Hatutan.com, (19 Outubru 2022), Díli—Autoridade seguransa no defeza sei blokeia traballadór timoroan sira ne’ebé fasilita hosi ajénsia ilegál atu bá servisu iha estranjeiru, nune’e asegura labele iha traballadór ilegál iha ema nia rain.

Xefe Kaza Militár Interinu Prezidénsia Repúblika, Maijór Francisco da Silva ho autoridade Seguransa no Defeza hanesan Polísia Nasionál Timor Leste (PNTL), Polísia Sientifika Investigasaun Kriminál (PSIK), Serbisu Nasionál Intelijénsia (SNI), FALINTIL Forsa Defeza Timor Leste (F-FDTL), Servisu Rejistu Verifikasaun Emprezariál (SERVE), inklui Komissaun Autoridade kona-bá Tráfiku Humanu hala’o enkontru hodi buka solusaun ba timoroan sira labele abndonadu iha estranjeiru, iha Palásiu Prezidensiál Bairru-Pité, Kuarta (19/10/2022).

Desizaun ne’e mai hosi rezultadu enkontru ne’ebé konvokadu hosi Xefe Kaza Militár Interinu Prezidénsia Repúblika Maijór Francisco da Silva ho autoridade Seguransa no Defeza hanesan Polísia Nasionál Timor Leste (PNTL), Polísia Sientifika Investigasaun Kriminál (PSIK), Serbisu Nasionál Intelijénsia (SNI), FALINTIL Forsa Defeza Timor Leste (F-FDTL), Servisu Rejistu Verifikasaun Emprezariál (SERVE), inklui Komissaun Autoridade kona-bá Tráfiku Humanu iha Palásiu Prezidensiál Bairru-Pité, Kuarta (19/10/2022).

Lee Mós: PM Taur Dezafia INDMO Rejísta Dadus Traballadór Timoroan Iha Estranjeiru 

Enkontru ne’e realiza tanba iha loron 07 fulan Outubru, Prezidente Repúblika, José Ramos-Horta bolu ona membru Konsellu Superiór Defeza no Seguransa (KSDS), hodi konvoka reuniaun ida diskute asuntu importante sira relasiona ho timoroan sira ne’ebé oras ne’e abandonadu iha Alemaña, Abu Dhabi, Malázia inkluí Portugál.

Iha mós informasaun ida katak iha loron Kinta (27/10/2022), sidadaun 200-resin sei sai tán ba rai liur, tanba ho preokupasaun sira ne’e maka parte kaza militár konvida entidade Estadu Seguransa nian tuur hamutuk fó ideia ba malu, hodi buka solusaun.

Tuir lei nasionál, servisu seguransa nian artigu 21, Prezidente Repúblika hanesan aman ba nasaun, iha devér ida atu kontrola entidade seguransa nian, tanba ne’e mak ho atuasaun ba ezekusaun iha loron 27 fulan Outubru, maka kaza militár konvida entidade sira seguransa nian atu halo atuasaun ba situasaun ne’e.

Iha reuniaun ohin, deside ba autoridade sira ne’ebé temi ona sei hamutuk atu halo atuasaun tuir regra ka regulamentu ne’ebé fó ba sira, nune’e traballadór sira ne’ebé atu sai ba liur no hetan rekrutamentu hosi ajénsia ne’ebé ilegál tenke iha responsabilidade ba sidadaun sira.

“Kuandu sai atu hetan servisu, fatin di’ak manán osan hodi ajuda família,maibé ba mak abandona fali iha estranjeiru, ida ne’e dever morál Estadu Timor Leste labele tuur nonok de’it hanesan ne’e. Tanba ne’e mak ami buka malu tuur hamutuk atu buka solusaun,” Maijór Francisco da Silva hateten.

Xefe kaza militár ne’e mós husu ba sidadaun sira ne’ebé mak sai ilegál, laiha dokumentu legál ruma nia sei la sai iha loron 27 fulan Outubru agora.

Estadu Timor Leste halo ona kontaktu ba Imigrasaun Portugál atu hein iha odamatan entrada, nune’e bainhira sidadaun sira husi Timor to’o iha ne’ebá tenke husu tuir, se mak responsabiliza sidadaun sira ne’e iha Portugál.

Iha loron 27 fulan Outubru, servisu sira Imigrasaun nian, PNTL, F-FDTL, PSIK no sira seluk sei uza lei atu hapara la’ós de’it para iha ne’e, maibé ba oin sei rigoroza liu tán ida ne’e, nune’e bainhira sidadaun sira ne’ebé atu sai ba liur  tenke legál no atu sai privadu mós se mak atu simu iha estranjeiru hodi hetan servisu.

Parte autoridade seguramsa mós sei fó de’it autorizasaun ba sidadaun sira ne’ebé ho passaporte válidu liu tinan rua ba leten, tenke mós iha billete aviaun atu fila no bainhira autoridade haree katak sidadaun ida nia atu sai ba estranjeiru mak la tuir rekizitu sira ne’ebé iha, nia sei la sai no sei verifika mós ajénsia sira ne’ebé atu haruka traballadór ba estranjeiru.

“Autoridade seguransa mós sei halo atuasaun ba ajénsia sira tuir medida ne’ebé iha no tuir lei haruka,” nia subliña.

Xefe kaza militár mós husu atu família ne’ebé apoia, haruka oan ka membru família atu ba servisu iha rai liur, tenke husu ba ajénsia ne’e legál ka la’e no garante atu bainhira sidadaun ne’e ba to’o iha estranjeiru hetan servisu ga la’e.

Tuir dadus ne’ebé iha, timoroan liu 5.000 mak oras ne’e iha estranjeiru hanesan Alemaña, Abu Dhabi, Malázia inkluíndu Portugál.

Jornalista: Vito Salvadór