Hatutan.com, (21 Outubru 2022), Díli- Conselho de Imprensa (CI) Timor Leste sei haruka karta lamentasaun bá Komandu Jerál Polísia Nasionál Timor Leste (PNTL) ne’ebé haruka karta notifikasaun bá Xefe Redasaun no jornalista hosi  Jornal Diáriu (JN) Independente.

Lee Mós : 16 Outubru Loron Nasionál Liberdade Imprensa, Jornalísta Labele Ta’uk Fó-Sai Lia-loos!

Karta Notifikasuan hosi PNTL bá Mídia Independente. Foto/Repro

Komandu Jerál PNTL  liuhosi Servisu Investigasaun Kriminál hato’o karta bá Diretór Diáriu Independente, José Sarito Amaral, ho asuntu notifikasaun bá Xefe Redasaun Jornal Independente, Jorginho dos Santos ho jornalista Domingos Gomes, atu aprezenta aan iha Servisu Investigasaun Kriminál iha Kuartél Jerál PNTL iha loron 24 fulan-Outubru 2022, hale’u tuku 09:00 Otl, hodi submete bá prosesu identifikasaun relasiona ho publikasaun notísia iha loron 11 fulan-Outubru 2022, ho títulu “Ejijénsia Demite Gastão, Komisáriu Mateus:   PNTL Simu Karta Hosi Vise MJ, Vise MI ho Vise MOP, inklui mós notísia ho títulu, “Naimori Hatudu Forsa” Deskonfia Vise MI Haruka Karta Ba Komandu PNTL Demite Gastão.”

Karta notifikasaun PNTL nian ho númeru ofisial 112/Gab/CHEFE/SIC/PNTL/X/2022  ne’e ho nia sentidu “Urjente” ne’e konsidera produtu Jornalístiku Jornal Independente nian edisaun rua ne’e  bazeia bá artigu  53 Kódigu Penal Timor Leste fó kompeténsia bá Polísia hodi halo prosesu identifikasaun bá pesoál sira ne’ebé deskonfia komete krime.

Tanba ne’e, karta notifikasaun ne’e ho objetivu atu mai justifika no klarifika publikasaun refere.  

Prezidente Konsellu Imprensa (KI), Virgílio Guterres, lamenta ho karta notifikasaun hosi instituisaun PNTL  bá Xefe Redasaun no jornalista Jornal Independente tanba la refleta ho espiritu Lei Komunikasaun Sosiál númeru 5/2014.

Prezidente KI, Virgílio Guterres bá Hatutan.com via telefónika, Sesta (21/10/2022), hateten notifikasaun hosi PNTL bá Xefe Redasaun no jornalista hosi jornal Idependente ne’e laiha fatin no salah alamat, polísia hanesan mós instituisaun lei labele halo notifikasaun bá jornalista ida tanba bazeia bá nia produtu jornalizmu.

Notísia hosi Jornal Independente. Foto/Repro

Notísia hosi Jornal Independente. Foto/Repro

Nia afirma, Timor Leste iha ona lei komunikasaun sosiál, polísia ka se de’it ka orgaun ne’ebé de’it mak la kontente ho konteúdu notísia jornalista ninian bele uza direitu de resposta ka direitu ratifikasaun atu halo no lei komunikasaun sosiál númeru 5/2014 ne’e klaru hela iha ne’eba.

“Konsellu Imprensa lamenta ho PNTL nia notifikasaun bá Media no jornalista sira. Há’u dehan, hanesan profisionál jornalista, mídia so halo obrigasaun legál ne’e tuir  lei komunikasaun sosiál númeru 5 nian,” Virgílio Guterres afirma.

Conselho Imprensa sujere atu PNTL bele komunika ho CI ka bele mós uza direitu  resposta atu hato’o bá média se konteúdu notísia ruma ne’ebé la kondís ho faktu ka realidade PNTL nian.

CI haree katak notifikasaun ne’e laiha fatin no la ho espíritu Lei Komunikasaun Sosiál nian, tanba ne’e husu bá polísia se bele uza meius seluk la’ós ho notifikasaun ida-ne’e tanba ne’e produtu Jornalístiku no la’ós jornalista nian ka media nian.

CI sei haruka mós karta ba iha Instituisaun PNTL hodi hato’o lamentasaun relasiona ho notifikasaun hasoru Xefe Redasaun no jornalista jornal Idependente.

“Ha’u orienta ona ezekutivu CI nian atu prepara karta ida,  atu haruka bá PNTL hodi lamenta kona-bá situasaun ne’e,  no parte legal CI nian bele prepara no lokraik ne’e sei haruka kedan bá PNTL,”  Virgílio haktuir.

Hatutan.com mós halo konfirmasaun ho Xefe Redasaun Independente, Jorginho dos Santos, hateten katak, nia parte simu ona notifikasaun ne’e no iha tempu badak sei halo enkontru ho CI atu bele rona opiniaun CI nian relasiona ho notifikasaun hosi PNTL.

Hosi sorin seluk, Diretór Diresaun Analiza Media (DDAM), Alberico da Costa Junior, liuhosi nia konta Facebook hato’o mós nia lamentasaun bá karta notifikasaun hosi Komandu Jerál PNTL nian ne’e.  

Albarico Junior hakerek iha nia konta Facebook katak notísia nu’udar produtu Jornalístiku ne’ebé bazeia bá faktu no verasidade jornalizmu, la’ós aktu krime.

Media hala’o nia papél informativu no kontrolu sosial tuir Konstituisaun, Artigu 40 no 41 ne’ebé tuir prinsípiu pais demokratiku nian hodi hakonu públiku nia direitu atu asesu informasaun.

Nia husu favor bá  instituisaun sira Estadu nian atu labele uza Kódigu Penál hodi notifika fali media hanesan fali komete aktu krime.

Tanba tuir nia, Timor-Leste nu’udár pais demokratiku, la’ós autoritáriu. Tan-ne’e, dalan di’ak liu mak uza Lei Komunikasaun Sosiál hodi rezolve kazu ka disputa sira ne’ebé iha ligasaun ho notísia.

Jornalista: Vito Salvadór