Hatutan.com, (16 Outubru 2022), Díli—Centro Nacional Chega (CNC), liu hosi ninia Prezidente Konsellu Administrasaun, Sisto dos Santos, iha Domingu 16 Outubru 2022  hamutuk ho reprezentante Governu liuhosi Ministru Prezidénsia Konsellu Ministru (MPKM), Fidelis Leite Magalhães hala’o lansamentu fatuk dahuluk bá Monumentu Liberdade, hodi dignifika timoroan hotu ninia sofrimentu ne’ebé akontese iha tempu pasadu, hosi 1975 to’o 1999.

Centro Nacional Chega (CNC), liu hosi ninia Prezidente Konsellu Administrasaun, Sisto dos Santos, iha Domingu 16 Outubru 2022 hamutuk ho reprezentante Governu liuhosi Ministru Prezidénsia Konsellu Ministru (MPKM), Fidelis Leite Magalhães hala’o lansamentu fatuk dahuluk bá Monumentu Liberdade, hodi dignifika timoroan hotu ninia sofrimentu ne’ebé akontese iha tempu pasadu, iha Balivo Vila, Domingu (16/10/2022). Foto Hatutan.com/Rogério Pereira Cárceres.

Sisto dos Santos hateten, ohin kompleta tinan 47 simbólikamente hatuur sinais ida nu’udár sasin monok bá sofrimentu no sakrifísiu lia-loos.

Lee Mós:CI Gasta $39.200 bá Komemorasaun Tinan 47 Trajédia Balibo V

Monumentu memoriál bá liberdade ida-ne’e, sai sasin ida entre pasadu, prezente mo futuru, hodi kontinua hametin Timoroan sira hotu nia solidariedade.

Solidariedade sobrevivente ema hirak ne’ebé mak dadaun ne’e goza liberdade, solidariedade povu Timor ho belun sira iha Austrália, Nova Zelándia, Reinu Britániku, nomós bá maluk hotu ne’ebé hamrook hela lia-loos, maibé lakon sira nia vida bá rai ida-ne’e, bá Timor-Leste nia Liberdade.

“Monumentu ida ne’e dedika bá sira atu dignifika sira nia sofrimentu hotu. Ita asegura katak, sofrimentu ida ne’ebé mak akontese iha pasadu, ita mós garante katak, sei la akontese tán iha ita nia rai, nomós iha rai seluk,” Sisto dos Santos hateten iha serimónia lansamentu fatuk dahuluk bá Monumentu Liberdade iha Balivo Vila, Domingu (16/10/2022).

CNC agradese tebes bá Conselho Imprénsa, bá autoridade hotuhotu, esforsu balun ne’ebé mak hahú ona, loos, katak seidauk másimu, maibé, presiza tebes ema hotu nia partisipasaun.

Monumentu momoriál ida ne’e, la’ós de’it, bá jornalista na’in-lima, maibé mós bá sira seluk ne’ebé mak lakon ona nia vida tomak no balun agora sei iha kondisaun vulnerável no mizerável nia laran, hirak ne’e, dignifika sira nia sakrifísiu tomak.

Iha biban hanesan, Ministru Prezidénsia Konsellu Ministru, Fidelis Manuel Leite Magalhães, dehan, serimónia lansamentu bá Monumentu Liberdade ida ne’e, sai hanesan komponente ida hosi pakote selebrasaun, ne’ebé mak marka iha lokraik ida-ne’e.

Portavóz Governu ne’e, rekoñese katak iha sesaun lubuk ida hosi atividade barak mak CNC ho CI hamutuk ho média, jornalista no komunidade sira en-jerál iha Balibo, hahú tiha ona, dezde kedan iha (13/10/2022).

Reprezentante Governu ne’e agradese bá CNC, ne’ebé mak aumenta tán inisiativa iha lokraik ninian, hodi bele kontinua garante katak, memória bele kontinua moris, hodi nune’e timoroan hotu kontinua hetan referénsia hosi monumentu sira, atu bele hateke bá pasadu, no aprende lisaun sira pasadu nian.

“Tanba ida ne’e, mai ita hahú ho inisiativa sesaun lokraik nian ne’e, atu fó hahalok lansamentu bá monument ida ne’e,” nia konvida.

Jornalista: Rogério Pereira Cárceres