Hatutan.com, (20 Outubru 2022), Díli—Prezidente Repúblika, José Ramós-Horta, hasoru malu ho Liurai Reinu Kambódia, Narodom Sihamoni, hodi desktuti relasaun ekonómika no komérsiu entre nasaun rua, Kuarta-Feira  (19/10/2022).

Serimónia resepsaun ba Prezidente Repúblika José Ramos-Horta durante vizita iha Aeroportu Phnom Penh Kambódia. Foto/Média PR.

“Reinu Kambódia nu’udár Reinu antigu tebes, nia istória luta, terus mós hanesan ita. Tanba ne’e, sira simpatia maka’as tebes-tebes. Ohin ko’alia ho Liurai nu’udár ema artista ida. Ohin, hanesan hakat ida hosi diplomasia ho Kambódia ba tinan 20 nia laran,” Hatutan.com sita deklarasaun Xefe Estadu iha komunikadu.

Lee Mós: Ramos-Horta Hala’o Vizita Estadu Bá Kambodia

Xefe Estadu konsidera Timor-Leste rejista avansu maka’as iha relasaun diplomátika, maibé presiza aposta iha área komérsiu no ekonómiku.

“Ministériu Ekonomia, Komérsiu no Indústria hatene oinsa Timor-Leste sosa no importa foos hosi Kambódia, bele karun oituan maibé kualidade di’ák no garante fornesimentu alternativu tanbá dala ruma iha krize bo’ot ruma, Vietname mós la konsege halo esportasaun ba ita. Ne’e duni, Timor tenke diversifika rai ne’ebé importa foos nu’udár alimentu importante ba povu,” Xefe Estadu subliña.

Prezidente Repúblika mós konvida Liurai Kambódia, Narodom Sihamoni atu vizita Timor-Leste.

‘’Buka mós investimentu ho seitór privadu nasionál no internasionál bazeia iha Kambódia, buka sira nia investimentu iha área agrikultura no turízmu iha Timor-Leste,” hateten tán.

Primeiru-Ministru Hun Sen vizita ona Timor-Leste, ohin Ramos-Horta konvida mós Sua Majestade, Liurai Kambódia atu vizita Timor-Leste no nia simu ho laran konvite ne’e.

Timor-Leste ho Kambódia sei assina akordu koperasuan iha área serbisu aereo, hodi permite voo mensál hosi Phnom Penh mai Díli, hodi fasilita passajeiru hosi Xina mai Timor-Leste, tanba paíz ne’e jeográfikamente besik liu Xina.

Enkontru ne’e ko’alia mós kona-bá adezaun ba ASEAN, tanba Kambódia apoia adezaun Timor-Leste nia integrasaun ba organizasaun rejionál ne’e iha tinan 2023.

Prezidente Repúblika mós sente kontente ho resepsaun vizita hosi Aeroportu Phnom Penh to’o Otél.

Tuir ajenda, Xefe Estadu sei hasoru malu mós ho senadu Reiñu Kambódia, entidade militár, seitór privadu no alta entidade seluk.

Jornalista: Vito Salvadór