Hatutan.com, (14 Outubru 2022), Díli- Kordenador Jeral Ministériu Solidaridade Sosiál no Inkluzaun (MSSI) bá Apoiu Tékniku Subsídiu Uma-Kain, João Coimbra hateten, benefisiáriu bá subsídiu uma-kain fim do ano $200 tinan 2022 hamutuk família uma kain 339,706.

Lee Mós : Prezidente Repúblika Sei La Simu Subsídiu “Fim do Ano” no Husu Governu Atribui Bá Povu Vulnerável

Kordenador Jeral Ministériu Solidaridade Sosiál no Inkluzaun (MSSI) bá Apoiu Tékniku Subsídiu Uma-Kain, João Coimbra. Foto/Elio dos Santos da Costa

Baze Legal bá implementasaun subsídiu bá uma-kain  tinan 2022 ne’e mak Dekretu Lei Númeru 37/2022 ne’ebé maka iha loron 12 fulan-Outubru hetan tan alterasaun ida  hosi Konsellu Ministru molok lori  fali bá Prezidente Repúblika halo promulgasaun.

Dekretu lei ne’e  rasik liga mós ho opiniaun  hosi entidade lubuk ida durante  ne’e kuaze ema  diskute barak liu kona-bá alvu maka se no se mak sai alvu bá pagamentu subsídiu ne’e, iha Inisiu  Dekretu lei ne’e  koalia kona-ba uma kain no koalia mós  kona-ba ema kbi’it laek, maibé depois nota katak iha Konsellu Ministrus aprova katak subsidiu ne’e sei fornese bá  uma kain hot-hotu, talves eskluidu  maka Órgaun Soberania sira.

Advertisement

“Ema ne’ebé labele simu subsídiu ne’e maka ema sira ne’ebé ho vontade lakohi rasik atu simu ka rezeita atu simu, no ida seluk maka iha tempu ne’ebé pagamentu ema ka família uma-kain ne’e la iha fatin, karik nia iha hela rai-li’ur, ema ruma la bele reprezenta nia sira ne’e maka lakon sira nia diretu. Maibé, bá sira ne’ebé maka iha loron to’o pagamentu sira hela iha sira nia suku, sira maka sei hetan sira nia diretu bá pagamentu,” Koordenadór Jerál apoiu Tékniku bá Subsídiu Uma-Kain João Coimbra bá Hatutan.com iha nia knar fatin MSSI, Caicoli, Díli, Sesta (14/10/2022).

Últimu dadus ne’ebé maka iha Sekretariadu tékniku Subsidiu uma-kain nia liaman,  ne’ebé maka servisu hamutuk ho Ministeiru  Administrasaun Estatal (MAE) hodi bele hetan dadus ne’e  hamutuk 339,706  um- kain  iha nivel nasionál ne’ebé sei sai  benefisiáriu ba pagamentu subsídiu uma-kain fim do ano.

Kona-ba preparasaun, hafoin Dekretu lei ne’e promulga  iha Maiu, Ministeiru Solidariedade Sosial no Inkluzaun (MSSI), hamutuk ho MAE, establese Sekretariadu Tekniku  para depois bele hahu haree  halo preparasaun, tamba presiza prepara kondisaun  para depois bele  implementa programa ne’e iha terrenu.

“Dadaun ne’e  ami to’o ona iha faze ida produsaun bá lista pagamentu, la’o daudauk ona, espera katak semana oin, ami finaliza ona  lista dukumentu hirak ne’e atu nune’e bele desloka fali bá munisípiu sira,”  João Coimbra hateten.

MSSI sei selu diretamente  bá xefe  família, hanesan mós bele selu direta bá sira, maibé parte sekretariadu kontrola mós ba rezistu online hodi bele halo rezistu bá tablet, uza aplikasaun ruma para bele hatene  real time  hirak mak simu  no hirak mak seidauk simu, hein katak munisípiu ne’ebé maka seidauk hotu bele kontrola husi ne’eba.

Advertisement

Sekretariadu Tékniku Husu Viatura 248

Atu fasilita servisu Sekretariadu Tékniku Subsídiu Uma-Kain nian hodi desloka bá munisípiu, sekretariadu ne’e tenta hela  ba Ministériu Finansa para  depois bele hetan apoia transporte hosi dirasaun Jeral Patrimoniu Estadu, no parte Sekretariadu no diresaun jeral patrimóniu estadu iha ona konvokatoriu ida, hodi aprezenta ona lista nesesidade viatura ne’ebé Sekretariadu tékniku apoiu subsídiu uma-kain nesesita.

Sekretariadu tenta halo exersisiu ida nune’e la bele halo gastu barak tamba ne’e tuir planu presiza viatura 248 para bele apoiu implementasaun programa ne’e  depende agora kapasidade  Dirasaun Geral Patrimoniu Estadu  nia atu apoiu hira, se sira apoiu barak liu diak liu tan, se apoiu menus konserteza Sekretariadu tenke rekolla tan uitoan bá alugér viatura.

Kona-bá kalendáriu bá selu subsídiu uma-kain hanesan Ministra Solidariedade Sosiál no Inkluzaun  ho vise-ministra rasik deklara ona katak  sei halo iha loron 16 fulan-Novembru 2022, hahú halo iha nivel  hot-hotu no deslokasaun ekipa tékniku ba munisípiu no postu sira inklui suku hotu parese nia deslokasaun  iha loron rua bá leten antes ekipa  tenki dezloka ona ba munisípiu  halo koordenasaun  ho munisípiu sira para  depois  iha loron 16 fulan-Novembru bele ona halo pagamentu.

 Osan Subsídiu Diretamente Transfere Bá Konta Bankária Suku Nian

Advertisement

Koordenadór Jerál bá Apoiu Tékniku Subsídiu Uma-Kain, relata katak osan bâ subsídiu uma-kain nian sei transfere direita bá konta bankária Xefe Suku sira nian liuhosi BNCTL.

Osan subsídiu nian sei tama bá konta  suku  atu fasilita sira hodi halo levantamentu iha suku hodi halo pagamentu. Nune’e, ekipa tékniku hosi MSSI sei servisu hamutuk ho BNCTL  para  haree posiblidade BNCTL mobeliza fundus ne’e  to’o Nivel Postu atu Xefe Suku sira sei pagamentu.

“Ami nia esperiénsia ne’e  hanorin ami buat barak, mak ita-nia  Xefe Suku sira, sira fó duni responsabilidade boot sira mak sei bá halo levantamentu Fundus  loron ida antes pagamentu  iha Postu Administrativu sira, BNCTL sira maka foti osan mai  para depois sira asegura hodi halo pagamentu,”  nia tenik.

Bainhira pagamentu remata, osan restu ne’ebé iha sei devolve bá Kofre Estadu liuhosi dalan legal balun tuir prosedimentu ne’ebé iha mak hanesan Xefe Suku rasik ho nia ekipa  pagamentu sira rasik mak sei bá entrega fil-fali  bá iha konta Suku iha BNCTL nian.

“Esperiénsia ida Covid-19 ne’e hatudu katak  sira-nia responsabilidade ida boot tebes ne’ebe mak ema hotu la espera momentu ne’e ema hotu tauk  katak sasán bele lao naksalak, maibé  Xefe Suku hatene saida maka  nia sei halo  ne’ebé la iha mekanismu seluk Xefe Suku ho nia ekipa tenki lori fila osan ne’e bá Banku BNCTL munisípiu nian,” Koordenadór Jerál ba Sekretariadu Tékniku Subsídiu Uma-Kain tinan 2022 ne’e haktuir tan.

Advertisement

Nia parte prontu atu kooperaa ho entidades hotu liuliu liga bá makaer desizaun sira, tamba Sekretariadu ne’e  nivel implementadór asuntu ne’ebé maka agora sai preokupasaun públiku no halo ema hotu preukupa ne’e liga bá hakotu lia, se sira hakotu lia  katak esklui ida ne’e, esklui ida ne’eba, Sekretariadu ajusta deit no sei la impoin.

“Ho tempu ne’ebé naton ita sei aprezenta hotu bá  makaer desizaun sira nia koñesimentu kona-bá mós bá tempu  ne’ebé maka ita bele halo pagamentu  no ita sei aprezenta fila-fali para bele hetan fali orientasaun ida. Ami labele adia fali katak tenpu ne’e la to’o, maibe tenke halo analiza ida di’ak para depois sei ezekuta kualker medidas no orientasaun  politikamente  no programa ne’e bele lao,”  João Coimbra hateten..

Jornalista: Vito Salvadór

Advertisement