Hatutan.com, (16 Outubru 2022), Bobonaro—Governu ofisializa loron 16 fulan-Outubru, sai nu’udár Loron Nasionál bá Liberdade Imprénsa iha Timor-Leste, nune’e jornalista labele ta’uk atu fo sai kona-ba lia-loos.

Governu ofisializa loron 16 fulan-Outubru, sai nu’udár Loron Nasionál bá Liberdade Imprénsa iha Timor-Leste. Foto Hatutan.com/Rogério Pereira Cárceres.

Ofisializasaun ne’e hala’o iha ámbitu komemorasaun tinan 47 trajédia Balibo Five iha Balibo vila, ne’ebé partisipa direta hosi Ministru Prezidénsia no Konsellu Ministru (MPKM), Fidelis Magalhães, Ministru Adminiatrasaun Estatál (MAE), Lino Torrezão, hamutuk ho Conselho Imprénsa (CI), Centro Nacional Chega! (CNC), média no jornalista sira, inklui komunidade Postu Administrativu Balibo.

Lee Mós:Jornalista Timoroan Tenke Brani Defende Lia-loos, Tuir Espíritu Jornalista Balibo Five

Iha lansamentu loron nasionál bá Liberdade Imprénsa ne’e, parte sira enkoraza jornalista timoroan sira hotu, lalika ta’uk hodi fó sai lia-loos, liuhosi kobertura no produtu informasaun jornalístika.

Prezidente CI, Virgilio da Silva Guterres hateten ohin iha rai Balibo, rai ne’ebé iha tinan 47 liubá, timoroan sira, asuwain sira bá mate iha ne’ebá, tuba rai metin, atu defende dignidade povu Timor nian hodi dignifika povu Timor, atu luta bá hetan ninia Liberdade.

Balibo nu’udár rai ida ne’ebé mós iha tinan 47 liubá sai hanesan fatin bá expresaun politika, diferénsa politika, ema hotu bele haree iha monumentu ida ne’e, monumentu integrasaun, ne’ebé mós sai hanesan sasin moris bá Liberdade expresaun nian.

Katak, timoroan iha momentu ne’ebá, hafoin hetan liberdade, depois de revolusaun eskravu ka atan nian, iha Liberdade atu expresa sira nia hanoin diferente, hodi hanoin kona-bá oinsá determina destinu povu no rai timor ninian.

“Ita hamutuk iha rai Balibo, rai ne’ebé mak iha tinan 47 liubá, jornalista Australianu Greg Shackleton (29), hanaran knua naran laek, ne’ebé ke ema sei hanoin nafatin tinan bá tinan. Ohin, ita hamutuk iha ne’e, atu hahí no hanai, ema sira ne’ebé timoroan, nomós ema rai seluk ne’ebé ho Liberdade tomak, determina sira nia aan, atu saran aan bá soi Liberdade ne’ebé mak ohin loron ita hetan,” Virgilio da Silva Guterres, hateten durante intervensaun iha serimónia lansamentu Loron Nasionál Liberdade Imprénsa foin lalais ne’e, iha Sidade Vila Balibo.

Ohin, hamutuk iha fatin ida ne’e, hodi bá hahí liberdade, atu tane-aas liberdade, atu garante katak, sidadaun hothotu iha rai ida ne’e, nia liberdade tenke garantidu, liberdade atu koalia, liberdade atu expresa sira nia hanoin liuhosi manifestasaun, liberdade atu hetan asesu bá informasaun, liberdade atu hetan moris di’ak.

Tanba ne’e, Virgilio Guterres, lori CI nia naran hamutuk ho mós CHEGA! Hakarak agradese bá Estadu Timor-Leste, ne’ebé mak liuhosi Parlamentu Nasionál, aprova ona loron 16 fulan-outubru, hanesan loron nasional Liberdade de Imprénsa.

Liberdade Imprénsa, hanesan iis bá demokrasia ninian, iis hosi demokrasia nian, fuan ne’e maka liberdade de expresaun. Bainhira libredade imprénsa sei iha, ema bele dehan demokrasia ne’e sei moris.

Tanba ne’e, ohin, hosi fatin ida ne’e, CI hakarak hato’o mós solidariedade bá maluk jornalista sira hotu iha mundu tomak, iha ne’ebé de’it, liu-liu sira ne’ebé mak tenke mate, tanba buka lia-loos, solidariedade bá sira-nia familia.

Jornalista iha Mianmar, iha Palestina, iha Iráke, iha Afeganistaun, iha fatin konflitu, agora iha Ukraina, jornalista sira hotu, ne’ebé mak la’o ho sakrifísiu hanesan Greg Shackleton, Roger East, Sander Robert Toines, hanesan Agus Muliawan, ne’ebé mak husik sira nia rai, husik sira nia familia, bá rai seluk, atu buka lia-loos, atu lori lia-loos hato’o bá mundu tomak.

Bá jornalista timor sira, CI hakarak re-integra nia mensajen katak, maske ho kondisaun ne’ebé mak difísil jornalista sira enfrenta, maibé, husu atu keta lakon pasiénsia, atu kontinua luta, ho esforsu tomak, halo kobertura, atu serví nafatin povu Timor.

Iha fatin hanesan, Vise Ministru Administrasaun Estatál (MAE), Lino de Jesus Torrezão, hateten, tinan 47 liu ona, ohin, atu rekoñese loron ida ne’e, ema hotu bá hamutuk fali iha fatin ida ne’e, Balibo, no hodi bele hato’o Ónra bá klosan na’in-lima ne’ebé mak lakon sira nia vida, tanba Liberdade Imprénsa, no tanba hakarak defende lia-loos. Maske nune’e, parte hirak iha interese bá invazaun, no forsa agresór, hakarak taka netik sira nia ibun, atu lia-loos ne’e, labele fakar sai bá mundu.

Governante ne’e haree katak,  ho atividade hirak ne’ebé Ki hala’o, hahú hosi lansamentu feira-liberdade, ho fórum editorial, dezenvolvimentu média, lansamentu fatuk dahuluk Momentu Liberdade nian, to’o iha lansamentu Loron Nasionál Liberdade Imprénsa, no atribuisaun prémiu bá jornalista sira, sai hanesan pasu hirak ne’ebé mak bele tulun ema hotu, atu fó tempu, hodi bele hanoin hikas papél jornalista nian, ne’ebé mak importante bá progresu no dezenvolvimentu País ida ne’e nian.

“Karik ita hakarak demokrasia ne’e atu buras iha Timor-Leste, hodi ema hothotu bele respeita Liberdade imprénsa, defende lia-loos, no reforsa estadu de direitu, maka, ida ne’e hanesan momentu oportunu ida mai ita, atu refleta kona-bá essénsia hosi Liberdade de imprénsa,” Lino de Jesus Torrezão subliña.

Governante ne’e, konsidera katak, ho lansamentu loron nasionál bá Liberdade Imprénsa ne’e, sai nu’udár eventu ida ne’ebé nakonu ho inspirasaun, tanba bele sai hanesan momentu reflesaun ida bá ema hotu.

Iha biban ne’e, Jornalista Jornál INDEPENDENTE, Jacinto Fernandes Xavier agradese bá Governu liuhosi Parlamentu Nasionál, tanba deputadu sira deside no aprova ona loron 16 fulan-Outubru, sai nu’udár loron nasionál ida bá Liberdade Imprénsa iha Timor-Leste.

Hanesan jornalista timoroan ida, Jacinto Xavier  sente orgullu bá momentu ida ne’ebé selebra nia maluk jornalista estranjeiru na’in-lima nia loron mate tanba Jornalista internasionál sira ne’e, mai iha TL hala’o misaun ida hodi defende povu rai ne’e ninia luta bá liberdade.

“Hanesan jornalista ida, ita kontente no orgullu, maske ita triste tanba sira mate ona. Mais hosi sira nia mate ne’e ita hetan ona Liberdade. Entaun, ita orgullu bá ida ne’e,” Jacinto Xavier hateten.

Orgullu liután, tanba iha Domingu (16/10/2022), hanesan timoroan ida no espesialmente bá sira ne’ebé mak hala’o kna’ar hanesan jornalista, hodi sai autór bá halian lian-laek sira nia lian, ohin marka tán istória ida, ne’ebé mak komemora no inisia ho lansamentu bá Loron Nasionál Liberdade Imprénsa nian.

Jornalista: Rogério Pereira Cárceres