Hatutan.com, (01 Novembru 2022), Díli—Estadu Portugál iha kompromisu atu tulun no kria kondisaun ba Timoroan sira ne’ebé oras-ne’e tama ba buka servisu iha nasaun refere.

Prezidente Repúblika (PR), José Ramos-Horta hasoru-malu ho nia omólogu Prezidente Repúblika Portugál Marcelo Rebelo de Sousa iha Palásiu Belem, hodi diskute kooperasaun entre nasaun rua no situasaun Timoroan sira iha Lisboa, Segunda (31/10/2022). Foto/Média PR.

Prezidente Repúblika (PR), José Ramos-Horta ko’alia asuntu ne’e hafoin hasoru-malu ho nia omólogu Prezidente Repúblika Portugál Marcelo Rebelo de Sousa iha Palásiu Belem, hodi diskute kooperasaun entre nasaun rua no situasaun Timoroan sira iha Lisboa, Segunda (31/10/2022).

Lee Mós:Horta Fó Orden bá PCIC ho PNTL Buka Ajénsia Fasilita Timoroan “Abandona” iha Portugál

“Xefe Estadu rai rua promete atu kria kondisaun bá Timor oan sira ne’ebé foin to’o iha Portugál no kombate ilegalidade, estrutura ilísita, esplorasaun, tráfiku, maun-de-obra,” Hatutan.com sita komunikadu.

Advertisement

Iha prosesu oi-oin mak tama ona iha Ministériu Públiku (MP no mós iha ona inspesaun laborál bá empreza sira, kontratasaun no kondisaun servisu no saláriu.

“Ita iha medida konjunta, autoridade hosi nasaun rua, dezde fenómenu ne’e aumenta hosi Agostu, Setembru. Iha atuasaun iha nível oin-oin. Ita iha akordu no buat ne’ebé intolerável ba saida mak akontese no saida mak atu mai, iha Lei. Nune’e tenke fiskaliza, objetu intervensaun, la’ós de’it administrativa maibé foti justisa,” Sita deklarasaun Ramos-Horta.

Informasaun ne’ebé Ramos-Horta simu hosi Marcelo Rebelo katak, lokaliza ona Timoroan na’in 873 ne’ebé moris mukit loos no daudaun ne’e sira hela iha instituisaun akollamentu, autarkia lokál no instituisaun solidariedade sosiál.

Prezidente Repúblika José Ramos-Horta afirma, nasaun determinadu hodi identifika no kastigu grupu ne’ebé mak bosok joven sira hodi ba servisu iha Portugál no nasaun seluk.

“Fenómenu ida ne’e komún liu iha mundu, liu-liu iha nasaun sira ne’ebé iha vias ba dezenvolvimentu, dékada barak ona Timor-Leste hanesan Estadu livre no demokrátiku, la iha problema ho ema tama-sai ba Timoroan no ema seluk. Fásil liu ba ema atu fa’an hanoin iluzaun hodi servisu iha Portugál, Alemaña, Canadá ne’ebé mak iha moris di’ak,” José Ramos-Horta hateten.

Advertisement

Iha programa ba joven sira atu ba Koreia do Súl ho joven rihun rua resin, vantajen ida sei kontinua, ida ne’e hanesan prosesu aprendizazen kona-bá profisaun foun, abitu no disiplina, sira ne’e mak embaixadór boa vontade.

Hanesan mós ba Austrália iha programa sazionál ne’ebé hahú tiha ona tinan lima, tinan neen, ne’e programa modestu liu, Austrália la iha esperiénsia ba situasaun nune’e, ba Timor oan sira, no programa ida ne’e mós la’ós fasil, agora la’o di’ak ona ho mekanizmu estadu. Mai iha Portugál ne’e situasaun oin seluk, tanba kumpri prosesu burokrátiku husi Timor no nasaun ne’ebé simu joven sira.

Tuir Xefe Estadu, obrigasaun hosi Timor-Leste mak identifika no kastigu tuir lei, grupu ne’ebé bosok Timor oan sira, kobra joven sira to’o $3.000 ate $5.000.

Antes hala’o enkontru bilaterál entre Xefe Estadu rua, PR Ramos-Horta akompaña hosi ekipa hala’o uluk vizita presta omenajen no tau ai-funan ba Tumblo Camões aumezmu tempu asina mós livru de onra iha Praça do Império Belem-Portugal.

Hafoin ida ne’e, PR Horta akompana hosi Guarda Nasional Republicano (GNR) sai hosi edifisiu Praça do Império ba Palácio Prezidensial, Presidente Republika  simu ho onra Militares ho Cavalaria do GNR hodi akompaña viazen ba Palasiu de Belem.

Advertisement

Jornalista: Vito Salvadór