belo hateten.

Nia hatutan parte seguransa garante no 100% apoiu seguransa ba eventu internasionál ida ne’e no hanoin katak kona-ba seguransa sei laiha problema, tanba planu ne’e feitu tiha ona no hotu-hotu iha preparasaun fiziku mentál di’ak hodi asegura eventu ne’e la’o ho susesu.

Atleta Internasionál husi Kupang Afriana Paijo hatete, nia kontente bele partisipa iha eventu internasionál ida ne’e no preparasaun di’ak no sei esforsu atu oferese rezultadu ida ne’ebé di’ak ba nia nasaun Indonézia.

“Ha’u mai tuir eventu ne’e ba dala tolu ona, antes ne’e ha’u mai tuir eventu Xanana Cup no ikus liu iha tinan 2016 ha’u halai iha modalidade Half Maratona no hetan terseiru lugar no tinan ida ne’e iha Dili Internasionál Maratona ha’u nia eseperansa bele hetan rezultadu di’ak no ha’u rasik sei kompete iha klase 21 kilometru.” Afriana Paijo hateten.

Advertisement

Atu fo hanoin katak iha modalidade Díli Internasionál Maratona atleta sira sei kompete iha klasse 3 km, 10 km, 21 km no 42 km. Rute ne’ebé atleta sira sei kobre mak hahu husi palasiu prezidensial ba kuarte Fatuhada no fila hikas ba Palásiu Prezidensiál ne’e ba kategoria 3 km, ba 10 km hahu husi pálasiu prezidensial ba rotunda Prezidente Nicolao Lobato, tasi ibun Pantai kelapa mandarin fila mai remata iha palasiu prezidensial no ba kategoria 21 km hahu husi palasiu prezidensial ba rotunda Prezidente Nicolao Lobato ba pantai kelapa tuir tasi ibun ba palasiu governu no fila hikas mai rema iha palasiu prezidensial no ikus liu ba 42 km sei fo volta dala rua ho rute ne’ebé hanesan ho 21 km.

Tasa ba manan nain ba kategoria Internasionál no nasional ho montante orsamentu hahu husi $4000 ba primeiru lugar tuir fali mai too iha klasifikasaun sira ikus liu ne’ebé sei iha direitu ba $2000.

Jornalista: Vito Salvadór

Advertisement