Hatutan.com, (04 Novembru 2022), Díli—Polísia Nasionál Timor-Leste (PNTL) rejista ema na’in-neen mak lakon vida (mate), tanba asidente tráfegu ho motór durante viájen bá munisípiu hodi selebra loron matebian ka finadu.

Portavós komandu jerál PNTL, Superintendente Xefe Polisia, Arnaldo de Araújo.

Tuir dadus, durante loron 29 fulan-outubru to’o loron 03 fulan-novembru, PNTL rejísta asidente tráfegu ho hamutuk 22, kompostu hosi ema mate neen, kanek gráve ida, kanek kamán 15.

Lee Mós: Konfrontu iha Dare Durante Finadu, Ida Mate Fatin

“Ha’u hakarak informa bá ita-boot sira, durante dia 29 outubru to’o dia 03 novembru iha ema na’in-neen mate,” Portavós komandu jerál PNTL, Superintendente Xefe Polisia, Arnaldo de Araújo hateten liuhosi konferénsia imprénsa iha Kuartél jerál PNTL, Caicoli, Sesta (04/11/2022).

Hosi númeru asidente fatal na’in-ne’e ne’e, ida mate iha área Manatuto Vila, Baucau tolu (ida iha Laga, ida iha Venilale), rua iha Ermera no asidente ida tán iha Díli.

Kazu asidente hirak ne’e mosu tanba monu ho motór, bainhira viájen hosi kapitál Díli bá sira-nia rai moris fatin, hodi selebra loron boot matebian (finadu), hamutuk ho família.

Kronolojia Akontesimentu

Dezastre ne’ebé akontese iha Metinaro. Foto/PNTL.

Iha sesta (28/10/2022) tuku 11:30 dadeer Otl, mosu kazu asidente tráfegu ida iha estrada públiku Uaidikotu Liabala, Postu Administrativu Venilale.

Asidente trafiku ne’e mosu bainhira motorista Francisco da Silva Amaral, ne’ebé kondús Motór Honda Mio Beat, kór-mutin, Xapa matrikula K.1253 tls, tula nia oan-na’in-tolu (3), sai hosi Postu Administrativu Venilale Vila, atu bá iha Suku Saelari.

Maibé, to’o iha área Estrada Públiku Uaidikotu Liabala, motorista Francisco da Costa Amaral, buti motór nia travaun ain (rem) la hetan, ikus mai monu ho motor. Asidente ne’e, rezulta motorista nia oan Zelcia Auxiliadora da Costa, lakon vida. Tipu asidente tráfegu ne’e maka omesido neglijente.

Iha loron sabádu (29/10/2022), tuku 05.30, dadeersan madrugada Otl, akontese kazu asidente ida iha área Munisipiu Manatuto, Posto Administrativu Manatuto Vila, Suku Ma’abat, área Balak-Masin.

Asidente ne’e mosu, tanba motorista ne’ebé kondús motór, halai sai hosi estrada no xoke, hodi rezulta vitima José de Rosa Barbosa (37), mate fatin.

Vitima ne’e orijen hosi Suku Aekoni, Postu Administrativu Baguia, Munisipiu Baucau. Tipu motorizada ne’ebé uza maka, Honda Mio Street, kór metan, númeru matrikula S. 2779 Tls. Kazu asidente ida ne’e, sei iha prosesu investigasaun laran.

Iha domingu (30/10/2022), tuku 06:00:30, dadeersan madrugada Otl, akontese kazu asidente tráfiku involve entre karreta ho motór xoke malu iha área Fatukero,  Postu Administrativu Gleno Villa, Munisipiu Ermera. Asidente ne’e  rezulta Vitima na’in-rua mate kedan iha fatin.

Vitima ne’ebé mate ho motorizada, Delvin de Araujo Soares (22), tula ho pasajeiru ida naran David Soares (23), Kondutór ne’ebé xoke, Paulo Magalhães.

Karreta ho nia xapa matrikula 60:385 Tls, diresaun hosi Dili atu bá Munisipiu Ermera, hasoru-malu ho motór ida ho xapa matrikula 8226 M, halai hasoru malu-malu maka xoke karreta ne’e, ikus mai rezulta vitima na’in-rua mate kedan iha fatin.

Asidente ne’ebé hanesan, akontese mós iha Postu Administrativu Venilale, Baucau. Iha domingu, (30/10/2022), tuku 13:40, meiudia Otl, Estrada Públiku Entronkamentu, iha área Mulia Laga.

Akontesimentu ida ne’e rezulta vitima Jerónimo Magno de Assunção (34), hosi Aldeia Loikeru, Suku Mehara, Postu Administrativu Tutuala-Lospalos, Munisipiu Lautém.

Kazu ssidente tráfegu ne’e akontese, bainhira Kondutór Calistro B. Gusmão, kondús karreta Carry, kór-metan, Xapa matrikula, A.12-012 tls, diresaun hosi Dili atu bá Postu Administrativu Quelicai, Suku Namanei.

Maibé, to’o iha Estrada Públiku Entronkamentu Mulia, halai ho Velodidade foti liu motór nia diresaun kontráriu nia dalan, ikus mai akontese soke motór Vixion, kór-mutin, Xapa matrikula C.7928 tls, diresaun kontráriu rezulta lezada Nelia Fraga sarmentu hetan tohar iha kelen parte karuk, Lezadu João Marcal Soares, raspaun iha kelen parte loos inklui motór hetan Estragus todan.

Depois karreta refere Kondutór fila Volante no halai ho velosidade maka’as bá liman karuk, hodi xoke tán motór ida ne’ebé estasiona dook hosi Estrada, ho disténsia metru-rua parte karuk, no motór ne’e Vitima Jerónimo Magno da Assunsão, tuur hela iha motór-leten, maka monu iha karreta ne’e nia okos no karreta halai rasta motór ho Vitima Jerónimo Magno, bá karreta nia oin ho distánsia kuaze sentímétru 16,20, ikus mai vitima mate kedan iha fatin akontesimentu.

Motór ne’ebé vitima Jerónimo Magno da Assunsão, uza ho marka Jupiter, kór-metan Xapa matrikula F.9569 tls, tula nia kaben Elviana Alves Freitas ho nia oan Jelvia Freitas Magno da Assunsão.

To’o iha ne’ebá, vítima nia ferik-oan ho oan, sei ba iha loja atu sosa sasán balu, no vitima tuur mesak hela iha motór-leten. Hakfodak de’it, kareta Carry soke vitima hosi partge kotuk.

Tipu kazu asidente tráfegu ne’e ho Omesídiu Neglijente, Ofensa Integridade Fisiku agravado Neglijente, Ofensa Integridade Fisiku Simples Neglijente, Danos Simples Neglijente.

Iha loron tuir mai iha kuarta, (02/11/2022),  tuku 11:00 otl, mosu mós kazu asidente tráfegu (motor xoke malu) iha kapitál Munisipiu Dili, Suku Vera Cruz, iha área Bombeiros Caikoli nia oin. Akontesimentu ne’e, rezulta vitima Domingos Soares, tenke lakon vida.

“Situasaun jerál iha territóriu Timor laran tomak, hakarak informa de’it katak durante findu hahú hosi dia 29 outubru to’o iha dia 03 novembru, situasaun enjerál la’o di’ak no hakmatek. Maski iha asidente no insidente balun, la afeta bá situasaun enjerál,” Komandante Arnaldo, hateten.

Jornalista: Rogério Pereira Cárceres