Hatutan.com, (21 Outubru 2022), Díli—Organizasaun Mundiál Saúde (OMS) alerta ba Ministériu Saúde (MS) atu fó atensaun ba produtu ai-moruk xarope kontaminada ne’ebé espalla ona iha mundu, tanba la tuir padraun ne’ebé OMS rasik hatuur.

Produtu ai-moruk xarope kontaminada ne’ebé espalla ona iha mundu, tanba la tuir padraun ne’ebé OMS rasik hatuur.

“Autoridade OMS informa katak, produtu ai-moruk xarope ne’e ba labarik sira, maibé kontamina ona, iha ne’ebé identifika iha nasaun Gambia Rejiaun Áfrika. Ai-moruk ne’e la inklui iha spesifikasaun ka fora hosi spesifikasaun no la tuir padraun mundiál ka falla,” Hatutan.com sita alerta ne’ebé fó sai iha loron 05 fulan Outubru 2022, hosi Kuartél Jerál OMS iha Jenébra, Suisa no publika hosi Ministériu Saúde TL liu hosi komunikadu.

Produtu ne’ebé identifika kontaminada mak hanesan:

1. Promethazine Oral Solution BP, Númeru batch: ML 21 – 02, Fábrika: MAIDEN PHARMACEUTICALS LIMITED (Haryana, India).
2. Kofexmalin Baby Cough Syrup (Pheniramine Maleate, Ammonium Chloride, Menthol),Númeru batch: ML21-199, Fábrika: MAIDEN PHARMACEUTICALS LIMITED (Haryana, India).
3. Makoff Baby Cough Syrup (Chlorphenamine Maleate, Phenyleprine HBR, Dextromethorphan syrup), Númeru batch: ML21-203, Fábrika: MAIDEN PHARMACEUTICALS LIMITED (Haryana, India).
4. Magrip N Cold Syrup (Paracetamol Phenyleprine HCL, Chlorphenamine Maleate), Númeru batch: ML21-198, Fábrika: MAIDEN PHARMACEUTICALS LIMITED (Haryana, India).

Hosi informasaun refere Diresaun Nasionál Farmásia no Medikamentu nu’udár Autoridade Reguladór Nasionál (NRA), iha Departamentu Farmakovijilánsia no Kontrolu Medikamentu iha Timor-Leste espalla kedan informasaun refere ba iha públiku nomós parte relevante atu identifika produtu refere iha armajén sentrál SAMES nomós setór privadu ne’ebé mak rejista iha Diresaun Nasionál Farmásia no Medikamentu, bazeia ba infomasaun ne’ebé mak Ministériu Saúde informa ba públiku katak;

1. Produtu 4 ne’ebé mensiona iha leten la deteta iha armajén SAMES nomós iha setór privadu sira tanba produtu hirak ne’e la rejistu iha Ministériu Saúde Timor-Leste.
2. Iha diferensa númeru fornada ‘batch number’ ne’ebé mak agora daudaun uza hela iha fasilidade saúde no la hanesan ho ai-moruk ne’ebé deteta iha nasaun Gambia.
3. Ai-moruk Promethazine Syrup ne’ebé mak agora daudaun uza iha fasilidade saúde ne’e la hanesan ho ai-moruk Promethazine ne’ebé identifika iha Gambia Rejiaun Áfrika no nasaun viziñu Indonézia.
4. Produtu ida ne’ebé utiliza iha fasilidade saúde hotu iha territóriu tomak maka Promethazine Hydrochloride Oral Solution USP 5mg/5ml, Númeru batch: 2PE01018, Fábrika: Ciron Drugs & Pharmaceuticals Pvt, Ltd. Plot No. 35 to 3, 43 to 45, CFC-B, Dewan Udyog Nagar, Aliyali, Palghar, Dist. Palghar – 401 404, India.

Maibé Ministériu Saúde husu ba públiku atu nafatin atensaun ba produtu hirak ne’ebé mak mensiona ona iha leten, identifika ai-moruk sira ne’e bele informa direta ba Ministériu Saúde.

Husu mós ba públiku atu labele pániku ho informasaun hirak ne’ebé agora daudaun ne’e sirkula iha média sosiál sira.

Informasaun seluk ne’ebé Hatutan.com asesu hosi KOMPAS.com, iha ne’ebé publika katak, Badan Pengawas Obat dan Makanan (BPOM) ka Ajénsia Nasionál ba Kontrollu Medikamentus no Alimentus fó-sai rezultadu inspesaun ne’ebé konsege detekta ai-moruk lima mak kontém kontaminasaun etilen glikol (EG) liu espésie espesifikasaun padraun mundiál, iha Kinta (20/10/2022).

Deskobrimentu ne’e hetan hafoin mosu kazu barak kona-bá insufisiênsia renál aguda ba labarik barak iha rejiaun sira Indonézia nian.

Iha mós ai-moruk xarope ne’ebé diskonfia kontamina kontein etilen glikol (EG) no dietilen glikol (DEG) iha ne’ebé deskonfia ninia material ne’e mai hosi material adisaun hanesan propilen glikol, polietilen glikol, sorbitol, no gliserin/gliserol.

Tuir loloos, materiál adisaun haat ne’e la’ós materiál ne’ebé perigu ka proibidu atu utiliza iha fabrikasaunai-moruk xarope.

Maibé, BPOM deside no hatuur ona padraun katak, limiar seguru ka Tolerable Daily Intake (TDI) ba kontaminasain EG no DEG ho nia kapasidade 0,5 mg/kg todan kada loron.

Turimai pontus importante sira kona-bá deskoberta hosi BPOM kona-bá ai-moruk xarope lima ne’ebé deskonfia  kontaminada etileno glicol ba esensiadu no limite seguru.

1. Xarope Termorex (ai-moruk febre), produsaun hosi PT Konimex ho nia númeru lisensa distribuisaun DBL7813003537A1, boter @60 ml.
2. Xarope Flurin DMP (ai-moruk mear no inus-metin), produsaun PT Yarindo Farmatama ho nia númeru lisensa DTL0332708637A1, boter plástiku @60 ml.
3. Xarope Unibebi Cough (ai-moruk mear no inus metin), produsaun Universal Pharmaceutical Industries ho nia númeru lisensa DTL7226303037A1, boter plástiku @ 60 ml.
4. Xarope Unibebi (ai-moruk febre), produsaun Universal Pharmaceutical Industries ho nia númeru lisensa DBL8726301237A1, boter @ 60 ml.
5. Febre Drops Unibebi (ai-moruk febre), produsaun Universal Pharmaceutical Industries ho nia númeru lisensa DBL1926303336A1, boter @ 15 ml.

Jornalista: Elio dos Santos da Costa