Hatutan.com (20 Outubru 2023), Díli—Ajénsia INCANTO Group rekruta ona traballadór Timoroan na’in-12 atu haruka bá servisu iha Uniaun Emiradu Árabe (UEA) iha tinan kotuk, maibé tanba problema kaderneta passaporte laiha, nune’e oras-ne’e daudaun ajénsia ne’e prepara ona atu haruka sira bá servisu iha fulan Novembru tinan 2023.

Diretór Ajensia INCANTO Group, Joanico Jerónimo. Foto: Tome da Silva.

Traballadór Timoroan na’in-12 ne’e Ajénsia INCANTO rekruta atu bá servisu iha nasaun lima mak hanesan, Abu Dhabi, Qatar, Vai, Sarza no Kwait.

Lee Mós: Ramos-Horta Kontente Tanba Traballadora Timoroan Ne’ebé Empreza INCANTO Rekruta Servisu Seguru iha Abu Dhabi

“Ita iha problema ida ne’ebé daudaun ne’e paradu hela, tanba ne’e fulan Novembru tinan ne’e ita kontinua fali halo kontratu bá traballadór sira bá servisu iha nasaun hirak ne’e,” Diretór Ajénsia INCANTO Group, Joanico Jerónimo hateten bá Hatutan.com iha knaar fatin Lecidere, Sesta (20/10/2023).

Fulan hirak nia laran la halo rekrutamentu tanba, traballadór sira ne’ebé bá servisu iha rai li’ur, balun la hatene funsaun tuir kontratu ne’ebé mak kontrata ona, balun fali bá to’o iha ne’ebá hakarak fila-fali, balun mós tanba moras ne’ebé labele detekta iha HNGV, maibé to’o ema nia rain mak foin hetan, entaun ida-ne’e afeta bá Ajénsia sira nia servisu.

“Hirak ne’ebé mak hakarak fila-fali ne’e, tuir ajénsia nia avaliasaun, parese traballadór balun la-dun toman ambiente. Maibé ida-ne’e problema pessoál. Ladun di’ak tanba molok bá servisu ne’e, kontratu ofisiál iha ona, saláriu no fatin ne’e mesionadu hotu ona. Tanba ne’e la’ós illegál,” nia hateten.

Standar saláriu iha média list ne’e daudaun INCANTO Group haruka traballadór sira bá ne’e ho kategoria un-skill. Entaun, saláriu mós tenke tuir ida-ne’e, tuir loloos saláriu ne’e kuaze $1.200, maibé ko’a bá apartament, han meudia, transporte no sira seluk, entaun hirak ne’e hotu maka traballadór sira simu de’it $300 aumenta ho overtime ne’ebé traballadór sira hala’o, entaun ne’e bele sa’e to’o $400.

Tuir nia, problema maka bainhira traballadór sira to’o ne’ebá no detekta moras maka fatin ka apartament, tikete no sira seluk ne’e ajénsia mak cover fila-fali.

Ho ida-ne’e Ajénsia sente lakon osan barak, entaun daudaun ne’e Ajénsia review fali jestaun hodi hahú fila-fali ho razaun ne’e maka INCANTO Group hahú rekruta fali traballdór sira iha fulan Novembru ne’e.

Ba rektrumentu traballadór iha fulan Novembru nian ne’e, iha media list iha nasaun hitu ne’ebé hola parte hosi nasaun UEA, sira persiza traballadór kuaze semana-semana no fulan hela de’it, la mensiona númeru mane hira feto hira, depende de’it kandidatu ne’ebé iha kapasidade bele liu maka bá.

Iha esperiénsia tinan kotuk nian, bainhira Ajénsia hahú halo entrevista bá kandidatu sira iha na’in 100, sira ne’ebé mak liu iha na’in 5 de’it, signifika presiza liu ema sira ne’ebé mak iha kapasidade, liu-liu ba lingua Inglés no sira seluk tán.

INCANTO Group rekruta traballadór sira ne’e bá servisu to’o tinan rua tenke fila mai Timor, tanba  objetivu prinsipál maka, bainhira traballadór hirak ne’e fila, iha ona karákter foun, esperiénsia foun atu dezenvolve nasaun ida-ne’e.

“Liu-liu sira bele prienxe área ospitalidade hanesan otelaria, restaurante ho nia padraun ne’ebé di’ak,” nia afirma.

Projetu ida-ne’e INCANTO Group hahú iha tinan 2022, bainhira expo Dubai hahú, INCANTO elabora no kolleta dokumentus hafoin halo entrevista bá timoan sira, nune’e maka mai to’o ohin loron, konsege haruka ona Timoroan balun bá servisu iha UEA.

Nasaun lima ne’ebé maka fornese servisu bá Timor oan sira mak hanesan, Abu Dhabi, Kwait, Dubai, Qatar no Sarza iha área ospitalidade, hanesan restaurante no supermerkadu nian, maibé hosi númeru ne’e na’in-tolu maka fila tanba kondisaun la di’ak.

Timoroan sira rekrutadu bazeia bá esperiénsia ne’ebé mak durante ne’e iha, Joven Timoroan sira iha rai laran, maioria skill sei mukit tebes, entaun INCANTO Group servisu hamutuk ho intelekuais Timoroan no akademiku sira, harii organizasaun ida ho naran INCANTO Internasional Institute.

Institute ne’e servisu hamutuk ho Cambrish Linguage Acesment no Siting Wich ho objetivu, atu traballadór sira ne’ebé mak atu bá, haruka tuir formasaun antes bá servisu iha rai liur.

Espera iha fulan oin INCANTO Group bele lansa hodi hahú servisu ho SEFOPE oinsá kapasita Timoroan sira molok bá servisu iha rai li’ur.

Antes ne’e bainhira hala’o vizita ba Abu Dhabi, Prezidente Repúblika (PR), José Ramos-Horta konsege hala’o enkontru ho Traballadora Timoroan sira iha Abu Dhabi, no rona direta esperiénsia servisu ne’ebé hatudu katak, sira seguru tebes, no situasaun ne’e halo Xefe Estadu kontente ho Ajénsia INCANTO Group.

Jornalista: Gloria Maia