Hatutan.com, (20 Outubru 2022), Díli—Prezidente Repúblika (PR), José Ramos-Horta hasoru malu ho Primeiru-Ministru Reinu Kambódia, Vise Xefe Estadu Maiór Forsa Armada, Jenerál Komponente Terrestre Reinu Kambódia, Tenente Jenerál Hun Manet ho emprezáriu balun, hodi deskute no halo análiza ba situasaun rejionál no mundiál.

Prezidente Repúblika (PR), José Ramos-Horta hasoru malu ho Primeiru-Ministru Reinu Kambódia, Vise Xefe Estadu Maiór Forsa Armada, Jenerál Komponente Terrestre Reinu Kambódia, Tenente Jenerál Hun Manet ho emprezáriu balun, hodi deskute no halo análiza ba situasaun rejionál no mundiál, Kuarta (20/10/2022). Foto/média PR.

Enkontru entre Prezidente Repúblika José Ramos-Horta ho alta entidade sira ne’e nu’udár sorumutu informál no parte sira Reinu Kambódia nian hakarak rona direta prespetiva Timor Leste nian ba pás no relasaun bilaterál ho país mundiál sira seluk.

Lee Mós: Ramós-Horta ho Liurai Kambódia Diskute Kooperasaun Ekonómika-Komérsiu

“Hanesan enkontru infomál ida, troka impressun no sira hakarak rona ha’u nia apresiasaun no análiza kona-bá situasaun mundiál liu-liu Ukráina no polítika Amerikanu no relasaun Timor-Leste nian,” Hatutan.com sita deklarasaun Ramos-Horta iha komunikadu.

Xefe Estadu haktuir, Primeiru Ministru Kambódia Hun Sen apoia tebes adezaun Timor-Leste ba ASEAN no envolvimentu Timor-Leste iha organizasaun rejionál ne’e bele kontribui liu-tán diplomasia ho nasaun seluk no kontribui ba rezolusaun problema iha Mianmar.

“Bainhira Timor-Leste tama ASEAN sei kontribui makaas ba diplomasia kona-bá situasaun iha Myanmar, iha kontestu ASEAN atu haree oinsa kontribui hodi hetan solusaun tanba, bainhira kontinua, sei afeta bá ASEAN nia kredibilidade,”subliña.

Xefe Estadu mós rekorda sofrimente líder no povu Mianmar, tanba ne’e promete atu hametin parseria ho ASEAN, hodi solusiona konflitu liu hosi dalan diálogu.

Vizita Xefe Estadu ba Kambódia husi loron 19 to’o 21 fulan Outubru, hanesan resposta ba konvite hosi Liurai Reinu Kambódia, Narodom Sihamonia, hodi hametin relasaun bilaterál ho Timor-Leste.

Jornalista: Vito Salvadór