Hatutan.com, (03 Novembru 2022), Díli—Prezidente Repúblika Timor Leste, José Ramos-Horta ho Prezidente Repúblika Portugál, Marcelo Rebêlo de Sousa, hasoru-malu ho imigrante Timoroan ne’ebé hamahan an provizóriu iha Pavilliaun Polísia Munisipál Lisboa, Kuarta (02/11/2022).

Prezidente Repúblika Timor Leste, José Ramos-Horta ho Prezidente Repúblika Portugál, Marcelo Rebêlo de Sousa, hasoru-malu ho imigrante Timoroan ne’ebé hamahan an provizóriu iha Pavilliaun Polísia Munisipál Lisboa, Kuarta (02/11/2022). Foto/Média PR.

Timoroan hirak ne’e maioria toba iha jardim, tanba deskunfia sai vítima ba ajénsia fa’an billete ne’ebé la onestu, tanba promete atu hetan kedan servisu no hela fatin, bainhira to’o Portugál.

Lee Mós:Prezidente Repúblika Atualiza Situasaun Polítika bá Komunidade Timoroan iha Portugál

Ho promessa ne’e, foin sa’e sira foti risku balun empresta ema nia osan atu bele hola billete inklui nesesidade seluk tán, ho objetivu bele to’o iha Portugál.

Ligadu ho ida ne’e, Prezidente Portugál, Marcelo Rebelo de Sousa ne’ebé hetan ona informasaun antes, husu informasaun klara, atu fó solusaun.

“Ha’u nia perguntas, imi simu informasaun hosi se’e mak konsege mai to’o Portugál? Imi hatene mai iha ne’e atu hala’o saida?,” kestiona Xefe Estado Portugál ne’e iha komunikadu ne’ebé Hatutan.com asesu Kinta (03/11/2022).

Maski kestiona, maibé ho espresaun triste, sidadaun hirak ne’e kontinua defende an hodi dehan, la’o ho hakarak rasik, seluk hatan katak, prosesu trata dokumentus nasionalidade ne’ebé tarde iha Embaixada Portugál iha Timor-Leste mak obriga sira foti risku.

Konsiente katak, maski la onestu, maibé Xefe Estadu rai rua nafatin hatudu espiritu domin no aprezenta opsaun hanesan, prontu fasilita sira ne’ebé hakarak fila inklui buka dalan ba sira ne’ebé hakarak mantein.

“Ho domin, ami laran haksolok mai iha ne’e reprezenta Estadu rua ha’u hakarak halo boasvindas lori Estadu no povu Portugés nia naran, hamutuk ho Prezidente Ramos-Horta hodi buka rezolve imi nia situasaun sira hotu tuir regras hodi realiza imi nia mehi,” Prezidente Repúblika Portugál Marcelo Rebelo de Sousa hateten, hanesan haktuir iha komunikadu.

Marcelo agradese tanba hamutuk ho Ramos-Horta bele rona direita situasaun Timoroan sira nian, hodi estadu rua solusiona problema no fasilita Timoroan ne’ebé hakarak servisu iha Portugál no fasilita sira ne’ebé hakarak fila ba Timor-Leste.

Fatin hanesan, Ramos-Horta agradese bá nia omólogu Marcelo Rebelo ne’ebé hatudu domin hodi  hamutuk  tun direita halo diálogu ho foin sa’e Timor oan sira.

“Avo Marcelo úniku Prezidente ida iha mundu ne’ebé hatudu nia fuan boot no domin ba ita Timor-Leste, hodi tun direita mai buka solusaun ba imi nia problema, tanba ne’e ha’u husu ba imi labele tauk, ami sei buka solusaun,” Ramos-Horta enkoraza Timoroan sira.

Prezidente Repúblika Timor Leste, José Ramos-Horta ho Prezidente Repúblika Portugál, Marcelo Rebêlo de Sousa, hasoru-malu ho imigrante Timoroan ne’ebé hamahan an provizóriu iha Pavilliaun Polísia Munisipál Lisboa, Kuarta (02/11/2022). Foto/Média PR.

Xefe Estadu mós orienta ona autoridade seguransa Timor-Leste atu loke prosesu investigasaun ba ajénsia ilegál sira ne’ebé bosok Timoroan sira hodi ba servisu iha Portugál hodi prosesa tuir dalan legál.

Reprezentante Timoroan, Luís Ximenes hosi Munisípiu Aileu, agradese ba Xefe Estadu rua nia domin hodi tun direita hasoru sira.

“Ami grupu lubuk ida liu hosi ajénsia sira promete ba ami dehan bá Portugal servisu iha, maibé realidade to’o iha ne’e la iha ema ida maka fasilita ami, tanba ne’e, ami moris abandona hela iha ne’e. Ho ida-ne’e ami agradese ba PR Ramos-Horta no Prezidente Marcelo Rebêlo bele tun direita mai rona ami-nia preokupasaun hodi bele solusiona ami-nia problema,” Luís Ximenes hateten.

Nia husu atu estadu bele fasilita sira trata dokumentu hanesan narativa, pasaporte no seguransa sosiál, nune’e sira bele kompleta sira-nia dokumentu atu bele servisu iha Portugál.

Ho ida ne’e,  Prezidente Repúblika José Ramos-Horta apela ba Timoroan hirak ne’e kontinua  koopera no hatudu komportamentu di’ak ho pasiénsia, tanba estadu Portugés esforsu hela atu buka solusaun ba situasaun refere.

Xefe Estadu dehan, parte governu no autoridade seguransa Timor-Leste sei kontinua halo kontrolu makas hodi evita Timoroan sira seluk labele sai tan vítima.

Diálogu Xefe Estadu rua ho imigrante Timoroan sira-ne’e, akompaña direita hosi Ministra Negosiu Estranjeru no Kooperasaun, Adaljiza Magno no Embaixadora Timor-Leste ba Portugál, Isabel Amaral Guterres no Embaixadora Portugal ba Timor-Leste, Manuela Bairos no reprezentante governu Portugés.

Dadaun ne’e Timoroan hamutuk na’in-200 resin mak provizoriamente sei hela iha Pavilliaun Polísia Munisipál Lisboa Portugál no hetan asisténsia hosi Governu Portugál, liu hosi Protesaun Sivil Lisboa, no fó tratamentu saúde ba sira, hela fatin, hahán, no seluk tan hodi hein estadu rua hakotu sira-nia problema.

Jornalista: Vito Salvadór