Hatutan.com, (02 Novembru 2022), Díli—Prezidente Repúblika (PR), José Ramós-Horta hala’o enkontru ho komunidade Timoroan iha Portugál, hodi atualiza situasaun polítika no ekonomia iha Timor-Leste (TL).

Prezidente Repúblika (PR), José Ramós-Horta hala’o enkontru ho komunidade Timoroan iha Portugál, hodi atualiza situasaun polítika no ekonomia iha Timor-Leste (TL), Kuarta (02/11/2022). Foto/Média PR.

Xefe Estadu akompaña hosi  Ministra Negósiu Estranjeiru no Kooperasaun, Adaljiza Albertina Xavier Reis Magno no Embaixadora Timor-Leste ba Portugál, Isabel Guterres.

Lee Mós: Ramos-Horta Partisipa Abertura Konferénsia Websummit bá Dala 22 Iha Lisboa

Durante enkontru, Xefe Estadu aprezenta balansu kona-bá prosesu harii Estadu durante tinan 20 nia laran, no problema oin-oin iha setór ekonomia, edukasaun no problema sosiál ne’ebé presiza  rezolve ho didi’ak.

Enkontru ne’ebé hala’o iha Embaixada Timor-Leste iha Lisboa, Xefe Estadu esplika mós bá Timoroan sira kona-bá vizita ba Portugál, hodi hametin liután lasu kooperasaun bilaterál ho Estadu Portugál, inklui hametin relasaun ho país sira seluk iha kontinente Europeia, Áfrika no Ázia.

“Adezaun Timor-Leste ba ASEAN nu’udár pasu importante ba polítika Timor-Leste hodi hametin kooperasaun politíka, ekonomia ho nasaun sira hotu, inklui Europeia, Afrika no nasaun seluk tan,” Hatutan.com sita komunikadu, Kuarta (02/11/2022).

Antes ne’e, Xefe Estadu hala’o vizita ba Kamboja hodi husu mós apoiu polítika ba adezaun Timor-Leste nian ba ASEAN iha tempu besik.

Tuir Xefe Estadu, durante  tinan lima sei hametin liután kooperasaun Timor-Leste ho nasaun sira hotu, hodi hadi’a hikas imajen polítika no ekonomia Timor-Leste ba mundu atu manan konfiansa no haforsa prosesu dezenvolvimentu Timor-Leste nian.

Premiadu Nobel da Paz, José Ramós-Horta husu atu Timoroan sira kontinua fó apoiu ba polítika Governu Timor-Leste iha aspetu hotu- hotu.

Prezidente Repúblika agradese mós  Timoroan sira  ne’ebé hala’o estudu iha Portugál atu kontinua fó tempu hodi estuda ho didi’ak no destaka kona-bá susesu estudante nian ida hosi Eskola Portugeza Ruy Cinatti, ne’ebé manan kompetisaun mundiál iha matemátika.

Iha fatin hanesan, Embaixadora Timor-Leste ba Portugál, Isabel Guterres mós agradese primeiru vizita Xefe Estadu nian, tanba fó tempu hala’o enkontru ho komunidade Timoroan sira iha Portugál.

“Daudaun ne’e, Embaixada Timor-Leste kontinua koopera ho Timoroan sira, liu-liu buka rezolve problema sira ne’ebé kuaze ema na’in 5.000 liu hasoru iha Portugál,” Isabel Guterres hateten.

Enkontru Xefe Estadu nian ne’e hetan partisipasaun másimu hosi Timoroan sira ne’ebé hela no hala’o estudu no servisu hodi reprezenta Timor-Leste iha Portugál.

Reprezentante Komunidade Timoroan, Manuel Abrantes ne’ebe hela iha Portugál sente orgullu, tanba vizita Xefe Estadu nian ne’e fahe mós hanoin ba sira kona-bá situasaun iha Timor-Leste no ajuda mós Timoroan sira iha Portugál hodi kontribui ativamente ba dezenvolvimentu nasionál.

“Ami mós preokupa ho Timor-Leste nia problema ekonomia no falta rekursu umanu, hodi implika adezaun Timor Leste ba ASEAN,” Manuel Abrantes hateten.

Iha parte seluk, Timoroan no Eis Prezidente Tribunál Rekursu, Dr. Claudio Ximenes husu ba Estadu Timor-Leste atu halo revizaun ba lei sira iha Timor-Leste nian, liu-liu lei kombate korrupsaun hodi haforsa papél Estadu, hodi luta kontra korrupsaun iha Timor-Leste.

Jornalista: Vito Salvadór